永年士多 Wing Nin Noodle：「年」鎖滋味

老婆話好耐無食過車仔麵，所以，又趁星期五晚，出嚟食吓飯，雖然，晌香港有唔少車仔麵名店，相信由元朗起家嘅「永年士多」亦喺其一。就返方便，嚟到佐敦新店試試。

店內裝修簡約得嚟，又有啲特色，餐廳尾有棵大樹，死角位又有個殖民時期嘅紅郵筒。

當然，最吸晴喺將成個嚿時車仔麵嘅場景重塑出嚟，百分百還原，客人更可以坐埋去打卡，後生一輩應該未見過，但對我哋就有好多童年回憶。

車仔麵對香港人唔會陌生，所以，餐牌直接擺出嚟，大家一睇就明，基本上呢度啲車仔麵就3餸起，而餸料選擇非常多。如果唔想諗，就可以揀預設好嘅「經典選擇」系列。而且，仲有多款特色小食、特色多士同特色飲品。雖然可以晌櫃枱落單，但小弟鍾意以二維碼落單，可以慢慢揀，唔使擔心阻住人。

豬皮、魚蛋、蘿蔔、牛肚米粉 $63

老婆嘅車仔麵都揀得好傳統，都喺大路嘢唔會太花巧，而捧上手非常夠份量，豬皮好爽口，蘿蔔非常之清甜，牛肚炆得好腍，而且非常入味，反而喺啲魚蛋有別平時喺街邊掃街嗰類咁彈牙，但都好有魚味，米粉爽滑及無話煮過籠，質量皆優。

瘦豬腸、雞翼尖、牛筋、墨魚春卷油麵 $69
我揀餸料就盡量揀啲平時少食到嘅食材，喺落單嘅時候見到有豬賜及瘦豬腸，嚟到就明白瘦豬賜喺比較細條啲嘅豬腸，唔喺豬大腸咁粗，所以，口感無咁肥，而且無豬臊味；雞翼尖果然喺必食之選，一咬直情化開，牛筋亦都炆到極之軟腍，同埋好入味；至於啲墨魚春卷質感比較咬口，墨魚香味十足。另外，佢哋嘅湯底有陣陣嘅藥膳味，唔重易入口，感覺都幾特別。

腐乳通菜 $27

食得平衡少少當然要多點個蔬菜啦，腐乳通菜就最心水，因為出面啲腐乳好似特別好食啲咁，二維碼落單時仲可以要求腐乳放邊，真細心，啲通菜又淥得啱啱好，唔會太腍，仲有少少脆口感。

抹茶紅豆冰 +$15、紅豆奶茶冰 +$15

老婆向來都鍾意飲紅豆冰，難得呢度仲有一款竟然喺配抹茶，咁就更加啱晒佢心水。佢一向唔飲凍嘢，紅豆冰除外，最好喺可以揀少冰，如果有無冰揀，佢就一定會揀。佢話個抹茶本身已經幾好飲，抹茶味好清幽，而且，十分濃郁，襯紅豆真喺一流。好奇一問，點解唔跟杯抹茶紅豆冰咁叫奶茶紅豆冰，而喺叫紅豆奶茶冰呢？唔理點叫，總之佢個奶茶底幾香滑，茶味十足，而紅豆份量勁多，打橫睇堅有差唔多1/3杯，絕對夠誠意，而且，煮到又腍又夠粉，清甜好味。

只喺嗌咗兩碗4餸麵，再加碟通菜，已經食得大家好飽，實在滿足。仲想試埋店家嘅咖央牛油多士，唯有留番下一次。樣樣餸料都好食，就好似產生連鎖反應，令整體就更加好味。

個人評分
味道：9/10
環境：8/10
服務：8/10
抵食：8/10
平均每人消費：HK$95

餐廳資料：
永年士多 Wing Nin Noodle
地址：佐敦彌敦道380號香港逸東酒店地下1號舖
電話：6655 5509