瀛燒居酒屋：經「瀛」有道

日本菜中，食得較多喺居酒屋，講真，拉麵都無食得咁多，可能因為居酒屋食物嘅種類多。今晚就同老表入到荃灣嘅「瀛燒居酒屋 」食吓各種日本料理。

踏入店內，好居酒屋格局，環境昏昏暗暗，滿天花掛上各款日式燈籠、艷紅嘅秋葉，以及牆上滿滿嘅日語廣告標貼，不斷播放懷舊嘅日文歌，實在蠻有氣氛。

涼伴茄子、味噌椰菜 @$25

既然喺居酒屋，所以，選擇特別多，但先嚟兩小碟前菜。前者茄子軟腍，加上醬油漬，食起嚟幾清爽；後者嘅椰菜有啲爽脆口感，添上味噌，有份惹味嘅感覺。

三點刺身盛合 $148

呢一款刺身盛合幾好，可以晌8款刺身中任揀3款，非常有彈性，我哋就揀咗活赤貝、八爪魚同赤身。日本菜一向注重賣相，呢個刺身盛合亦都擺得好靚，啲刺身唔單止睇落色澤亮麗，入口鮮甜，食得出喺新鮮靚貨，絕無欺場。

手工鮮果燒酎特飲 $58

居酒屋向來提供好多酒類飲品，不過，唔太飲得酒嘅客人，可以揀呢款特飲，且有多款口味，老表就試咗荔枝味，店員話確喺用鮮果釀製，老表試完就話真喺有陣陣荔枝清香，又飲到有燒灼嗰份酒精感，確喺幾獨特。

Sawa 日本果汁汽酒 $58
除咗以上特飲，唔太飲得酒嘅朋友亦可以試下呢款果汁汽酒，一共有4款口味，小弟就揀咗青森蘋果，入口好清爽，陣陣蘋果清香，卻又有份飲汽酒嘅感覺，真喺得意。

蒜香金菇黑豚 $32、寶島水蓮黑豚 $32、明太子雞肉串 $38、鹽燒鵪鶉腿 $48、荔枝雞皮 $32

一口氣點咗5款串燒，部分更喺季節性串燒，一送上枱香氣撲鼻，趁熱食特別滋味。整體嚟講，燒得香口，味道又各有特色，而部分配搭真喺幾特別，一口串燒，一啖果汁汽酒，爽呀，夠晒過癮。

紅棗杞子蟲草花黑豚 $45
再追加多兩串黑豚串燒，不過，呢款就真喺幾有賣點，配搭好有中國風，因為當中捲住紅棗、杞子、蟲草花，然而，食落味道又幾夾，加上黑豚燒得有焦香，又滲出油油脂香。

火灸壽司成盛合六件 $98

墊吓肚點都要食吓壽司，呢個唔似得刺身盛合有得揀，反而似盲盒，等師傅發辦，好似今次呢碟就有鰻魚、左口魚、三文、牡丹蝦、松葉蟹棒、鵝肝，全部火灸過，自然外層有份焦香感，而左口魚、鵝肝及鰻魚，燒過後就更油香，牡丹蝦加埋啲蟹籽就更鮮甜富口感，蟹棒加咗啲芝士就更濃香。

辛味噌牛筋肉鍋 $168

最後分享喺鍋物嘅牛筋肉鍋，依家天寒地凍，臨尾食番鍋物就最好不過，而份鍋物好有睇頭，大大鍋堆滿晒多種食物，非常豐富。事實上，啲牛筋肉真喺堅軟腍，咬落十分鬆化，又富肉香，鍋內又有多款野菜，夠健康，底下仲有大量粗粉絲，嗦晒汁，食罷叫人大滿足。

就算平日晚都咁旺場，就知店家經營有道。而今餐真唔錯，試到多款唔同類型嘅菜式，加上環境有氣氛，招呼又好，非常稱心嘅一餐。

個人評分
味道：9/10
環境：9/10
服務：9/10
抵食：9/10
平均每人消費：HK$400

餐廳資料：
瀛燒居酒屋
地址：荃灣享和街5-7號香城大厦地下1號舖
電話：5792 7072 (WhatsApp)