匠一麵屋 Shoichi Ramen：麵貌一新

無過嚟順寧道探表哥一排，感覺變化好多，多咗唔同類型嘅食肆，尤其日本菜，附近都多咗幾家，佢話以為順寧道好靜，依家就唔同晒，越開越多餐廳。而今晚所揀嘅「匠一麵屋」就喺其中一家，開咗應該三幾個月左右，正正就晌表哥屋企對面，所以，就同佢哋一家落嚟食餐晚飯。

走入店內，猶如大多數拉麵店咁，長形鋪位，一邊喺面壁嘅單人位，另一邊就喺啲4人枱，簡單嘅和風裝修，而牆上就貼有好多拉麵嘅介紹。

用餐期間跟店員吹兩句，先知店家賣嘅喺日本四國高知縣拉麵，主打豚骨湯底及魚介拉麵，後悔無試魚介拉麵。之後，先再發現原來有日本師傅晌廚房做緊菜，而開放式廚房就晌餐廳尾。

其實，餐廳嘅裝飾都有少少蛛絲馬跡讓人知道佢喺賣高知縣嘅拉麵，就喺隻鰹魚先生，只喺初初唔知佢嘅來頭啫。

此外，有啲貼心位順帶講吓，就好似櫈下其實喺啲小櫃桶嚟，讓客人擺吓袋、擺吓背囊，依個設計晌唔少拉麵店都有應用。另一細心位喺懸掛晌天花嘅草蓆，既喺裝飾，又可以擋住啲冷氣直足吹落頭。 

枱上已經放有湯匙、筷子、紙巾及少少調味料，自由取用，唔使下下煩店員嘛。

每張枱都有自己嘅枱號，自己點自己份，而湯分為醬油雞骨湯及豚骨濃湯，拉麵款式就前者有4款，後者有3款，定價由$65-$98，以拉麵而言，都喺大路嘅價錢。此外，其他加加減減嘅選項，去開食拉麵嘅朋友都知點玩法。除拉麵，店家仲有少少飯品、餃子及炸雞供應，反而，飲品就欠缺啲賣點，唔似得出面會有啲白桃梳打、波子汽水嘅日本特色。

特製他他醬唐揚炸雞 $28

平常食拉麵都會見到餃子作配搭，但今次晌度見到炸雞，就不如試試佢。抵喎，$28就有一籃，啱啱好有4大件俾我哋4個試，唔使讓嚟讓去。籃炸雞賣相幾吸引，除雞件炸得金黃，加上特製嘅他他醬，以及灑上少少七味粉，確喺食味有點層次，而雞肉亦比預期嫩滑。

叉燒拉麵 $93

小弟今回揀醬油雞骨湯嘅款式，整碗拉麵嘅賣相幾靚仔，配有兩大塊紫菜及流心蛋，仲伴有青蔥、白蔥、筍乾及木耳。

先呷口湯，有醬油香，但感覺就較豬骨湯清啲，亦無咁漿，而麵條喺幼身直麵，所以唔算好掛湯，但就有一道韌勁。

流心蛋好食，皆因煮到啱啱好，個蛋黃凝香軟綿，甚具蛋香味。其餘嘅配菜，如筍乾、木耳都好食。

至於件叉燒，並唔喺捲起嚟做，而喺橫切嘅豬腩肉，半肥瘦咁，最正喺炙燒過，多添一份焦香之餘，入口鬆化有油香，卻唔覺好膩。

豚骨炙燒叉燒拉麵 $98

表哥揀咗豚骨湯口味，同樣要炙燒叉燒，所以，基本上同我嗰碗晌外觀上差唔多。佢就話個豚骨湯好濃郁，但一樣唔算好漿口，感覺不俗；叉燒燒過之後更富油脂香，質感軟腍鬆化；麵條口感極具咬口，整體而言，確喺碗有水準嘅拉麵。

叉燒炒飯 $38

原來表嫂都打算喺嚟食拉麵，但佢話唔知喺咪晏晝食錯嘢，肚仔有少少唔妥，又為免掃我哋興，就簡單要了一客炒飯。表嫂打趣咁話，好似楊州炒飯喎，但味道幾好，既炒到飯粒分明，又有好多配料，雖然細細碟，都夠晒佢食。

叉燒丼 $38

表姪女就又喺揀飯，因為佢見叉燒丼個名甚好奇，其實，就即喺叉燒飯，唔知將來俾唔俾加煎蛋變成日版「暗然逍暈飯」。日本嘅珍珠米向來煮出嚟嘅飯有黏糯嘅口感，半肥瘦嘅叉燒粒，搭上蔥粒及白蔥絲，惹味得嚟又帶點清爽，雖然小弟偷食佢一羹仔，亦覺得好味。

C.C.Lemon $14

雖然上文都話過佢哋嘢食欠缺啲特色，但配拉麵，飲啲凍飲就感覺特別爽。揀罐檸檬梳打，就喺想食起拉麵嚟，令個人覺得更清爽。

題外話，表哥話「匠一」前身喺間居酒屋，雖然間鋪就喺晌佢斜對面，但都唔知原來已經轉咗手成為面目一新嘅拉麵店。晌香港做飲食確喺唔易，希望有質素嘅小店可以營運落去啦！

個人評分
味道：8/10
環境：8/10
服務：9/10
抵食：8/10
平均每人消費：HK$80

餐廳資料：
匠一麵屋 Shoichi Ramen
長沙灣順寧道26-36號康福樓地下4號舖
3619 4748