而裝修最吸晴喺啲花花階磚，唔止鋪晌部分牆身，仲連所有枱面都鋪埋，令整體感覺沉實而多添一點繽紛及活力。
此外，牆上所掛嘅帆船模型、美國色彩甚濃嘅懷舊廣告板，都睇得出老闆確喺花咗唔少心思。
翻一轉餐牌，選擇幾港式西餐格，由鐵板燒、沙律、焗飯、意粉、小食……等等，較為特別喺有一系列雪葩，以及仲提供懷舊港式特飲，如黑牛、忌廉溝鮮奶。
店員就推介我哋試試一款「期間限定」嘅套餐，會定期轉款，喺韓式火山石燒靚牛肉，或可加錢轉日式壽喜鍋，依家更喺做緊「老闆瘋了」價，打個六五折，就算喺宣傳策略，睇個折實價都極之「MK」吓。
蒜蓉包
受人歡迎嘅餐前麵包，其實，有啲心機搽勻蒜蓉牛油，焗香佢，上枱時熱辣辣應該喺最基本，但有時有啲餐廳貪快，連基本都做唔好。「水蜜桃」嘅蒜蓉包就合枱有餘喇，有蒜香，帶微暖，再添多少少香草就更佳啦！
羅宋湯
喺港式西餐嘅標準「紅湯」，做的酸香開胃，味道濃郁，而且，非常足料。餐湯更可以加12蚊轉酥皮湯，不過，好彩無加，因為啲主菜份量十足呀！
紫薯忌廉湯
「白湯」就唔喺常見嘅蘑菇忌廉湯，而喺紫得夢幻嘅紫薯忌廉湯，質感挺順滑，但味道就有點玄，紫薯嘅甜味中帶點減，個人感覺就未算好夾。
鐵板燒紐西蘭羊扒 $118
佢哋啲鐵板餐都幾抵，都喺$88-$125，當晚目測，都見唔少客人點鐵板餐，因為不時聽到隔離枱傳出吱吱響聲。而小弟就揀咗客中價嘅羊扒，包晒餐湯及飲品。
佢哋嘅鐵板唔喺就咁淋上醬汁，而喺先因應唔同肉類淋上唔同嘅酒，可能喺白蘭地、冧酒……，再點火增加香氣及可觀性；
之後，再淋上蘑菇洋蔥汁，發出「咋咋聲」，香煙四溢。
一客足有三大件羊扒，件件又大又厚身，堆到成塊鐵板都喺。件扒嘅肉質比預期要軟腍，帶微羶，唔食開羊嘅人都應該OK，咁嘅價其實好抵食，要挑剔就喺筋多，切起嚟帶少少麻煩。配菜亦無手緊，有青瓜、車喱茄、西蘭花，大量脆炸薯條，成份餐真喺大堆頭。
熊本一口牛 $148
有熊本牛供應，標明220g，只喺賣嚿半水，所以，心裡已打個底唔會抱住最頂級嘅期望。而整個套餐，仲包埋生菜包、珍珠飯、餐湯、熱飲，石板之上早已放上多款野菜，食完真喺唔飽有鬼咯。
既然話喺韓式石燒，睇得韓劇多嘅朋友就知佢哋不時會以生菜捲住啲燒肉嚟食，啲生菜仲會配埋蘿蔔蓉、蒜片、醬油讓客人自行調味。
至於啲熊本牛切成一粒粒，一口一件超方便，單睇碟牛，又喺份量無欺場，睇出充滿油花，但有解凍未足嘅感覺。放落石板，雖然石板下有火酒糕加熱，但整體石板嘅熱度應該唔夠強，「咋咋聲」唔喺好響，辣唔出焦香嘅效果，但啲肉本身質素喺不俗嘅，既腍滑又帶點油香。以生菜包住，加點蘿蔔蓉、蒜片，個人就覺得更好食。熱騰騰嘅珍珠米又香又軟糯，一啖飯，一啖牛，沾點醬油，亦叫人滿足。
熱檸茶、熱特濃唂咕 +$5
今晚全部都喺肉，所以，就改改餐後嘆咖啡嘅習性，而飲熱檸茶，有助消滯去膩；友人就喜歡唂咕，因為比朱古力更香濃。
店家嘅甜點就獨沽一味只有雪葩「日本Lisse雪葩」，其實，食完鐵板燒、石燒，以雪葩降吓火都幾好嘅配搭。有食開鮮果肉雪葩嘅朋友都知，單價一向都唔平，依家跟餐仲要平啲，簡直喺心動價，搞到我哋都各點一客試試，而且，款式頗多，睇得我哋十五十六。
蜜桃雪葩 $35（套餐價）
寫明喺原個嘅，送到嚟就梗喺成個啦。啲雪葩釀晒入蜜桃裡面，味道清爽，蜜味不俗。由於桃肉本身都可以連皮食，所以，我哋夾手夾腳將成個蜜桃雪葩處理掉，哈哈！
芒果雪葩 $32（套餐價）
本來首選喺菠蘿口味，可惜是晚缺貨，不過，芒果我都好啱。芒果喺半個份量，睇到外皮上帶少少果肉，可惜比較難刮嚟食。而雪葩嘅芒果味非常突出，清甜冰涼，且甜味自然。
無論環境，抑或食物，都睇得出花過心思，同埋有誠意，難得無話開天殺價。雖然位處MK，服務唔會爛撻撻，店員都非常有禮，整體都比預期好呀！
個人評分
味道：7/10
環境：7/10
服務：8/10
抵食：9/10
平均每人消費：HK$170
環境：7/10
服務：8/10
抵食：9/10
平均每人消費：HK$170
餐廳資料：
水蜜桃冰室 Peach Garden
旺角通菜街2Q-2Z號鴻輝大廈地下2R號舖
2796 6128
水蜜桃冰室 Peach Garden
旺角通菜街2Q-2Z號鴻輝大廈地下2R號舖
2796 6128
沒有留言:
發佈留言