為咗爭取時間，先點定菜，而菜式都上得快，但未人齊，就叫啲阿姐留番啲蓋冚住啲餸菜，人齊，就開飯喇！今餐非常豐富，連湯、連炒飯，一共12道菜式，真正嘅12道豐味。不過，香芋油鴨煲（$78）影漏相，晌呢段略略寫番，油鴨故然富油香，鴨肉煙煙韌韌，而啲芋頭吸引收晒啲鴨油及湯汁，既有芋香，味道層次亦豐富咗。
椰子海底椰螺頭雞腿煲唐排 $198
其實，我哋呢煲湯計價有啲複雜，因為酒家有款「 晚飯三寶」，賣$398，包天天煲靚湯、清蒸虎杉斑仔及脆皮燒雞半隻，但個湯只喺6人份，所以，經理就彈性加半客湯湊番成一整客。
一大煲，我哋一行13人一人一碗之餘，仲可以添飲。個湯入口好潤，非常香甜、濃郁，夠晒火喉，而侍應上埋成碟湯渣俾你，以證真材實料，童叟無欺。
脆皮燒雞半隻
呢個都喺「 晚飯三寶」菜式之一，睇落色澤炸得金黃，個外皮堅脆，香口而不膩，雞肉亦比預期中嫩滑，的確好食。可惜只喺得半隻，轉眼就清晒。
清蒸虎杉斑仔
另一「 三寶」喺蒸魚，估唔到條虎杉斑仔都唔細喎，而且，蒸得啱啱好，肉質嫩滑，又有魚鮮味。靚魚，都喺清蒸好，食出其鮮味。
咕嚕珍寶蝦球 $88
咕嚕肉就食得多，蝦球就好似未試過，仲要喺珍寶呎碼，的確，啲蝦球好大隻，厚肉得嚟又爽身，而個甜酸醬調得酸香唔嗆喉，呢道菜甚得小弟歡心。
椒鹽腰果牛柳粒 $78
依個菜就點俾啲食肉獸嘅，最意外嘅喺唔止牛柳粒多，竟連腰果都落好多，一啲都無手緊，出面好多酒家都只喺像徵式灑幾粒；更衰嘅，貪方便椒鹽一早炸好，灑上面就當椒鹽炒，但呢碟一睇都知喺椒鹽混埋牛柳粒一齊炒，夠晒惹味，再者，牛柳粒口感好軟腍。
麗宮小炒皇 $75
家家酒樓或大牌檔都有道菜叫小炒皇，基本上都喺大同小異，麗宮嘅小炒皇都做得不俗，炒起嚟夠鑊氣，食落香口，由於食材豐富而多樣化，所以，口感極佳。
西芹腰果肉丁 $68
咁多道菜式，就呢一味相對嚟講比較弱，其實都做到晒基本，只喺感覺普通啲啫，但平衡大家口味，總要有啲清淡少許嘅家常菜俾大家嘅。
薑蔥花膠豆腐煲 $78
個豆腐煲簡直盆滿缽滿呀，既多豆腐，亦多花膠，近期真喺遇到唔少花膠嘅菜式，就算唔喺話咩靚花膠，七十零蚊道菜，都喺抵食，正在又夠晒薑蔥香。
鮮淮山勝瓜炒鮮魷 $70
有行開街市都知，鮮魷唔平，但睇見碟炒鮮魷一樣俾得足秤，唔會一味得啲勝瓜，而且，啲鮮魷好爽軟，有魷魚鮮味；其次，鮮淮山亦爽脆，又配埋少少雲耳添，都喺有益健康嘅食材。
蒜蓉炒西洋菜 $62
平常蒜蓉炒白菜仔或菜心就多，炒西洋菜就似乎喺第一次，估唔到兩者炒埋一齊效果都唔錯喎。
鮮蝦揚州炒飯 $88
雖然刻意加上「鮮蝦」二字，但跟平常食到嘅，又唔覺特別加多咗鮮蝦，但喺，個飯確喺炒得唔錯，「金鑲銀」，粒粒飯粒都包滿蛋漿，又爽身而不油。
白飯 $13
其實白飯無咩好寫，不過，呢度白飯以外，可以揀糙米飯，其實糙米、紅米成本高好多，而且，睇碗飯就知，唔喺象徵式混幾粒糙米、紅米，而喺佔嘅比例都幾多。
順帶一提，茶錢收$12位，但就無話收咩前菜、酸菜嘅雜項，加一就唔使多講啦。雖然，事前睇過呢度嘅食評，感覺好似麻麻，但試過，又唔喺咁大問題喎，好似我哋都只喺點吓小菜，小菜嘅份量都喺例牌，但好足，好夠食，味道又唔錯，服務亦交到功課。總之，難得老同學聚一聚，大家話食乜都無所謂。
個人評分
味道：8/10
環境：8/10
服務：8/10
抵食：8/10
平均每人消費：HK$135
味道：8/10
環境：8/10
服務：8/10
抵食：8/10
平均每人消費：HK$135
餐廳資料：
麗宮薈 Palace Club
大角咀福利街8號港灣豪庭廣場1樓126號舖
2816 7688
麗宮薈 Palace Club
大角咀福利街8號港灣豪庭廣場1樓126號舖
2816 7688
沒有留言:
發佈留言