一邊有落地大玻璃趟門，對出喺個偌大嘅露台，不過，目測就無設任何座位，唔知遲啲天氣涼啲嘅時候，會唔會有戶外座呢？
由於餐廳定位喺居酒屋，所以，翻一翻餐牌，就見菜式種類繁多，由沙律、佐酒小食、刺身、壽司、卷物、串燒、鐵板燒、食事……到甜品，都一應俱全。
此外，牆上仲掛有兩塊大黑板，都喺一啲推介有兩組嘢：味之選（特色菜）及每日之選（時令刺身），預算較鬆嘅客人可以不妨將選擇重點放晌度。
如果唔想煩嘅客人，又無特別偏好，套餐就喺上佳之選，呢個二人前套餐包晒多款前菜、刺身、壽司、燒物、串燒、湯、甜品及飲品，定價$1,388。
既然定位為居酒屋，各式各樣嘅日本酒類當然唔少得，不過，小弟唔嗜酒，就無認真影個餐牌，見諒。
炸單骨雞翼 我哋試咗個加強版嘅刺身壽司天梯，並奉送一客炸雞翼及炒烏冬。先嚟一客炸雞翼，由於喺單雞，比起原隻易食啲，而新鮮熱焫焫炸起，加上炸功了得，食落外皮香脆不膩，半點油膩感都為無；而裡面肉質非常嫩滑，佐酒就真喺一流。
刺身壽司天梯 $888 「天梯」登場，一層層咁，賣相吸引，絕對喺打卡感十足。刺身有5款，壽司又有5款，每款兩件，擺明喺二人享用，份量上果然好有睇頭，雖然店員都有講解一下享用次序，由淡至濃，不過，我哋就無跟足，都喺按個人喜好。
深海池魚 先試試深海池魚，連皮切喺表現出光澤亮麗，魚肉晶瑩而色澤帶淡粉紅，足見其新鮮度，魚質嫩得嚟帶點點爽口感，魚鮮味頗突出。
油甘魚 油甘魚喺刺身、壽司嘅常客，同樣不單色澤光亮，唔會暗暗啞啞，喺新鮮度嘅明證，而且，切得厚薄均一，入口魚味足，又柔嫩，口感帶少許爽。
劍魚腩呢款刺身印象中好似喺第一次食，就算唔喺第一次，以往都非常之少食，咁獨特嘅外觀無乜理由無印象囉。入口魚味唔濃，但質感爽爽哋，又脆脆哋，非常得意，並且充滿油香。
花之戀 香港人好鍾意食三文魚，無深究花之戀由邊個，幾時創作出嚟，但深受港人歡迎。三文魚嘅油潤，夾蟹籽嘅卜卜脆，令花之戀成為一種特色。
火炙芝士帆立貝壽司 件帆立貝本身已幾有質素，堅大粒，色澤晶瑩，入口真喺嚐得出其鮮甜味；加上一小片芝士，經火炙燒一燒，變得溶溶哋，襯以蟹籽，賣相靚仔，味道就變得更豐富。
鰻魚壽司 平常食鰻魚我都喺以定食多，單食鰻魚壽司就比較少，用咗醬油漬，故味道較好濃郁，充滿油香得嚟唔會好油膩，肉質又有種入口即化嘅感覺，而飯粒揑得唔鬆散，卻又唔會「實崩崩」。
火炙魷魚壽司 啲魷魚鎅晒花，又輕輕火炙過，賣相自不然好睇好多。入口魷魚質感非常之柔嫩，唔會咬極都咬唔開，好似擦紙膠咁樣。
蟹肉蟹膏壽司 小弟一向都頗喜歡唔使自己動手拆蟹嘅菜式，呢款「軍艦」一定討小弟歡心啦，因為唔使拆蟹，就有大大撮蟹肉，加埋蟹膏、蟹籽，真喺大滿足，入口蟹肉鮮，蟹膏豐腴，蟹籽卜卜脆，一口就有多重味道，多重口感。
日本赤牡丹蝦 試完晒啲壽司，再回頭試番隻赤牡丹蝦，呎吋大，其外觀色澤晶瑩而光亮，可謂顏值高。一啖入口，黏黏咃嘅感覺，卻又帶有少少爽身嘅口感，鮮甜味盡出。
兵庫縣生蠔 雖然講到食蠔啲人成日講法國蠔、美國蠔、澳洲蠔，其實，日本蠔一啲都唔輸蝕。今次呢隻都好高質，睇落肥美，師傅更切埋柱位，方便食用。咬落肉質帶爽，有少少脆身，面頭加咗少少酸香嘅醋啫喱，更吊出濃郁嘅蠔味濃，而海水味唔算太重，整體嚟講好鮮美。
絆之炒烏冬 最後來一大碟烏冬墊肚，飽晒啦。以店名為之嘅炒烏冬，雖然稱唔上有咩驚喜，但功夫紮實，除咗料多，有大量豚肉、椰菜絲、甘筍絲，啲烏冬口感滑溜，每一炷都掛滿汁，色澤均勻，香濃惹味卻唔油膩，唔錯！唔錯！
如果想有輕鬆無拘束嘅氣氛嘆吓日本嘢，呢度都喺個唔錯嘅選擇，而且，招呼亦幾好。
個人評分
味道：8/10
環境：8/10
服務：8/10
抵食：8/10
平均每人消費：HK$490
味道：8/10
環境：8/10
服務：8/10
抵食：8/10
平均每人消費：HK$490
餐廳資料：
絆 Kizuna
地址：尖沙咀漆咸道南53-55號嘉芙中心4樓
電話：9309 1686
絆 Kizuna
地址：尖沙咀漆咸道南53-55號嘉芙中心4樓
電話：9309 1686
沒有留言:
發佈留言