INN - I’m Not Nothing：寧靜午餐

由於工作關係，今日到訪荔枝角一家長者服務中心，事後都要搵餐晏仔，所以，過嚟工廠區一帶，先兜個圈，等過咗放飯嘅高峰時段。最後，嚟到「億利」嘅「INN - I’m Not Nothing」，一來廠廈啲樓上鋪無咁多人，二來年多前錯到訪過，知道其有番咁上下水準。

無論門口，定室內，裝修得都幾骨子，一室以白為主調，放置咗啲羅馬柱，又擺放唔少植物，掛上細細盞嘅水晶吊燈，整體感覺休閒。加上過咗飯市，成場都喺得一、兩枱客，大家隔開啲坐，自己食得安心多啲。

午餐嘅選擇都唔少，由輕怡嘅到重肉感都有，共10款，定價由$88-$148，包餐湯及餐飲，但餐飲只限選$28以下，轉飲其他嘅，就有半價優惠。此外，亦可以加配選項，如意粉、薯條、法式班戟。

是日餐湯

今日喺南瓜忌廉湯，睇賣相已經好吸引，色澤鮮橙黃色，加上以忌廉拉咗少少花紋，確喺幾賞心悅目。入口熱焫焫，最怕啲餐湯不冷不熱，而且，南瓜味頗突出，口感柔滑，做得相當具水準。

虎蝦肉羅勒蒜辣扁意粉 $98

揀咗一個中價位嘅蒜辣扁意粉，店員好細心，先問我食唔食得辣，因為，呢道意粉都幾有辣勁，不過，佢話可以揀小辣或走辣，最後要咗小辣，辣度恰到好處，有點點辣勁，卻喺點到即止，唔會太嗆，而且，意粉好有咬口，並充滿蒜香；虎蝦雖未喺好珍寶嘅級數，但鮮爽有鮮蝦嘅甜味，去晒殼，方便食用。

鮮奶咖啡 +$19

上次試過佢啲鮮奶咖啡，印象中又喺水準之作，所以，今次都加多少少嘆番杯。拉花本身幾靚仔，雖然線條唔及上次咁幼細，但沖泡出嚟都好醇厚，咖啡嘅香味香濃得嚟帶點果仁香氣，飲得出口感均勻順滑。

有時候，一個人靜靜哋用餐，沉思吓，感覺喺幾唔錯。尤其依家晌疫情下，好多活動都停咗，偶爾食餐好，都算喺為生活添加少少樂趣。

個人評分
味道：8 /10
環境：7 /10
服務：8 /10
抵食：8 /10
平均每人消費：HK$130

餐廳資料：
INN - I’m Not Nothing
荔枝角長沙灣道883號億利工業中心2樓203號舖
2488 0833