晌門口已經展示咗好多餐牌，真喺估唔到款式咁包羅萬有，唔喺普通一家西餐廳咁簡單，以地區而言，中、西、日、韓、星馬、意大利、美國菜、德國菜……都有，而以菜式而言，沙律、全日早餐、焗飯、薄餅、乳酪咖喱、意大利飯麵、主菜、扒類、叻沙、漢堡、牛角酥、小食、甜品……一應俱全，非常多元化，定價亦親民，絕對有條件成為街坊飯堂。
此外，亦有多款中式小炒嘅家常便飯套餐，款款賣$68，配珍珠白飯及熱飲，晌等候期間，亦確喺有唔少人幫襯。
當然，除小炒，仲有多款是日精選及豪少少嘅行政套餐，第時方便堂食嘅話，都真喺想試試呢一款行政套餐。
順帶一提，餐廳仲兼零售埋件裝蛋糕及麵包，晌收銀櫃旁就見到凍櫃內仲有多款件裝蛋糕，而對開另一邊嘅麵包架就仍有數款都包。
最後，買咗一客焗飯及一個薄飯，每款都包飲品，仲可以加錢配其他特飲，以及配埋是日餐湯及沙律，而外賣仲有俾個9折你。包裝方面做得好整齊，啲嘢食唔會側嚟側去，飲品更絕不會好易倒瀉晒。
意式蕃茄焗雞扒飯 $65 焗豬食得多，都想改改試焗雞扒飯，未打開焗盒，從透明膠蓋已睇到個賣相非常之得，滿滿嘅芝士焗到金黃焦香，而拎到返屋企仲喺熱焫焫。啲雞扒煎得好香口，啲雞肉又滑，面頭嘅意式蕃茄濃郁酸活，撈勻啲飯食真喺一流，而個飯底幾特別，因為一般炒飯底已好好，佢哋仲加咗唔少蔬菜落去炒，如椰菜花、翠玉瓜，健康好食。
煙三文魚牛油果醬薄餅 $88我哋都好似好耐無食薄餅，而睇見呢一款有煙三文魚同牛油果嘅組合，一來啱晒老婆，二來又喺店家嘅推介菜式，所以，就試試佢。打開真喺好有驚喜，批面堆得滿滿食材，仲唔單喺得煙三文魚同牛油果，仲加入好多野菌同木魚碎，味道更豐富，煙三文魚睇得出喺後加，即喺無焗過，所以，保持幼滑並富油香；，而且，初時睇菜名會以為得薄薄一層牛油果醬，點知有唔少牛油果粒粒，再加埋豐厚嘅水牛芝士，真喺好食又有驚喜。
熱咖啡、低糖綠茶餐飲就無特別加錢轉咩特飲，都喺揀番啲基本，不過，咖啡飲得出喺啲即磨咖啡嘅貨色，相信啲豆都喺靚嘢，出嚟嘅咖啡好醇香；而低糖綠茶亦唔錯，果真喺少甜，茶味亦頗芳香。
由於個薄餅好真材實料，份量十足，所以，食剩半個留番第二朝早餐，翻熱食番，一樣滋味。整體兩款食物都好有水準，而且，個薄餅確喺平靚正，下次再嚟，反而想嚟食下午茶，見佢晌櫥窗貼出咗有一款蔥花鹹牛肉炒蛋菠蘿包，喺小弟最感興趣嘅選擇。
個人評分
味道：9/10
環境：8/10
服務：8/10
抵食：9/10
平均每人消費：HK$70
味道：9/10
環境：8/10
服務：8/10
抵食：9/10
平均每人消費：HK$70
餐廳資料：
Cityfresh Bistro
黃大仙竹園道136號黃大仙中心南館地下高層UG41號舖
2688 0863
Cityfresh Bistro
黃大仙竹園道136號黃大仙中心南館地下高層UG41號舖
2688 0863
沒有留言:
發佈留言