多彩皇宮 Wonder Land Seafood Restaurant：家族飯堂

自從老爸過身，都甚少過番嚟石硤尾食飯，最近阿妹生日，費事佢哋專登走嚟走去，所以，就番佢哋索性晒我同老婆過嚟到「多彩皇宮」食餐便飯。呢間嘢真喺屹立咗好多年，都算算哋喺家族飯堂，其實啲嘢無話好好食，純粹地方大，好坐，就腳而已。

就算防疫放寬咗，但始終每日確診人數都仲叫好多，所以，唔訂枱都大把位。我哋嚟得早，地下大堂可以任坐呀，上層二樓就唔知多唔多人嘞。就算之後開始有客嚟，成晚計，都喺七、八乘入座率，講緊喺星期日晚市喎，算喺算靜。

呢類屋邨酒家，菜式嚟嚟去去都喺嗰啲，但都勝在喺多選擇。而較吸引味咪喺啲乜寶物寶，而呢度有晚飯6寶，問過喇，喺可以同時叫晒，不過，唔喺樣樣都啱食，最後就只揀其中2款。

順帶一帶，飲茶就特別多額外小費，餐前啲花生$13兜、茗茶又$12位，最搞嘢，一向10%服務費就預咗，但呢度就喺收12%，唔喺話好多，但俾客觀感唔多好啫。

蝦片脆皮燒雞 $68
呢個喺6寶之一，睇落色澤炸得金黃，個外皮堅脆，香口而不膩，雞肉亦比預期中嫩滑，的確好食，沾上淮鹽，或點啲喼汁，各有風味，斬得俐落無咬到碎骨。半隻，轉眼就被我哋消滅晒。

菠蘿咕嚕肉 $98
生炒骨、咕嚕肉喺細妹心水，通常都會叫番碟，加上餸飯就最好。個咕嚕肉賣相唔錯，大大碟，加埋菠蘿、彩椒，賣相幾靚仔。醬汁校得酸甜開胃，啱啱好掛汁，無多餘嘅，又唔嗆喉，啲肉排大大嚿好鬆化，粉漿又唔過厚，有水準。

清蒸游水龍躉仔 $105
餐牌標明1斤重左右，睇樣就幾敢肯定1斤有多，食新鮮魚清煎就最好不過啦，最啱就喺落埋唔少蔥絲。條魚蒸得火喉啱啱好，肉質嫩滑，又有魚鮮味。魚靚，清蒸就特別好食。

啫啫通菜煲 $85
唔使多講，叫番碟菜喺必然選項，平衡番食咗咁多肉，而啫啫煲就夠晒惹味。呢度仲做得夠誠意，用類似石頭鍋飯嘅石鍋嚟做，上枱時啲熱氣繼續逼啲蝦醬味出嚟，混埋啲蒜香，香氣四溢，內裡仲有唔少蝦乾，食味一洗。

一家人，簡單食餐飯，閒談家常，就算無咩大魚大肉，只喺小炒幾道，一樣食得開心愉快。

個人評分
味道：8/10
環境：7/10
服務：8/10
抵食：9/10
平均每人消費：HK$120

餐廳資料：
多彩皇宮 Wonder Land Seafood Restaurant
石硤尾南昌街美彩樓地下
2778 0622