地址標示「海灣街」，其實要轉個彎入「海堤街」先喺。入夜嘅鋪面掛着霓虹燈，都有少少嗰時去到檳城「新關仔角」嘅海鮮檔。入到鋪內，就完全唔同晒，好有藍天白雲，對住一片海洋之感，幻想吓，都有幾分晌海灘嘅風情，悠閒輕鬆。
雖然話賣馬拉菜，但翻一翻餐牌，就會發覺菜式加入其他菜系元素，由特色小食、沙律、主食、飯品、粉麵……到意大利麵、薄餅、甜品都一應俱全，種類繁多。
不過，講抵食，店家嘅晚市二人套餐應該喺最划算，因為起錶價$338就包咗前菜沙律、小食拼盤、2客主食、2客飲品及甜品，但溫提一下，部份菜式需要另外加錢。而且，小食、主食都選擇多多，彈性大。所以，我哋都喺揀食個二人餐。
順便講講埋啲飲品，基本就分為非酒精及酒精類，前者有唔少馬來西亞特飲，而後者唔止得啤酒，仲有手工啤、紅白餐酒。
前菜沙律 以為套餐嘅沙律，都喺一般般嘅田園沙律，原來除沙律菜、青瓜、車厘茄之外，仲加咗啲大樹菠蘿同酸瓜，加添少少馬拉元素，簡簡單單嘅前菜，食起嚟清爽，起到開胃作用。
小食拼盤 可以晌8款小食中任揀3款，我哋就揀咗馬來西亞雞髀肉串、參巴水牛城雞鎚、馬拉盞一口蝦多士。馬來串燒就主打一定揀，其餘兩款用上馬拉常用嘅醬料參巴同馬拉盞，亦喺揀佢哋嘅原因。
馬來西亞雞髀肉串用上脾肉，自不然相對更嫩滑，而且，燒得有份焦脆口感，又富肉汁，唔會「乾崢崢」。最正喺面面淋上大量自家製馬來沙嗲，又香又濃，充滿花生粒粒，令雞肉食味更具層次。
附有一小碟黑黑沉沉嘅參巴醬，就喺用嚟配雞鎚，叫得水牛城，就喺表示辣嘢嚟，果然，個參巴醬真喺幾有辣勁，但就惹味十足，而且，辣得嚟富香料感。
另外仲有一小碟自家製甜酸醬，用嚟襯一口蝦多士，睇起嚟啲蝦多士好深色，因為加咗馬拉盞，類似我哋嘅蝦醬，所以，啲蝦多士既炸得脆而不膩，又滲出鹹香味，沾上甜酸醬，有平衡之效。
辣味參巴魷魚配椰漿飯 其實，想試個生炸脾，可是小食已有兩道雞菜式，加上覺得炸脾「些牙」比較麻煩，但又想試椰漿飯，故此就揀咗呢一道辣味參巴魷魚配椰漿飯，淡綠嘅椰漿飯，加埋多種配菜，雞蛋、魚乾、花生，賣相精緻靚仔。
先試一口飯，飯身偏軟，但帶有淡淡椰香，配點參巴醬喺一種味道，夾上魚乾又喺另一種味道，點襯法悉隨尊便，總之，都喺好食。
而啲魷魚好新鮮，入口就知唔喺雪藏貨，而且，口感好柔軟，沾上參巴醬，提升惹味感，越食越滋味。
濃香喇沙煙肉長通粉 另一道想試喺呢個「意」、「馬」融和嘅長通粉，本身已經幾鍾意食喇沙，一向亦喜歡意大利麵，呢道長通就啱晒我。佢以卡邦尼為基礎，卻唔喺白汁，改用上喇沙汁，再淋上蛋漿撈勻，感覺非常特別又有趣。
先試一口未撈蛋漿嘅，喇沙嘅香味好濃郁，仲有悠長嘅蝦鮮味，長通煮得又夠咬口，煮得啱啱好；之後，再撈上蛋漿，其實蛋味就唔喺話好出，不過，感覺就多添咗一份滑溜感，整體感覺確喺有啲驚喜。
檳榔島敍雜果賓治 平常就會試吓白咖啡，因為喺當地特色，但因為都知道啲參巴醬會幾辣，所以，最後改選雜果賓治嚟解解辣。呢杯做得有誠意，因為食得出都喺新鮮生果整成，有菠蘿、橙肉、蘋果、提子……等等，味道滑甜，入口陣陣清爽。
班蘭龍眼冰 友人就選龍眼冰，晶瑩剔透嘅糖水，滲出淡淡嘅班蘭清甜味，純香自然，而龍眼肉都有唔少，食得出啲龍眼唔喺罐頭貨，有種純甜嘅味道，同樣入口涼透心。
焦香榴槤芝士蛋糕 +$28 同老友都喺鍾意食榴槤之人，所以，甜品點都要試試店家嘅榴槤芝士蛋糕。所謂焦香，做法就如早前大熱嘅巴斯克芝士蛋糕，將面面焗得燶啲而帶出焦香感，而糕身做得軟熟而挺身，口感綿密，有芝士嘅鹹香味，亦有榴槤嘅芳香味，怕你嫌唔夠榴槤香，晌蛋糕面仲唧多幾行榴槤蓉，真喺滿足晒啦。
今餐真喺豐富，試到好多嘢之餘，樣樣都有亮點，又富馬拉特色，最緊要價錢又唔喺貴吖嘛，仲食到好飽，個二人餐性價比真高，加上招呼好，同老友都食得好稱心滿足。
個人評分
味道：9/10
環境：8/10
服務：8/10
抵食：9/10
平均每人消費：HK$200
味道：9/10
環境：8/10
服務：8/10
抵食：9/10
平均每人消費：HK$200
餐廳資料：
檳榔島敍 Penang Toujours
地址：鰂魚涌海灣街2號濱海大廈地下D-1號舖
電話：9329 8261
檳榔島敍 Penang Toujours
地址：鰂魚涌海灣街2號濱海大廈地下D-1號舖
電話：9329 8261
沒有留言:
發佈留言