快樂牛 Happy Cow：樂活方程式

晌中環「大館」嘅「匡智小館」食完晏，無晌佢度食甜品，皆因打算嚟中環海濱嘅「快樂牛」食雪糕當甜點，之後，再搭天星過海，比一程地鐵平之餘，仲可以吹吹海風、欣賞吓維港。

小弟對「快樂牛」其實喺好陌生、好唔認識，只喺曾睇過佢嘅一篇食評，介紹原來喺賣「素雪糕」，晌門面嘅牌牌都特別強調，佢哋嘅出品喺不含奶製品、不含蛋製品、不含膽固醇、較低糖，更喺香港製造，咁健康嘅雪糕啱晒我老婆。

喂！咪話喺素雪糕就以為好寡，選擇無乜，睇睇個雪糕櫃，就見到有成十多款選擇，不少味道都頗有特色。

價錢如何？同去食「哈根大師」差唔多。單球賣$38、雙球賣$58、三球賣$78，另外，加配料、選甜筒需額外加錢；此外，仲有啲曲奇雪糕三文治及奶昔供應。最正都喺學生或長者有減$10優惠，可惜，依啲機會唔屬於我。

雖然可以拎住邊行邊食，但慢活吓，就不妨坐晌鋪面對出摩天輪下嘅露天位，不知幾寫意舒服。

南瓜朱古力醬味雪糕+曲奇碎配雪糕筒 $46

睇見個配搭已經好得意，本身我哋都鍾意南瓜嘅產品，順利成章就要試吓佢。單睇色澤，唔講真喺估佢唔到有加入南瓜元素，不過，老實講，南瓜味就真喺唔突出，加上我哋又加咁曲奇碎一款配料，令朱古力嘅味道更突出。

火龍果雜莓味雪糕 $38

一款濃味，另一款就揀隻清新啲嘅，火龍果味雪糕真喺從未食過，其實，火龍果本身嘅味唔強，但點都好，加入雜莓，入口喺分之清爽，而且，雪糕內混有好多果肉，口感與味道都好正。

唔知你覺得點先喺快樂，小弟就好簡單，認為食得、走得、瞓得已經可以好快樂。因為年紀漸大，見身邊嘅朋友，有啲身體出問題，呢樣唔食得、嗰樣唔食得；有啲就咪話走呀，行都成日話呢度痛、嗰度痛啦；有啲就因工作壓力，或其他毛病，經常瞓得唔好，惡性循環咪個人越嚟越差囉，咁搞法又點會開心架。活在當下，嘆杯雪糕先講啦！

個人評分
味道：7/10
環境：7/10
服務：7/10
抵食：7/10
平均每人消費：HK$42

餐廳資料：
快樂牛 Happy Cow
中環民光街3號攤位