大家樂 Café de Coral：「翼」來順受

晌屋企附近呢一家「大家樂」最常嚟嘅時間喺星期六嚟食早餐，下午茶就相對少。同朋友行完山，本身就食過下午茶，老婆就即興話都想食番個下午茶，所以，返到嚟美孚時幫佢上「大家樂」睇睇。

其實，大家樂嘅下午茶餐都有幾多選擇，影完下午茶嘅選擇俾佢，佢就一眼睇中啲雞翼茶餐，原因喺標明用咗麥蘆卡蜜糖，立時好似高級咗好多，加上佢都幾鍾意食燒雞翼。

特色雞翼、豉油皇炒麵 $29

結果，佢就揀咗雞翼配炒麵，杯熱奶茶就醒我嘅。隻雞全翼都幾夠大隻，燒得又幾香喎，試我就無試喇，都喺老婆獨享，佢就話香口好食，確喺有陣陣蜜糖香，而炒麵我就黐咗幾啖試試，亦算喺唔錯，有豉油香味，唔喺好油，都算爽身，無話黐埋一嚿嚿，整體嚟講，佢就話好啱食。熱奶茶沖得都有一手，雖未及茶記嘅好，至少茶底夠芳香。

嚟快餐店食嘢有樣好，就喺無論早、午、茶、晚市，不時都有啲新嘢，如果落茶記食下午茶，通常嚟嚟去去都喺嗰三幾款咁囉！

個人評分
味道：7/10
環境：7/10
服務：7/10
抵食：8/10
平均每人消費：HK$29

餐廳資料：
大家樂 Café de Coral
美孚美孚新村萬事達廣場1樓N95(B)
2785 5821