大自然素食 Gaia Veggie Shop：渾身解素

由於老婆茹素關係（佢又唔喺食全素，只喺避免食紅肉，白肉或海鮮都會食少少），小弟就多咗食素嘅次數。不過，原來身邊都有唔少朋友都喺咁，就算唔喺全素，都不時揀餐飯喺食素嘅。啱啱去完旅行，是夜，就同啲相熟嘅食友嚟到「大自然素食」聚一聚，講吓近況，順便派點小手信嘛！

多年前都幫襯過「大自然素食」嘅荃灣店，感覺唔錯架，不過，尖沙咀似乎就靚好啲，地方闊落啲啲，樓底高啲啲，枱櫈排得疏啲啲，淺木地板襯仿磚牆，地方光猛而整潔，令整體嘅感覺都輕輕鬆鬆。

牆上一大幅池畔金魚，配上一句「隨緣自樂」，喺好有意思嘅一句話。尤其今時今日，港人嘅戾氣特別多，其實，凡事輕省面對，隨緣一下，壓力自然少好多。

主餐牌有兩大本，金色嗰本薄啲，可以講喺日系餐牌，如手卷、壽司、魚生、卷物……等等，仲有啲素嘅和式料理。

另一本綠色嘅，就厚身好多，裡面可以講包羅萬有，由小食、沙律、湯羹、海鮮、雞鴨、豬牛、蔬菜、雲吞、豆腐、粥粉飯麵……到甜品都有，師傅簡直使出渾身解數，所以，你話食素又點會悶呢！

除咗以上兩大餐牌，仲有個「熱門推介」同「 熱門日式推介」，當然，有選擇困難症嘅朋友，就不妨集中晌呢兩版餐牌度揀啲心水菜式。

此外，「志雲大師」都有推介，就喺座枱嘅宣傳牌，4款心水菜式其實晌「熱門推介」餐牌都有列出嚟，但經佢咁講一講，會唔會令你都揀呢幾款菜呢（利申：我唔喺佢「粉絲」）？

餐牌內頁，仲介紹埋佢哋有做到會、飯盒、盆菜、添，真喺估唔到，可以講喺做得積極。

日式雜錦刺生拼盤 $188

其中一位友人本身唔食得魚生，因為賜胃唔受得，不過，素刺身就相對無問題啦，故此來一客大家過過口癮。一客共有6款刺身，每款有4片，仲配埋薑片，兼且擺得靚仔，而啲刺身都做得似模似樣架，有三文魚、吞拿魚、鮑片、油甘魚……等等，不過，口感與味道就似乎無咩分別喇，哈哈！

芫荽麻香黃金糖心皮蛋 $28

晌推介中仲揀多一款冷盤試試，就喺呢碟黃金糖心皮蛋，賣相晶瑩，原來「麻香」喺指花椒嘅麻，並非麻油嘅麻，不過，花椒落得唔多，只喺點到即止，唔會好有麻痹感。

原盅黃耳素翅燉椰皇 $38 / 客

兩道「冷盤」之後，來一客燉湯暖暖胃就最好不過。原盅燉，上枱時非常熱辣，雖然喺素湯，入口味道一啲都唔寡，比預期濃郁、清甜，再者，撈兩撈，着實有好多料，臨尾當然唔好錯過啲椰皇肉啦，不愧「志雲」推介。

法式牛油果焗多士 $17 / 件

食西餐飲湯大多數都配麵包，我哋都一樣，不過襯中湯，卻喺配法包。嘩！原來件法式牛油果焗多士咁大件，仲加上咁多芝士上面，總之兩個人「些牙」一件都夠啦。多士焗得脆身，喺嫌牛油果唔夠多啫，溫提一下，每件賣$17，要最少兩件起。

秘製蜜汁叉燒（配荷葉包4件） $68

以前食素都好鍾意點齋滷味，而呢套秘製蜜汁叉燒配荷葉包喺推介茶之一，唔單話啲叉燒做得似，而口感及味道嘅像真度都極高，唔講都有錯覺以為食緊叉燒哩！將熱辣辣、軟綿綿嘅荷葉包夾住青瓜、素叉燒，的確一流。

招牌雀巢三色骨 $188

熱盤我哋就選上呢道三色骨，貪其一個價，就試到3種唔同味道嘅素排骨，話就話排骨，當然喺無骨啦，都喺啲黃豆做嘅麵根之類。三色分別指配陳皮鹽，士多啤梨醬及沙拉醬，雖然後兩者酸香醒胃，但前者灑下陳皮鹽之類，特別有個性，尤其襯以簡單酥炸，佐酒一流。喂，呢度真喺有素啤酒賣架！

情迷脆豆腐 $38

「蔬菜類」（其實呢度樣樣菜式廣義嚟講都喺蔬菜類，）先選上「志雲」推介嘅情迷脆豆腐，唔知點解加個「情迷」二字，然而，炸得酥脆，香口而不膩，跟甜酸嘅泰式醬汁，更加無半點油膩感。

清炒高麗菜 $78

另一道清炒時蔬今日喺高麗菜，呢個喺台灣嗰邊叫法，查實即喺椰菜，炒得幾爽口，而菜本身確喺好清甜。

即磨腰果露 $48 / 盅

最好以糖水作結，好讓餐飯有個甜蜜嘅結束。腰果露除一盅盅外，亦有一窩咁叫（$108），不過，一盅都夠兩個人共享，而個腰果露打得柔滑，充滿腰果香，正呀！

雖然我哋叫咗唔少菜式，但實在好食，大家都能將所有嘢一「素」而空，唔嘥嘢喺有衣食嘛！此外，服務幾唔錯，餐廳有空間感，讓大家有個稱心嘅晚上。

個人評分
味道：8/10
環境：8/10
服務：8/10
抵食：7/10
平均每人消費：HK$220

餐廳資料：
大自然素食 Gaia Veggie Shop
尖沙咀彌敦道132號美麗華廣場一期2樓212號舖
2376 1186