北海道爐端 Majimeya：爐苦功高

呢幾個月試過鐵板燒，又試過拉麵、海鮮丼、日式燒肉、涮涮鍋、浜燒……等等專門店，喺串燒專門店較少到訪，因為成日覺得啲串燒細細串好似食極都唔飽，收費又唔喺平。但最近有街坊推介荔枝角D2 Place二期嘅「北海道爐端」，定價相宜，加上近我，食完行返屋企都仲得，當喺散步消化吓。

晌門口，已見佢哋嘅裝修都花過心思，深木系一派北海道小木屋格，掛滿極富和風嘅燈籠。走進餐廳裡面，同樣甚有氣氛，唔同位置，都擺設唔同嘅裝飾，齋影環境，都呃得吓人去咗北海道嘅餐廳。

餐廳近窗嘅一邊，設立多個小個室，更有私隱度，如知道有呢啲房，訂枱時就要求坐裡邊啦，不過，就無特別查問有咩要求如要知室嘅話。

雖然睇店名，讓人感覺都喺主力為串燒，其實，翻一轉餐牌，你就見有好多其他類型食物。打開餐牌，先喺各式各樣嘅啤酒、雞尾酒、餐酒、特飲、燒酌……等等飲品。

再翻，仲有前菜、沙律、刺身、特色小菜、特色意粉、炸物、燒物。

甚至乎丼飯、拉麵都有，甜品亦自不然唔少得啦。數吓數吓，真喺有過百款嘅食物，但有咁多嘢賣，會唔會周身刀，無張利呢！

反而，我哋一心嚟打算食串燒，大部份嘅串燒食物卻印問另一張簡便嘅餐牌上；此外，亦加插一啲推介菜式及鍋物。之但喺，一向都有影低啲餐牌留個記鍍，最怕啲餐牌過咗膠，影出嚟會反晒光，當然，以餐廳而言，就好管理！

黑芝麻煙肉沙律 $48

先嚟一道沙律，和風沙律用上胡麻醬喺慣常嘅事，然而，用黑芝麻醬就甚少見。道沙律除咗有沙律菜，仲有粟米、蕃茄、青瓜、煙肉碎及滑豆腐粒，黑芝麻醬喺另上，淋多淋少隨個人喜好。本身啲食材新鮮，淋上香濃嘅黑芝麻醬後，口感清爽，味道濃香。

講明嚟食串燒，見佢牆上掛咗個「5款串燒」嘅優惠組合，睇過款式都啱口味，再搵啲單價嚟對比，可以講喺4送1咁，精明又想慳番啲嘅消費者就大多數都揀佢啦。

5款串燒 $116

5款串燒包括和風芥末豬腩串、帆立貝串、鹽燒雞翼、免治雞軟骨棒、日本蕃薯仔，一碟放齊5款串燒，又燒得好靚仔，非常吸引。

和風芥末豬腩串

雖然喺豬腩串，入口一啲都唔覺肥膩，可能就喺因為個芥末醬汁，帶微微芥末味，辣度隱若，卻出奇地有減膩之效，再者，肉質帶點點爽脆感，確喺幾好食。

帆立貝串

啲帆立貝又大粒，又有睇頭，燒得好似披上一層黃金大衣。口感唔錯，軟腍得嚟有少少彈牙，仲有點碳火香添。

鹽燒雞翼

開邊做成單骨雞翼，食起嚟比較易，外皮入口十分香脆，不過，話喺一隻，兩人分嘅話人其實一人食得半隻，好似一陣風咁兩啖食晒。

免治雞軟骨棒

一大條免治雞肉棒，食落好腍，有鬆化之感，再咬落去，有啲咬口感，就喺因為裡面混咗雞軟骨，口感過癮。

日本蕃薯仔

啲蕃薯仔細細粒，一口一件，質感十分粉糯，帶蕃薯香，塗上點點蜜糖，更感清甜。

牛舌 $38

5串串燒就梗喺未夠喉啦，追加一串牛舌，喺朋友嘅至愛，小弟亦鍾意食，因為口感柔韌，又有一股獨有嘅羶味，就咁鹽燒，唧啲檸汁，已非常好食。

秋葵 $22

平衡番啲邪惡嘅肉類，秋葵喺最心水嘅串燒野菜，燒過之後，秋葵嘅口感無咁滑潺潺，反而，就多咗份脆口感。

入門口之前，門外貼咗唔少雜誌報導，不過太密麻麻，無乜點睇；相對哋，就留意到一塊座地黑板，介紹其松葉蟹海鮮鍋，因為畫得精細有趣味。晌餐牌中就搵嚟搵去都唔見有，向店員查詢，原來就喺另頁餐牌中嘅豬骨湯海鮮鍋。

豬骨湯海鮮鍋 $178

雖然話喺一人前鍋物推介，但兩個人食絕對卓卓有餘。整份鍋物捧出嚟，真喺頗大份，野菜墊底，上面鋪滿多款海鮮：松葉蟹腳、虎蝦、廣島蠔、帆立貝，樣樣都打孖（帆立貝除外），配上半份烏冬，所以，喺咪兩個人食都無問題呢！

若然咁都仲未夠，又或對個別食材有興趣，無問題，可以追加各款海鮮料及烏冬。

松葉蟹腳

成日都講，小弟都鍾意食蟹，但就唔鍾意拆蟹，所以，隻蟹腳拆好晒，一熟就食得，爽呀！蟹肉好鮮甜，肉質細緻，唯可惜食得一隻就梗喺唔夠喉啦。

虎蝦

算唔上超大隻，但至少唔喺啲蝦毛仔，蝦肉爽口，幾有蝦鮮味，用料唔失禮呀！

廣島蠔

啲蠔滾完都唔喺好縮，仲保持住幾大隻嘅身形，蠔肉仲喺幾肥美吓，入口蠔味都算濃，質素不賴。

帆立貝

對比起串燒嘅做法，灼過嘅帆立貝口感更彈牙，而且，更有一份鮮甜味，始終，個豬骨湯做得不俗，所以，我哋都飲清光唔好嘥。

抹茶心太軟 $48

食到尾，大家仲有啲位，不如一客甜品兩份共享吧！幾款甜點，友人就建議心太軟，本以為就咁一件心太軟（因餐牌相喺咁），上枱嘅成品有意外靚嘅賣相。

件心太軟可能喺細個裝，軟易焗過籠，所以，唔喺好流心，反而成為軟心，其實我仲鍾意，因為流心就較視覺感，抹茶漿瀉晒食唔到幾多，反而軟心就啖啖滋味。此外，抹茶味香濃而帶少少甘苦，紅豆軟腍而清甜，襯少少生果粒，滿意嘅一道甜點。

最近一連睇咗兩輯南韓綜藝節目：「尹食堂（第一輯）」、「姜食堂」，賣點喺搵藝人營運一間餐廳，好睇又好笑，其實，都知搞間食店真喺唔易。做客人嘅，可以講喺以逸待「爐」，嚟到點完菜就等食，食完拍拍屁股就走得。講番「北海道爐端」，環境好，招呼到位，做菜都有番咁上下水準，難得定價親民，值得推介俾我班美孚街坊朋友。

個人評分
味道：9/10
環境：8/10
服務：8/10
抵食：8/10
平均每人消費：HK$250

餐廳資料：
北海道爐端 Majimeya
荔枝角長義街9號D2 Place二期1樓109號舖
2687 3330