Cali Mex Bar & Grill：「墨」默耕耘

睇見家下嘅市道好不景氣，不過，疫下風潮都唔應該太過周圍去，盡量減少外出，所以，平衡一下，一星期都會有一、兩次食吓外賣，撐吓啲食肆。而今次，收工後，就晌公司嗰頭嘅墨西哥餐廳「Cali Mex」買外賣。正正2020年初，疫情前就幫襯過佢哋嘅尖沙咀店，當時用餐嘅感覺幾唔錯，印象幾好，食物又頗有特色。

咪睇門面細細，其實，個鋪位都幾深，一室白磚牆，裝修又幾骨子，環境夠光猛整潔，雖然唔喺點帶有墨西哥色彩，但摩登又有氣氛，只可惜未能堂食。

主餐牌就一大張睇晒，選擇非常之多，有前菜、小食、經典嘅墨西哥美食；此外，更有漢堡、美國牛扒、多款主菜……等等。

最後，揀咗一款前菜，兩款墨西哥美食，再搭一客主菜，大概等上20min，行個圈返嚟就有，裝起一大袋，包裝得整整齊齊。

返到屋企，「晒冷」擺晒啲食物出嚟，陣容非常鼎盛，而不得不讚一讚，食物除包得穩穩陣陣之外，熱食嘅仲會包多層錫紙嚟保溫，此外，食物盒（除啲醬汁）都用上較環境嘅可分解紙盒。

Spinach and Artichoke Dip（菠菜拼亞枝竹配粟米片） $98

呢一款焗菠菜拼亞枝竹就啱晒我老婆食，一來喺全素，二來加埋大量巴馬臣芝士，合晒佢口味。睇落真喺幾正，焗得表面啲芝士一片金黃，又帶少少焦香，而裡面嘅菠菜及亞枝竹就焗到一身軟腍，沾滿晒白汁同芝士，入口既軟滑，又好香濃，的確好食。本身伴有粟米片，可以佐食，不過，啲粟米片我哋就用嚟點其他醬嚟食。

Corn Chips served with Guacamole, Salsa, Sour Cream（粟米片伴牛油果醬、蕃茄莎莎醬及酸忌廉）

當點任何經典嘅墨西哥菜式，都會附送粟米片、牛油果醬、蕃茄莎莎醬、青辣椒醬及酸忌廉。店家俾咗成一大包粟米片，啲醬汁亦好充足，雖然粟米片拎到返去仲脆，不過，焗一焗先再食，更香口，老婆就最心水配牛油果醬，而酸忌廉喺小弟嘅「飛弗」，因為俾咗成兩兜酸忌廉，所以，剩番一兜第二朝仲可以嚟搽多士食，正呀喂！

Tacos with Grilled Chicken（烤雞肉墨西哥夾餅） $138

墨西哥夾餅確喺幾經典嘅菜式，一客有3件，而夾餅皮可以選軟身（soft flour）或脆身（crispy corn），而配料有10款選擇，有肉類，有魚類，亦有素食類嘅。小弟揀咗脆身，其實，如果喺外賣拎走食，選軟身會好啲，因為拎到返去，選脆身會打咗折扣，變得無咁脆。不過，啲夾餅勝在料多，烤雞肉、蕃茄粒、洋蔥、生菜、芝士碎，件件都好夠份量，口感非常之豐富，味道多元化，食一件都已經幾有飽肚感。

Quesadillas with Impossible Original Beef（未來牛肉墨西哥薄餅 - 半份）$138

上次就喺食過墨西哥薄餅，覺我好正，所以，今次就翻炒。半份等於有4件，因為外賣關係，就疊起晒，無平放半個圓形咁好睇，但返到去仲喺暖暖哋。薄薄的薄餅皮好軟熟，而裡面塞滿免治牛肉餡，又放有芝士，雖然喺植物牛肉，口感幾像真，有「肉」汁，又惹味，掂喎。

BBQ Baby Back Rib（美式醬燒豬肋骨） $288

打開個盒，啲特製BBQ醬汁冚過晒成條豬肋骨，即時傳出陣陣香氣，切成一件件再睇，啲豬肋骨燒得靚仔，其實落刀嗰一下，已知啲肉質非常軟腍，一口咬落去，真喺好鬆化，充滿肉香，又醃得極之入味，配以經典嘅美式BBQ醬，酸酸甜甜得嚟帶點煙燻香氣，夠晒惹味。而燒豬肋骨仲附有椰菜絲沙律，撈勻沙律醬汁嘅椰菜絲，酸香清新，剛好一口肉，一啖椰菜絲，清清味蕾又可以去一去油膩感，絕配啦。

今回再試「Cali Mex」嘅出品，雖然喺外賣，但喺水準保持，無失望，定價亦合理，可謂一家默默耕耘嘅餐廳。就算唔喺因為疫情要外賣，將來搞吓聚會時，叫番三幾款食物都喺一個幾上算嘅選擇。事後上番去睇睇人哋啲食評同IG，原來向職員展示優惠碼「CHURROS999」，可以免費享用一份「西班牙油炸鬼」（Churros）架，走寶添。

個人評分
味道：9/10
環境：7/10
服務：8/10
抵食：8/10
平均每人消費：HK$166

餐廳資料：
Cali Mex Bar & Grill
中環荷李活道26號地舖
電話：Nil