龍泉冰廳 Dragon Spring Cafe：選擇齊「泉」

今次過到嚟銅鑼灣攞嘢，回程路經蘭芳道撞見呢間「龍泉冰廳」，見喺門口企咗唔少人等外賣，心諗應該夠穩陣，所以，今次就外賣晚餐返去食，一支公快閃外賣晚飯，乾手淨腳嘛！

門口就好多人喇，但因為禁晚市堂食，入到去落單就當然成個埸空盪盪無客啦，環境就一如大多數茶記格局，卡位搭啲細枱，一室以木系為主，夠整潔光猛。

食物嘅選擇非常之多，喺茶記嘅特色，一大本餐牌，印刷都幾精美，款式包羅萬有，如港式、西式、日式、韓式、台式、東南亞、意式……等等，如以食物計，就有意粉、生滾湯飯、肉燥奉麵、小窩米線、炒粉飯麵、鐵板餐、乜餐物餐、小炒套餐……等等，總之選擇齊全，以銅鑼灣區而言，定價亦好合理。小弟就揀咗一款小菜套餐，配熱奶茶。

不得不提，佢哋晌打包食物時，真喺好細心，用多幾卡硬卡紙，幾一兜二兜食物分層擺得穩穩妥妥，絕對唔會打側翻瀉。依家嗌外賣，仲有九折優惠。

招牌蔥油雞（小菜套餐） $78

每款小菜套餐都包咗老火例湯一客、珍珠白飯一碗及基本熱飲一杯，定價$68 / $78，飲品有升級優惠，亦可以額外加配老火例湯，溫提一下，外賣需補多$2作外賣盒之用。是日嘅老火例湯喺合掌瓜煲豬骨，湯味濃郁，都幾夠「老火」，而蔥油雞份量非常多，塞滿一整個食物膠盒，雞皮爽滑，皮下脂肪少，雞肉入口亦非常嫩滑，充滿晒蔥油香味；奶茶都喺茶記嘅好飲，而呢一杯熱奶茶都沖得有水準，茶底夠香、夠醇厚。

簡簡單單又一餐，正所謂好又一餐，唔好又一餐，晌依家嘅疫情下，變得好多嘢都唔喺必然！

個人評分
味道：8/10
環境：7/10
服務：7/10
抵食：8/10
平均每人消費：HK$72

餐廳資料：
龍泉冰廳 Dragon Spring Cafe
銅鑼灣蘭芳道5號地下
2688 2281