睇店名，就會予人感覺喺日式燒肉店，再加上店內有少少招財貓嘅擺設。
不過，最搶眼球喺入門右邊嘅巨型牆畫，一大幅着住和服嘅少女，美人胚子，笑容甜美，就算晌門口位影埋去，都見到畫功細膩，筆觸細緻！
雖然名字帶點日本風，但絕對唔喺單賣日本牛，晌門口個牌睇到啲A乜乜乜，M物物物，有食開靚牛嘅朋友就知喺日本和牛同澳洲和牛嘅級數指標。
再睇睇埋餐牌，就見到日本、澳洲、美國牛都有供應，仲有唔同部位，最正斗喺張「解剖圖」，話你知喺咩部位，雖然睇完轉眼就忘記，不過，當趣味睇睇又幾得意。
反一反轉背面，就喺非牛肉類嘅食物，如豬肉、雞肉、羊肉、海鮮、野菜、前菜、沙律、飯麵及湯品，選擇唔少，類別又多元化，更唔喺只得和食，仲有啲韓式、西式。
唔使煩嘅諗食乜，就可以好似我哋咁，針對幾款套餐，每款套餐都喺二人份，已包咗漬物、小食、沙律、不同嘅肉類及海鮮、湯品或飯麵，定價分別為$650、$730、$1,050 + 10%，以日式燒肉嚟講，又喺兩位計，唔算貴。
一於豪少少，揀個Set C先，好豐富架，有前菜、沙律、煎餅、A4和牛、虎蝦、牛魔終極拼盤及石鍋拌飯。
順便就講埋有咩飲品揀，估唔到又有幾多選擇喎，由日本清酒（種類超多）、有汽餐酒、紅白餐酒、韓國燒酒，以至生啤都有。
不過，小弟同夏總都喺不好杯中物，乖乖揀啲非酒類飲品。佢就喺可口可樂嘅死粉，我就喜歡純果汁多啲。雖然我哋唔飲酒，但就見到枱邊設有連枱自助啤酒機，即斟即飲，店員更話喺全港首創。
其實甫坐低，侍應就奉上涼涼哋嘅麥茶，好有麥好。而餐具都好精緻，仲一早備有醬油、岩鹽及海鹽作調味，但個人覺得，啲肉真喺靚，唔蘸都無問題，頂多沾少少岩鹽就可以喇。
桃子汁 $32
唔喺齋水份嘅果汁，睇落仲喺有果肉成份，入口清甜，桃味自然，唔會太過一味得個甜字，涼涼哋，配吓啲煎餅、燒肉，着實唔錯。
古法漬泡菜及前菜
餐前，先上咗啲漬物，有醬醃青瓜、中華沙律及韓式泡菜，除咗當餐前涼茶嚟過過口癮之外，更可以作為食燒肉嘅間場，清爽吓個味蕾。最正喺可以無限添加嘛，我哋都添多咗兩轉，咁佢哋本身又真喺幾好食嘅。
豆腐沙拉配芝麻汁
雖然話喺豆腐沙律，其實加有唔少青瓜、白蘿蔔絲及松子仁，令整體整嘅口感具層次，而芝麻汁調和得既有芝麻香，又唔太過杰身，食味不俗。
香蔥海鮮煎餅
海鮮煎餅喺為人熟悉嘅韓國小食名物，雖然，海鮮料就唔多，但頗有香蔥味，而且，煎得香脆，個煎餅又無話食到一口粉，粉漿做得唔錯。
上咗兩道「前奏」，侍應就主動問我哋開始食燒肉未，並以一小件牛脂肪「起爐」，一邊燒，一邊將爐面以油脂搽勻。而啲爐嘅抽風系統用下抽式，啲煙完全上唔過爐面就被抽走，食完絕對無一身油煙嘅問題。
日本A4牛魔野原燒（和牛薄切配月見汁沾蛋）
睇見呢一大片薄切A4和牛，色澤粉嫩，油花平均分布，就已經叫人心動，配以日本雞蛋及醬油，真期待入口嘅感覺。
侍應話，由於薄切，較難掌握，以往都好多客人燒過籠而嘥咗件靚牛，所以，一般都會幫客人燒，而其他食材較易處理，一般都由客人自己玩吓，當然，佢話都歡迎代勞，我哋道梗喺鍾意自己玩啦。
燒好嘅A4和牛，剪成細件，淋上攪勻晒嘅蛋漿醬油，入口由於蛋醬關係，口感超滑溜，而牛肉入口肉質細膩，充滿油香，真喺好味到無得輸。
越南巨物虎蝦
睇見兩隻虎蝦嘅呎吋、新鮮度，就知餐廳用料不賴。師傅更將其開邊，方便燒，又方便食，伴上檸檬角，用唔用悉隨尊便。
