楓林小館 Fung Lum：食得「楓」騷

幾個月前嚟過一次食飯，覺得價錢唔貴，碟頭夠大，抵食！不過，因為嗰次一大棚人嚟，唔方便影相，所以，就無出過食評。今次趁同舊同事聚舊，又想起「楓林」，就決定再嚟試試。

原本只喺打算普通食飯訂張枱，唯一要求喺無限時交枱而已，都預咗坐晌大廳，但嚟到驚喜咁俾咗個細房我哋。呢度整體裝修幾古雅，尤其啲廂房，牆上掛啲木雕，趁上啲仿古窗，配上木椅，非常古色古香。

我哋剛好6個人，嚟之前就決定訂佢哋較平嘅「喜慶歡聚全包宴 」（$1788），一來貪佢全包，一口價唔會有再有咩雜費，二來有半席揀，份量應該啱啱好，三來又唔使諗食乜嘛，喺食飯懶人包。

此外，店家仲有其他套餐，選擇算多，豐儉由人，所以，專登掃描埋出嚟俾大家參考。

喜灼海生蝦
先嚟一大碟灼生蝦，雖然半席咋，但份量唔少，而且，啲蝦夠晒大隻，唔會蝦毛仔，肉厚又鮮甜，貨真價實嘅靚蝦。

黃金百花球

叫得黃金，當然要炸得夠靚，個人就略嫌炸得色深較沉，未夠金黃，不過，就炸得香口，裡面蝦膠打得好彈牙，本身已經炸得唔油膩，但沾上甜酸醬，食起嚟更清爽。

金瑤扒雙蔬
有相你睇，所落嘅瑤柱絲一梳梳，一啲都無手緊，打成芡汁淋晒上面，而雙蔬喺草菇加小棠菜，沾上金瑤芡，寧舍好味。

乾煸南非鮑魚煲

突然間一室香氣四溢，原來個乾煸鮑魚煲提早登場，放上枱仍然仲喺吱吱聲，熱力逼人。啲鮑魚鎅晒花，所以，入口更加入味，而且，口感柔韌有彈性，此外，就連啲蔥都非常好食。

竹笙海皇燴燕窩
小弟戒魚翅多年，呢個海皇羹更加啱我，雖然， 燕窩就唔喺好睇得出，不過，個海皇羹就推得好好，唔單止味道鮮甜，口感唔會太杰或太稀，仲有有好多海鮮料晌裡面。

清蒸金花尾斑

講到食新鮮魚，都喺清蒸最能夠食出鮮味。呢條金花尾班估計都有斤半，蒸得啱啱好,l，夾起嚟唔會黐骨，啲肉質嫩滑到不得了，而且，確喺非常鮮味。

蠔皇北姑鵝掌

呢道菜喺宴席中比較傳統嘅菜式，亮點通常都喺啲大花菇，而啲花菇確實又大又厚肉，同埋好有菇香，鵝掌亦都扣得好軟腍，底下嘅生菜亦都煮得仲有陣爽口感，配埋個蠔皇芡夠晒香濃。

楓林招牌乳鴿

雖然餐牌中嘅乳鴿為第二道菜，不過，個乳鴿就好似平時食酒席嘅炸子雞咁，近尾先壓軸登場。乳鴿配埋啲七色蝦片，喺呢度嘅招牌，不愧為招牌菜式，唔單止炸得皮脆肉嫩，啲乳鴿又醃得入味，而且，相對嚟講都較大隻，食到啜晒手指。

瑤柱蛋白炒飯

去到尾聲，其實大家都好飽吓，加上同台女士多，所以，大家都喺淺嚐呢一個炒飯。我就覺得個炒飯炒得有水汁，一來唔油，飯粒夠爽身，二來裡面料多，所以，味道一啲都唔寡。雖然剩番一大碟，幸好有朋友已有準備，自備膠盒打包成兜飯，環保唔好嘥嘢，讚呀！

賀壽桃包

一種女士們為咗食個壽包而放棄個炒飯，老實講，啲壽包又做得真喺唔錯，外型幾靚仔，咬落包身好軟熟，食落唔黏牙，啲白蓮蓉餡清香又唔會過甜。

合時甜品
合時甜品只喺紅豆沙啫，都無話合唔合時，幾時都啱食。睇樣你就覺得平平無奇，食落你就知有啲深度，因為除咗啲紅豆煮到夠綿起晒沙之外，就喺滲出陣陣陳皮果香。

今餐食得高興，因為呢個舊同事組合相識幾十載，喺好難得嘅事，加上今晚啲餸菜大家都好滿意。不得不再提多次，個套餐嘅份量真喺好足，如果女士佔多嘅話，無話有啲大胃王同枱，相信7、8嗰人都可能夠食。

個人評分
味道：9/10
環境：8/10
服務：8/10
抵食：9/10
平均每人消費：HK$300

楓林小館 Fung Lum
地址：荃灣大壩街4-30號荃灣廣場L6樓615-620號舖
電話：2322 3388