果酪道中 Gwo Lok Rd.C：「酪」在其中

早前睇過食友一篇食文，介紹呢一間主打果酪（鮮打生果+希臘乳酪）嘅小店，我都有少少興趣，不過，為一杯嘢飲，小弟又唔太想專登走過嚟。機會卒之嚟喇，今日就趁收工要過嚟上環攞番件快遞包果，就試一試友人推介嘅「完熟芒果奶奶」。

嚟到見眼望望嘅人多，但真喺幫襯嘅人就少，所以，除咗好快有得拎之外，慢慢影吓相都唔怕騷擾到人。講真，由鋪面到裡面，一睇就知店內嘅裝修確喺花咗唔少心思，帶點文青風，又有啲田園風，總之，就好有打卡度。

收銀旁嘅凍櫃放滿各式各樣嘅新鮮生果，仲有一桶桶大裝嘅希臘乳酪，貨真價實。

而再入少少製作飲品嘅廚房區，都好乾淨企理，尤其生果類呀、乳酪類呀、凍飲呀，都易變壞，所以，衛生好重要！

飲品嘅選擇方面，牆身一塊價錢牌就睇晒，其實類別又有幾多喎，果酪系列啦、鮮奶茶系列啦、冰搖果茶系列啦、芝士奶蓋系列啦、鮮果奶系列啦、純茶系列啦，而每一類別嘅口味亦多，價錢上跟大多數茶飲店差唔多。

完熟芒果奶奶 $38

芒果類飲品、甜品，一向都有少少偏愛，所以，睇見食友介紹得咁好先想試試。睇到杯嘢嘅色澤，一片鮮黃色，感覺已好對辦，啲芒果果然完熟，啜一啖芒果味真喺好澎湃咁湧出，非常香濃卻十分清甜，跟鮮牛奶混合，口感細滑，果香仍然十足，正呀喂！

今次試咗款心水先，下次有機會再試果酪。

個人評分
味道：9/10
環境：7/10
服務：8/10
抵食：8/10
平均每人消費：HK$38

餐廳資料：
果酪道中 Gwo Lok Rd.C
地址：上環德輔道中308-320號富衛金融中心地下7號舖
電話：6025 8888