椰林閣餐廳 Yeh Lam Kok Restaurant：林危不亂

有啲家居嘢專誠拎俾住晌葵涌嘅表哥，本來送完嘢就算，佢誠意拳拳話一齊食埋飯先走啦，仲話買咗啲團購券，一於一齊落去食，恭敬不如從命，結果，就同佢一家落咗石籬商場嘅「椰林閣」食餐晚飯。

我哋嚟得早，所以，客唔多。地方稱得上乾淨企理啦，至少，唔似啲街坊茶記咁逼逼夾夾，人少少就揀卡位，人多啲嘅，圓枱就最理想。

啲餐牌就攝晌枱邊暗格，枱上亦已經有晒刀叉之類，不過，由於同表哥一家都喜歡各自嗌碟頭飯，加上費事阻住佢哋食，所以，今次就只寫自己嘢。而最簡單就喺正正放晌枱上嘅「廚師精選小菜」套餐，每款小菜都配白飯一碗及是日例湯或熱飲。

淮山咖喱牛腩煲 $72

一向咖喱牛腩都喺配薯仔，而配淮山都喺第一次，感覺得意就試吓佢。估唔到堅喺一整煲喎，所以，份量唔嘢少，而且，咪以為搵好多淮山墊底，着實有唔少牛腩同牛筋。同樣，白飯都灌頂滿滿，多到喺家常嘅兩碗飯啦。

啲淮山入口爽爽哋，又脆脆哋，靠咖喱汁上味，而且，勝在健康有營養；至於牛腩呢，炆得又腍又鬆化，個咖喱汁調得都唔錯，喺較港式嘅做法，無馬拉、印度嗰啲咁富香料層次，但撈飯一樣咁正。

熱奶茶

我就當「椰林閣」喺高檔少少嘅茶記，所以，餐飲就梗喺熱奶茶啦。雖然，杯奶茶稱唔上絲滑，但茶底唔錯，頗有茶香。

雖然普遍「椰林閣」啲食評都幾負面，但喺，單喺小弟呢次嘅經驗都幾唔錯，我哋幾個嘅食物都不俗，唔知喺時間早，人客少，所以，服務都算幾到位，尤其埋單時，可能張團購券印出嚟稍稍懞咗啲，佢哋個電話又掃唔到組QR Code，搞咗好耐，個店員無不耐煩，亦盡力試完再試（因為我哋嘅手機就掃到），臨危不亂，結果用打Bar Code組數字解決咗，佢個態度喺值得一讚。

個人評分

味道：7/10
環境：7/10
服務：8/10
抵食：7/10
平均每人消費：HK$72

餐廳資料：
椰林閣餐廳 Yeh Lam Kok Restaurant
葵涌石籬商場2期1樓111號舖
2429 2051