而裡面以沉色中式木系傢俱為主，配以雕花屏風及吊燈，帶出中式嘅古雅味，更有種穿越時空返到以前嘅皇帝年代。
就連枱上嘅碗筷、匙羹……等等餐具都好精緻。
點解咁講？枱上一道「聖旨」，絕對喺搞鬼之作，打開睇睇，裡面就無皇帝詔曰。不過，就有好多關於餐廳相聯嘅事。
此外，枱上嘅擺設亦講究，除一道聖旨，醬油壺都好特別。
坐落，送上兩個木架，一個喺打鞭爐必定出現嘅醬料架，4個小罌分別喺辣椒、芫荽、蒜蓉及蔥花，宮廷醬介收$28位架，就晌點菜紙底下有溫馨提示，不過，幾易走漏眼。
另一個架喺啲冷盤前菜，分別有花椒土豆絲、鹹脆花生、手指青瓜粒及鹹酸菜，樣樣食落都叫人幾開胃，但睇番張單，又無話有收過錢喎，就當上面嗰28蚊計埋啦。
既然餐廳定位火鍋小炒，當然兩樣嘢都有，先介紹吓火鍋呢邊先。一大張點菜紙，有乜嘢食就一眼睇晒。啲湯底又康熙、又祟德……都喺卓頭嘢，但確實款式又幾特別，而火鍋料都以精為主，好似丸類、魚滑都喺自家手打，餃類更即叫即包，牛肉又有嚟自唔同嘅地方，夠誠意。
而另一張就講小炒，同樣貴精不貴多，此外，打鞭爐就唔少得凍飲供應，汽水、啤酒就唔在講，多款自家製嘅羅漢果菊花茶、洛神花茶……，以及近年非常流行嘅手工啤，一樣有得揀。
枱上嘅推廣牌仔，幾款指定生啤，更有買二送一優惠，可惜，我哋唔好酒。
竹蔗茅根 $58
反而，健康嘅竹蔗茅根啱我哋啲，睇見裡面嘅竹蔗、茅根、甘筍、馬蹄就名副其實嘅足料，入口清潤而少甜，邊食邊飲，喺打鞭爐嘅好朋友。
慈禧藥膳麻油雞鍋 $238
仲喺凍凍哋，整個藥膳雞鍋補補就最好不過。呢個雞鍋好花巧，先見上枱喺一大鍋麻油雞，真喺一大隻鮮雞浸住麻油，燒熱一陣，麻油嘅香氣四散，再灑下燒酒，立時惹來火光熊熊，夠晒搶鏡，又引發陣陣酒香，不過，觀賞性高還高，啲油彈到周圍都喺，勁高鐵板燒，朋友嘅袋都中招，餐廳真喺要諗諗方法解決吓，或者俾啲大大張嘅餐紙等客人可以擋一擋。
最後，倒入大量藥膳湯底，但唔會太重葯味，點到即止，滾番起就成事。話時話，啲雞件口感非常滑溜，就算食到尾，啲雞肉都喺咁嫩滑，唔嚡口。不過，湯底就唔喺好敢飲，因為表面泛起一層芝麻油。
清酒鮮牛肉 $148
因為個湯底已有成隻雞之多，所以，肉類就只點一款較特別嘅清酒鮮牛肉 。佢哋晌擺盤上花咗唔少心思，都會擺得靚靚登場。而呢碟鮮牛肉，更加入乾冰效果，散出絲絲白煙，甚有意境。
齋睇啲牛肉，色澤紅潤，唔會暗暗啞啞，油花又足，輕灼十數秘，肉質口感柔嫩，卻唔會太重油脂，又帶微微酒香，大家一致都認為好食。
滾得囍宮廷拼盤 $128
睇見份拼盤，就知喺手打貨色，唔喺普通雪藏嘢，所以，點都要逐款丸嚟評吓嘅。一客10粒，共5款丸，包括：手打黑松露野菌鮮蝦丸、手打珍珠帶子墨魚丸、手打波菜豬肉丸、手打芝心牛肉丸及手打鯪魚丸，因為各有個性，一眼就好易認出邊款丸打邊款丸。
手打黑松露野菌鮮蝦丸
鮮蝦丸打得好爽口，既有蝦鮮味，亦有松露香，更混有少少蝦肉，絕對喺誠意之作。
手打珍珠帶子墨魚丸
墨魚丸一向就無蝦丸或牛丸般爽彈，但甚富墨魚味，雖然無刻意影，裡面堅有啲迷你帶子粒粒。
手打波菜豬肉丸
青綠色嘅外觀，唔使多講就知喺波菜豬肉丸，不過，波菜味就唔會好似食菠菜咁出，而肉丸嘅口感不俗。
手打芝心牛肉丸
牛肉丸唔單止口感爽彈，肉味特別濃郁，咬開流出軟軟嘅芝士，靚料加手打，無得點輸囉。
手打鯪魚丸
鯪魚丸本身就已經爽口而緊緻，又好有鯪魚味，混入蔥花、蝦米，就更加好食。
滾得囍五色拼盤 $68
「五色」就梗喺諗住5款啦，其實點菜紙都喺寫5款，包括：蓮藕片、冬瓜片、鮮淮山、南瓜片、薯仔片，不過，眼前嘅拼盤就多咗款蒿筍。
蓮藕片、鮮淮山、南瓜片呢幾款喺小弟最心水，其實，有乜嘢菜食都無所謂，因為打鞭爐一向多肉，有菜嚟平衡吓就OK。
「滾得囍」明顯喺走中上路線，食材用料都較精，代價就喺消費會高啲；除咗彈油嘅問題，整體招呼真喺唔錯，店員幾好禮貌。
個人評分
味道：8/10
環境：8/10
服務：7/10
抵食：7/10
平均每人消費：HK$380
味道：8/10
環境：8/10
服務：7/10
抵食：7/10
平均每人消費：HK$380
餐廳資料：
滾得囍宮廷火鍋小炒 Big Boils Club
北角馬寶道33號馬寶學林1樓116-125號舖
2331 3838
滾得囍宮廷火鍋小炒 Big Boils Club
北角馬寶道33號馬寶學林1樓116-125號舖
2331 3838
沒有留言:
發佈留言