Rooot：「Rooot」力小店

上文講過同舊同學行完山，去咗「愉景新城」嘅「Chef's Stage Kitchen」食晏，言談間，原來佢未去過「南豐紗廠 」，而且，佢話幾有興趣睇吓，既然就晌附近，帶佢行一轉，睇睇間紗廠變成點！閒逛完，搵個地方再打打躉，食個下午茶，傾吓偈，見呢一間「Rooot」幾得意，又有啲特色下午茶餐，就坐低試一試。

我諗睇過其他人嘅食評都見，呢間餐廳嘅裝修好特別，周圍都掛上啲布條，色彩繽紛，充滿活力，而且，唔同角落，都放置咗好多植物，有大棵嘅，有小盆嘅，座地嘅又有，掛起嚟嘅又有，猶如小森林咁樣，再者，地方都幾寬敞，仲喺間寵物友善餐廳。

而最入面，仲有一個區間，需除鞋先可以進入，地上放咗好多「咕臣」，仲有啲鼓同結他，原來，一到假日，就有Live Band，大家可以一邊食嘢，一邊聽吓音樂，相信都幾治癒。

提一提，落完單後，俾個傳呼器你等攞嘢，而餐具 、調味料、飲用水及餐紙……等等，全自助，而呢度啲餐具、器皿都喺環保物料做（飲品膠杯除外）。

食物方面，先介紹下午茶餐，價位分$58、$68、$78，包一杯花茶、咖啡或特飲，而選擇都頗有特色。由於無耐前先食完晏，所以，我哋就揀啲輕怡少少嘅嚟過吓口癮。

另外，仲有一款甜品餐牌，好適合下午茶時段享用，不過，就唔喺套餐嚟，亦無加配優惠。由於舊同學未試話咩叫做牛角窩夫，所以，感覺喺唔平，亦點一客俾佢見識吓。

此外，仲有幾張散點嘅餐牌，就影埋出嚟俾大家參考吓。

小食拼盤半份 $78

想「些牙」嘅，揀呢一款小食拼盤就最好不過，可以一次過試到多啲嘢，而拼盤就包括咗港式水牛雞翼、豚肉梅菜馬蹄波、炸地瓜。啲雞翼幾好食喎，炸得甘香，好有辣勁，好彩嗌咗杯凍飲解吓辣；肉丸就頗有特色，混和咗梅菜及馬蹄粒，又打得鬆化，集鹹鮮爽，可以沾上少少自家製咖喱汁伴食，更添風味；至於啲蕃薯條炸得香脆不膩，又夠晒粉甜，好食。

凍西柚紅茶（跟餐）
午餐飲咗杯咖啡，所以，下午茶就揀杯西柚紅茶，個茶底都幾香，配西柚，都幾爽，唔使次次都檸茶嘛。

雪糕牛角窩夫 $68

上過月曾食過一次牛角窩夫，亦知呢樣嘢晌香港都出現咗一段日子，先晌韓國大熱，再傳嚟香港，直接將牛角酥放入窩夫機製成窩夫。賣相就單薄少少，幸好，件窩夫都做得外層酥脆，食落多咗一份牛角包嘅牛油酥香，而雪糕球唔喺雲呢嗱，而喺荔枝口味，更加啱晒小弟。

青檸接骨木花梳打 $48

又喺好奇心驅使下，同學就揀咗杯接骨木花梳打，其實，接骨木花無乜味，但梳打配青檸，感覺就好清爽，但喺，佢話個青檸好難篤，浮嚟浮去，哈哈！

溫馨提示一下，晌度食完嘢，就需要自行收搭餐具、托盤等等，去到回收站，亦要幫忙分類，為環保，多行一步絕無問題啦。

好悠閒嘅一日，行吓山，食吓嘢，最搞笑舊同學話好似大鄉里出城，好多嘢今日都喺第一次去，第一次試！

個人評分
味道：8/10
環境：8/10
服務：8/10
抵食：7/10
平均每人消費：HK$97

餐廳資料：
Rooot
荃灣白田壩街41號南豐紗廠119號舖
6266 6706