Holly Brown Coffee Roasters：五折負能量

情人節正日食飯就一定喺貴，趁住姨仔去咗旅行，唔使預佢飯餸，所以，兩公婆預早少少出街食，當喺慶祝情人節。自從荔枝角有咗D2 Place，感覺呢區好似「活化」咗好多，食肆嘅選擇亦多咗好多。今晚揀嚟「 Holly Brown Coffee Roasters 」，一來未試過，二來又有啲五折推廣。

餐廳位處商場地下，一邊鋪面向街，好易認，而且，地方大，樓底又高，空間感足，裝修帶點工業風，配合調暗咗嘅燈光，氣氛蠻好。又有一對女子組合自彈自唱，令用餐嘅感覺真喺幾好（門口有塊小黑板會寫住邊日有現場伴奏）。唯一唔好喺枱櫈編排有啲密，我哋喺4人枱拆出嚟嘅，變相同隔離嘅二人枱喺零距離，好似去咗麥記咁。

除咗餐廳嘅名字加上「Coffee Roasters 」，又見佢哋擺咗部炒豆機做裝飾（我估無實際用嚟炒豆啩），所以，對其咖啡嘅產品抱有好大期望。

先介紹吓有咩食先，因為成餐廳嘅燈光都比較暗，所以，影出嚟嘅餐牌效果都喺麻麻，所以，靠少少文字補充。菜式分類為早餐、湯類、頭盤、沙律、漢堡、意粉、意飯、薄餅、主菜、甜品、窩夫及飲品，選項不少。

至於文初話晚市有五折優惠，其實都好條件性，詳情喺咁嘅，星期一至五6:00pm後，以人頭計，凡每人點一杯正價飲品，除咗甜品，所有食物都有半價優惠，但加一會按原價。佢哋啲飲品本身唔平，好似啲咖啡咁，就貴過星巴克喇，好多人嚟Holly Brown，都喺貪試佢哋啲甜品，所以，抵唔抵視乎你嚟食啲乜，千祈咪見半價就一定以為好抵。

鮮奶咖啡 $46

正因佢個店名，先刻意嗌杯鮮奶咖啡，不過，真喺有啲失望，拉花就唔評論，因為大家都有眼睇。咖啡入口完全唔得，奶泡跟濃縮咖啡並無完全撞埋一齊，飲多幾啖，你就會感覺到味道唔均勻嘅感覺。

黑糖桂圓玫瑰果茶 $65

老婆就揀咗養生少少嘅果茶，以壺上，睇落壺中都幾真材實料，飲落較突出喺玫瑰花香味，而且嚟自薑嘅辣味又幾勁，反而，桂園味真喺欠奉。飲到尾，一切迷底都鮮開，裡面確有唔少玫瑰花及薑片碎，但龍眼就得嗰幾粒。

牛油果蟹肉沙律 $128

兩款飲品就未有預期般好，但呢個沙律好食，一來估唔到份量有番咁上下，二來，堅多牛油果同蟹肉，明知都喺罐頭蟹肉，但鹹鮮味唔失禮，而牛油果夠熟夠腍，好滑身，配合埋大量火箭菜、蕃茄、櫻桃蘿蔔，淋上有啲似蜜糖介末嘅醬汁，喺值得推介嘅菜式。

白酒汁煮藍貝青口 $128

諗住個沙律咁正，其餘兩道菜嘅水準應該唔差得去邊，但先喺個藍貝青口，味道好普通，不過，就仲未需要用個差字嚟形容。其實，賣相唔差，啲青口大大隻，份量唔少，又配上兩件香脆嘅蒜蓉多士，但青口雖然厚肉，卻喺入口無乜味，個汁完全唔覺有白酒香。

蟹肉蘆筍南瓜汁意大利飯 $168

睇落碟意大利飯似乎幾掂咁啦，原來得個樣。食意大利飯最重要喺乜？小弟就認為喺其咬口嘅口感，但食落去就知比普通一碗白飯都仲要腍身，更唔好講有咩煙韌感；其次，飯粒望落夠濕潤而一片金黃，點知南瓜味好淡薄；至於啲蟹肉，喺混入晌飯粒內，感覺比上面嘅沙律為少，因為食完都唔覺得有幾多蟹肉。

由於個場都幾大，只得3個侍應，有人手不足之感，服務只可以喺叫到先做，臨尾，仲計錯收多一碟雜錦拼盤嘅錢，好在有認真對單。而且，好似我哋咁，兩個人安排二人枱，正常不過，但就唔理實際情況，乜食物都快速上晒枱，但張枱又細喎，堆到啲嘢就跌就跌咁。再者，佢哋嘅食品定價偏高，但質素又未喺好高，若唔喺有個優惠，埋單要近六百，卒之明白點解有咁多負評，以及唔怪得平日要靠五折嚟吸客嘞！

個人評分
味道：6/10
環境：7/10
服務：6/10
抵食：6/10
平均每人消費：HK$190

餐廳資料：
Holly Brown Coffee Roasters
荔枝角長順街15號D2 Place二期地下1號舖
2371 2826