唔可以經大廈嘅電梯進入餐廳，而需要行上少少經樓梯入去，當一入去，地下其實喺廚房嚟，樓上先喺用餐區。
經過隱蔽嘅樓梯，上到二樓，又喺別有一番景像，地方闊落，樓底又高，加上多落地玻璃，採光十足，予人感覺開揚。不過，眼見店員需幾食物由地下送上上層，都真喺辛苦晒佢哋。
由於餐廳以恐龍為主題，所以，佈置上猶如一個小森林，放有好多植物，當然，跟恐龍相關嘅擺設、彩繪就少不了啦。
食物方面，有個季節限定午餐，賣點喺日本豐州直送嘅刺身。而另一個喺恆常嘅基本午餐，選項唔算多，共7款，定價由$129-$308，已附有伴菜及冷泡茶。此外，可加配吉列池魚、咖啡及特飲。同學就對準銀鱈魚，小弟就一心喺腐皮壽司。
銀鱈魚西京燒伴和風沙律定食 $164 整份定食嘅擺盤都好靚，而銀鱈魚亦燒得好吸引，又好大件，伴有好多沙律菜，同學講笑咁講，喺欠咗碗麵豉湯啫。講番個主角銀鱈魚，肉質細緻嫩滑，極富油香，魚皮更燒得脆口，再以清爽嘅沙律菜、清甜嘅橙肉平衡吓啲油脂，咁嘅組合真喺幾夾。
腐皮御饍 + 迷你吞拿魚腩茸卷 $178見好多客人都有揀呢個招牌名物，分組合A / B，其實壽司款式大同小異，小弟就選咗B，分別有5件腐皮壽司：蟹膏三文魚籽、炙燒北寄貝沙律、柚子左口魚、蔥吞拿魚拖羅蓉及芝士蟹籽厚燒玉子，再加埋吞拿魚腩茸卷 ，每款都滿滿餡料，食晒其實喺會幾飽吓。
先分享兩款伴菜，喺招牌嘅甜腐皮同昆布，前者甜甜哋，柔軟得嚟有少少韌性嘅口感，後者有微微醋酸香，帶點點清爽感，作為前菜清新一吓。
蟹膏三文魚籽腐皮壽司 唔喺講笑，蟹膏又多，三文魚籽又多，前者柔滑豐腴，後者鹹鮮爆汁。由於腐皮包住幾多飯，所以，都要分兩啖先食得晒。
炙燒北寄貝沙律腐皮壽司 唔喺平常見開貝尾紅紅哋嗰啲，喺啲新鮮貨色，所以，入口嚐到嗰份鮮味，而唧上沙律醬，再炙燒，多咗一份酸爽感。
柚子左口魚腐皮壽司 左口魚炙燒過，自不然更油潤，但巧妙加上少少酸活嘅柚子汁，平衡一下嗰份油膩感，所以，食起嚟就更平衡，加上魚鮮味，正呀喂。
蔥吞拿魚拖羅蓉腐皮壽司 睇見啲吞拿魚，色澤鮮紅，喺新鮮嘅證明，肉質爽口，味道鮮甜，而下面嘅拖羅蓉非常綿滑，帶點點油脂香味，夾甜甜哋嘅腐皮，唔錯！唔錯！
芝士蟹籽厚燒玉子腐皮壽司 呢款看似無咩特別，用料普通，其實，一樣好食，厚燒玉子做得滑溜，又甚具蛋香，加埋芝士、蟹籽，味道豐富而有層次。
迷你吞拿魚腩茸卷 最後試埋個吞拿魚腩茸卷，相對啲腐皮壽司，呢個就無咩驚喜，亦無咩特別，但質素仍叫穩打穩紮，啲吞拿魚腩茸刴得綿密柔滑，佢哋嘅飯亦煮得恰到好處，紫菜亦夠脆口。
整體招呼亦唔錯，如果安排到埋邊卡位自成一角，唔使同其他客人「搭枱」就更好，因為太近距離，真喺唔想聽到人哋交談都唔得，哈哈。
個人評分
味道：8/10
環境：7/10
服務：8/10
抵食：7/10
平均每人消費：HK$190
味道：8/10
環境：7/10
服務：8/10
抵食：7/10
平均每人消費：HK$190
餐廳資料：
為食龍 Hungry Dino
地址：中環些利街2-4號LL Tower地舖及1樓
電話：92327623 (whatsapp)
為食龍 Hungry Dino
地址：中環些利街2-4號LL Tower地舖及1樓
電話：92327623 (whatsapp)
沒有留言:
發佈留言