天下糧倉牛肉火鍋專門店 Granary Beef Hotpot：勿失「糧」機

早前同啲老死食飯，講開打鞭爐，話想食得有質素嘅，通常喺嗰啲散點嘅會好啲，放題嘅有機會無咁高質，尤其主力食肉嘅朋友，散點起計真喺落樓唔少錢。不過，我話要搵有質素嘅放題店，其實都有好多選擇，不過，主打食牛又想性價比高嘅，就諗起早前有食友推介呢一間「天下糧倉牛肉火鍋專門店」，老死好有興趣，就約埋一齊上嚟拆餐飽。

餐廳位處旺角區商廈之上，所以，交通非常便利，而走進餐廳，地方唔算話好大，裝修簡約，一室木系，分4人、6人枱。餐廳尾尾裡面見到仲有個廂房，不過，當晚有十幾人包咗，就唔方便影相。

一系列牛肉、豬肉、羊肉，就剔紙仔落單，而其他食物，包括丸類、腸仔、蔬菜、餃子、即食麵、烏冬、飲品、雪糕……等等，就擺晒喺旁邊嘅凍櫃之內，自由取用。

另外仲有個醬料區，基本嘅醬料都齊，自由混醬，我就唔會太雜，金銀蒜、芫荽、蔥粒再加啲麻醬就夠晒。順帶一題，會收番每位客人$13醬料費，所以，無理由唔撈吓架。

飲品

打鞭爐點都一邊食，一邊飲凍嘢先夠爽。晌凍櫃之內，有好多罐裝、樽裝飲品，品牌、款式、口味都非常之多選擇。小弟就喜歡樣樣都試下，前後三輪都飲咗幾款唔同嘅飲品，放題就有呢樣好 ，攞嘢飲無負擔，哈哈。

咁介紹吓佢個「究極和牛放題」收費先，9:30pm前入座就收$246/位，9:30pm後入座平好多，收$217/位，而部分特色湯底需要另外加錢，要留意喔。另收醬料費及加一服務費，基本上，唔使三嚿水可以食到咁多款牛肉，而且任飲任食，對於啲牛魔王、食肉獸嚟講，確喺好化算。不過溫馨提示，限時兩個鐘，但相信都好足夠。

再順便講埋餐牌中其他散點部份，例如雞煲、佐酒小食，更歡迎預訂各類海鮮、刺身、生蠔，此外提供多款烈酒、日本清酒，故此，唔食放題，專啲食散點都OK。

芫荽皮蛋湯底
我哋慳慳哋，無再加錢要其他湯，再者，老友就想清啲試個芫荽皮蛋湯底。個湯用料十足，勁多芫荽，先飲幾啖，味道好清爽，當然，芫荽呢家嘢就唔喺人人都鍾意嘅。

牛肉拼盤大放送
嚟得嘅人多數都喺食放題，十居其九目標都喺啲牛肉，所以基本上餐廳都會準備晒一盤盤「牛肉大拼盤」，最正喺標示晒所有肉類名稱，包括一級肥牛、封門柳、澳洲M7和牛、澳洲和牛金錢展、牛板腱、安格斯牛肩胛、牛脷片、鮮牛肉，夠晒吸晴，雖然唔知份量，但肯定有番咁上下，由於喺放題，可以再翻點。

小弟唔喺咩食牛專家，無咁叻可以逐款牛肉評論 ，不過，一次過試到8款唔同嘅部位，各部位味道、口感都唔同，確喺幾特別，但最緊要嘅喺款款都好食吖嘛，要有油香嘅有油香，要有肉味嘅有肉味，要有嫩滑嘅有嫩滑，喺個非常好嘅體驗。

羊肉片
處理晒成盤牛肉，再嗌咗一客羊肉片試試，因為羊肉晌肉類中始終都有啲特別。羊肉切得夠薄，所以，都喺輕輕灼至變色就放入口，肉質同樣好嫩滑，羊肉味濃，但唔太羶，佔上醬汁更好食。

丸類、豬腸、芝士腸、響鈴

食完牛食完羊，都已經7、8成飽，所以，都無再嗌豬肉，改為試下啲丸類嘢，求其夾咗幾款丸、豬腸、芝士腸、響鈴試一試。雖然只喺來貨嘢，但質素唔錯，尤其啲芝士丸同貢丸，非常好食，此外，豬腸洗得乾淨，無豬臊味，又唔覺太肥。

蔬菜、魚餅
去到尾聲，當然補返啲纖維質啦，所以，又隨意夾咗幾款蔬菜。啲藕片同萵筍幾好食，粟米都好鮮甜，魚餅又幾爽口，有魚味，唔喺溝粉嘅貨色。

雪糕大拼搏

到最後，搵返啲雪糕降下溫，甜品方面雖然只有雪糕，但勝在口味勁多，有兩款品牌，小弟一向都好鍾意食甜品，所以一口氣掃咗6杯：桂花烏龍、柚子乳酪、豆腐雪葩、荔枝、芒果、綠茶， 啲雪糕嘅質感幾唔錯，幾有奶香，而且，各款口味都好突出，好有個性。桂花烏龍同柚子乳酪好有驚喜，荔枝、芒果、綠茶嘅味道好濃郁，反而豆腐雪葩不似預期，豆腐味唔算話好出。

依家啲火鍋放題比比皆是，如果想食精啲嘅牛肉，呢度值得一試！

個人評分
味道：9/10
環境：7/10
服務：8/10
抵食：9/10
平均每人消費：HK$285

天下糧倉牛肉火鍋專門店 Granary Beef Hotpot
地址：旺角西洋菜南街1A-1K號百寶利商業中心5樓501-506號舖
電話：6661 8096