夏總果然食開日本靚嘢，燒烤嘅手勢及時間嘅拿捏都好，所以，跟住落嚟嘅燒肉都由佢負責，小弟就安心影相同食食食。
啲越南虎蝦果然得，大大啖放入口，鮮甜爽彈，呢個就建議沾丁點岩鹽，喺可以大大提升蝦鮮味。
牛魔終極拼盤
「終極」就梗喺要終極出場，長條形木板放上5款牛肉，由左至右喺角切香蔥M6橫隔膜、澳洲M7和牛肉眼排（ 厚切 ）、美國Prime醬油牛肋骨、30日熟成Prime 西冷（ 厚切）、牛香蔥牛脷，可謂每款都有唔同個性，值得小弟逐樣寫、逐樣評。
角切香蔥M6橫隔膜
咁刁鑽嘅部位「橫隔膜」真好少接觸，啲色澤鮮紅，亳無瘀疼啞啞嘅瑕疵，真喺好鬼死誘人。
由夏總出手，燒得特別香，外層仲帶點焦脆，而肉質出奇地咗軟腍。事後跟侍應交流，先知餐廳利用生果嘅天然果酸去醃肉，令肉質軟化自然。
澳洲M7和牛肉眼排（厚切）
同樣，淨喺睇見件肉就覺得掂呀！色澤紅潤，帶點點油脂，雖然啲澳洲牛只喺M7質素，但已覺得質素高。
之前嘅橫隔膜好軟腍，但估唔到呢件肉眼排仲腍身，由於喺肉眼部位，肉味寧舍濃郁，口感、味道都一樣咁正。
美國Prime醬油牛肋骨
呢個牛肋骨就用咗韓式做法，以醬油醃，薄切後再捲成卷狀，侍應更話醃超過12小時，故睇落非常入色。
經過醬油醃，可以講喺別具風味，有一份醬油香，肉質一樣柔軟，好食。如果猶如平常食韓燒咁，配幾片生菜俾我作配搭，就更加滿足。
30日熟成Prime 西冷（厚切）
跟住再食嘅又喺美國牛，取西冷部份，但正就正在以30日熟成處理過，之前晌一家專食熟成牛扒嘅店試過，30日熟成喺最理想嘅。
食完之後，我哋兩個都讚不絕口，因為厚切關係，特別具口感，加上熟成處理，又喺西冷位，肉質細緻，肉味比件肉眼更強，兼且富肉汁，一流呀。
牛香蔥牛脷
最後燒嘅喺牛脷，小弟一向都鍾意食牛脷架，兩大片牛脷，厚切就更合心水喇。
牛脷辣香兩面，賣相吸引，而食牛脷，最吸引喺佢嘅咬口感，煙韌有嚼頭，兼且有點牛脷獨特嘅肉羶味。
石鍋拌飯（牛肉 / 雞肉）
食完啲肉，其實都已經有八乘飽，加埋呢一大鍋韓式石鍋飯，飽到十足。雖然佢哋主打喺賣燒肉，但整起呢道韓式石頭鍋飯，絕對有板有眼，配上多種蔬菜、牛肉、雞蛋，撈上韓式甜辣醬，攪勻就食得。
因為材料多，啲飯粒又煮得啱啱好，配合埋蛋黃、辣醬，食味真喺無得彈。意外驚喜喺，加送飯焦，脆香好味。題外話，石鍋「拌」飯我認為用「拌」字較「伴」字合理啲，因為喺有拌勻、撈埋一齊食嘅意思。
雲呢嗱雪米糍
以為餐飯就咁完，最後，仲奉送兩粒雪米糍俾你降吓溫。雖然只不過喺雲呢嗱雪米糍，無咩特色可言，但都喺一份點點心意，相信客人都好受落。
夏總好欣賞今晚餐飯，環境、服務、食物都好滿意，仲話趁特別日子值得帶埋老婆嚟試。我都好欣賞佢哋嘅服務，主動添漬物，不時問吓需唔需要幫手燒，食完晒，又幫手執拾好，且抹乾淨枱面，再加句：慢慢坐，以示唔喺催你走嘛。
個人評分
味道：9/10
環境：9/10
服務：9/10
抵食：8/10
平均每人消費：HK$580
味道：9/10
環境：9/10
服務：9/10
抵食：8/10
平均每人消費：HK$580
餐廳資料：
牛魔 Yakiniku More
尖沙咀棉登徑8號地下5-6號舖
2750 8800
牛魔 Yakiniku More
尖沙咀棉登徑8號地下5-6號舖
2750 8800
沒有留言:
發佈留言