餐牌就晌鋪面上方嘅大屏幕，有三明治、漢堡包、意粉、天魔特選、慢煮料理、小食。飲品方面，除汽水外，見佢哋設有咖啡機，供應多款意式咖啡，以及紅茶、檸茶及泰茶。
韓式炸雞翼 $18 兩個佬，除各自揀一款主食之外，就揀多一客小食試試。一客有3隻都只賣$18，抵讚。啲雞翼都幾大隻吓，最有心思喺沾咗粉漿先去炸，所以，表面仲多咗一層「脆皮」，而配上韓式甜辣醬汁，甜甜辣辣，幾惹味。
XXL韓式三明治 $53 小弟就未食過韓式三明治，所以，揀咗呢款XXL三明治，果然有種加加大碼嘅感覺，拎上手已感覺到嗰份重量。麵包已搽過牛油，並烘得香脆，厚厚嘅三明治裡面夾嘅餡料仲好豐富，有韓國餐肉、生菜、煎蛋、火腿、蕃茄、泡菜、洋蔥、椰菜，果然喺餡料豐富，味覺享受，一大口咬落去味道真喺非常有層次，口感超豐富，食完好有飽肚感。
厚厚豬肋骨 $78 睇餐牌介紹，喺24小時低溫慢煮，再以秘制香濃BBQ醬調味，一客有兩大件豬肋骨，再伴有大量薯蓉，同樣份量十足。啲豬肋骨果然有水準，焗得好焦香，入口熱焫焫，啲肋骨肉一咬就開，鬆化到不得了，又富肉汁，啲秘制BBQ醬香濃又惹味，仲灑咗少少金蒜同香草，就更有畫龍點晴之效；至於啲薯蓉，打得好軟滑，沾上咗啲BBQ醬及豬肋骨滲出嚟嘅油香，就更好食。
朱古力布朗尼 $18最後，追加多一客朱古力布朗尼甜品作結，初時以為賣$18都喺得一件，估唔到一客有兩大條，一人一條唔使再切開嚟分。雖然喺無混入合核嘅版本，但質感做得夠挺身，朱古力味又非常濃郁，襯小弟杯咖啡真喺一流。
拉提咖啡 $30、凍檸茶 $30 呢度啲意式咖啡真喺抵飲，有飲開咖啡嘅朋友都知，一般都要賣到$35、$40一杯，再者，杯拿鐵又真喺算沖泡得唔錯，個拉花雖然未叫做好靚仔、好對稱，但入口個口感好均勻，完全無搞過，飲落咖啡跟奶泡嘅整合度都好一致。而杯凍檸茶，老友就話夠芳香，啲檸檬香好清爽，無澀味。
雖然小店一家，但服務好有心，店員亦好有禮貌，更會跟客人有啲互動交流，此外，食物都食得出心思同誠意，唔喺粗製濫造只賣快餐嘢，兩款主食都有驚喜。
個人評分
味道：9/10
環境：7/10
服務：9/10
抵食：8/10
平均每人消費：HK$110
味道：9/10
環境：7/10
服務：9/10
抵食：8/10
平均每人消費：HK$110
餐廳資料：
天魔 Fusion Food Lab
屯門鄉事會路83號V City地下G05號舖（一田超市內）
天魔 Fusion Food Lab
屯門鄉事會路83號V City地下G05號舖（一田超市內）
電話欠奉
沒有留言:
發佈留言