Food Republic：椒積鐵板飯

對「大食代」唔抗拒，亦無偏好，但以美食廣場嚟講，小弟就覺得佢哋做得唔錯，作為新加坡過江龍，晌香港屹立咁多年，佢都算喺做出成績啦。今晚，同老婆，陪埋佢姨甥仔過嚟「大食代」食晚飯，純粹貪佢地方大位多，各有各選擇唔怕無嘢唔啱食。

雖然喺美食廣場，「大食代」都算得喺一個品牌，環境裝修都下過功夫，座位嘅編排未算用到盡，所以，感覺都唔會話好逼好夾。

「將之湯」日式蛋包飯

姨甥仔揀咗客鰻魚牛肉蛋包飯，睇起嚟賣相幾唔錯，個蛋都好似幾滑，其實，就無包住啲飯，只喺冚上面而已；不過，鰻魚同牛肉就幾多，味道方面佢話幾好食，啲蛋挺滑，牛肉夠嫩，鰻魚幾濃（我估佢意思喺啲汁），小弟無試，只可以講句信佢好味啦！

「千味家」三餸飯

老婆就搵咗檔食三餸飯，貪佢自主啲，想食乜就揀乜，所以，佢就揀兩款菜配炸魚，唔食紅肉。賣相就欠奉架喇，似喺街坊食堂嘅飯餸出品，但碟頭大，真喺餸多過飯。又喺講吓味道，試咗少少，算喺唔錯，炸魚香口唔油膩，魚香茄子夠惹味，當然芡汁少番啲更佳。

「Pepper Lunch Express」黑椒飯

Pepper Lunch出名喺佢啲鐵板黑椒飯，以鐵板呈上，誘發出黑椒香氣。埋到櫃枱睇睇，都有唔少款式，有原創黑椒飯及至尊扒餐，定價都喺$48-$60，唯獨一款肉眼扒賣到$97，此外，亦有啲配料可額外加配。

小弟心多又想試新產品，就揀咗「三拼黑椒飯」（牛肉、三文魚、雞肉）$55，不過，啲餸料感覺偏少，跟張相真喺天淵之別。牛肉唔錯，嫩得嚟有少少焦香，三文魚口感比較乾，雞肉食落無乜味，最好食其實喺啲飯，撈勻啲粟米粒同蔥花，又有飯焦。

嚟「大食代」都唔喺為食咩好嘢，只喺比去快餐店有多啲唔同選擇，今晚我哋都喺純粹填飽肚而已。

個人評分
味道：6/10
環境：6/10
服務：5/10
抵食：6/10
平均每人消費：HK$55

餐廳資料：
Food Republic
大角咀海庭道18號奧海城二期1樓
2771 3315