福丸水產.浜燒.日本料理 Fukumaru Hamayaki · Omakase：捧福開懷

小弟生日，就唔喺老婆帶我食好嘢，而喺由我帶佢去食好嘢，始終搵食我就叻佢少少。之前，曾同佢及朋友食過一家放題店，仲包埋浜燒，佢頗喜歡呢類食法，再者，佢戒紅肉，食海鮮就選擇多番啲喇。最後，揀上「福丸」，一來見其風評不俗，二來近西鐵，我哋返美孚都喺5分鐘車程。

一出電梯，門面裝修非常有特色，半立體木魚船滿載漁獲，更標明海產由日本直送。如果製作成三維立體畫，俾啲客人企埋去影相，就更有賣點呀！

餐廳佔整層樓全層，地方非常之大，一入門口，左邊大大個木櫃放滿一支支清酒，雖然小弟唔好酒，亦對酒唔太認識，但睇見都好有霸氣。

再走入啲，分割咗幾區，先喺有右邊嘅開放式廚房，一直排魚池放咗龍蝦、鮑魚……等等海鮮。然後，仲有多種直送日本鮮魚、貝類，魚生櫃放滿唔同嘅刺生，幾位師傅密密做刺身、壽司。

而周圍設有類似個室嘅卡位，但是晚雖然喺閒日，都幾爆場，所以，呢類個室都一早無晒，我哋則被安排另一邊嘅2人座，當然唔及啲卡位正，但感覺都蠻舒服。

餐枱嘅面積亦較一般嘅大，就算枱上已擺放浜燒用嘅專用火爐，以及醬油、用具……等等，都唔會感到太逼。

晌門口等安排入座時，就略略掃描一次個餐牌有咩美食選擇。期間限定食材、刺身、壽司、卷物、浜燒、下酒小食、鐵板燒、燒物、炸物、天婦羅、食事、鍋物、甜品、多款酒精及非酒精飲品，種類而言，一應俱全，絕大部份菜式均圖文並茂。

上文都講過，酒品小弟真喺唔多好，但輕酒精類嘅飲品就間唔時會試吓。晌飲品部份，見有多款生果味嘅汽酒，款款賣$38，呢樣我又幾有興趣一試。

菠蘿汽酒 $38

飲得出喺用新鮮菠蘿做，因為，有微微果肉混晌汽酒內。飲一口，酒精度唔高，加上有菠蘿嘅清甜味，非常之易入口，冰冰涼涼，好啱一陣食浜燒時配合。

雖然今晚主力喺試浜燒，但都想先食啲小食嚟過場。晌下酒小食一欄中，就有多種唔同小食供應。

白飯魚干 $38

曾經試過一次，覺得幾得意，推薦俾老婆試，佢亦喺店方推介嘅小食。將啲白飯魚壓成薄片再燒香，口感脆到不得了，有點點魚香，不過，好似一陣風咁轉眼食鬼晒。

燒日本小茄子 $38

啲茄子肥嘟嘟，上枱時已去晒皮，睇外觀喺燒完先去皮，咁又多花咗功夫。入口好腍滑，淋上醬油及灑下木魚碎，佐酒都幾唔錯。

出面嘅魚鮮櫃影相時，睇見啲魚鮮閃爧爧，店長話啱啱返咗啲靚魚，問我哋有無興趣，佢就推介一款日本紅衫，話有魚味得嚟肉質夠滑。

燒日本紅衫 $268

賣相方面，燒得幾靚仔，加埋啲伴碟，整體感覺喺唔同晒，夾一小片魚肉，外皮燒得香脆，魚肉確喺有質素，唔沾醬油都已經好食。

既然一心嚟食浜焼，主菜重點就梗喺放晌啲海鮮度。有多種海鮮供選擇，單點定價亦唔算貴，不過，當然計落都喺個「福丸浜燒盛合」最划算，跟張相咁，有齊咁多種類及數量嘅海鮮，啱晒我哋兩口子啦。

福丸浜燒盛合 $428

一份盛盒共有4款海鮮食材，包括：帆立貝、生蠔、 活鮑魚、大蜆，睇見啲外觀、色澤都已覺得貨色新鮮。全程會由店員負責燒烤，真喺只需等食就可以。

帆立貝

雖然無講明會唔會喺北海道貨色，但睇樣都覺得具質素，燒到咁上下，就加啲清酒同些少醬油，收番乾啲就食得。帶子食落彈牙、爽甜，帶微微酒香。

大蜆

燒大蜆就比較簡單，就喺齋燒，燒至開殼並收乾少少水份就搞掂，仲要剪走一邊殼擺得靚仔啲先上碟。由於無加任何調味，食得出蜆肉嘅原生鮮味，蜆肉飽滿，更有海水嘅鹹鮮味，所以，咪唔使調味囉。

鮑魚

鮑魚比較需要多啲時間去燒，所以，晌燒大蜆嘅同時，亦燒緊鮑魚。啲鮑魚會唔會喺南非貨呢？就算唔喺，都喺有水準嘅貨色，燒香之後，店員更會剪成小件，一口一件，方便食用。鮑魚入口煙韌富彈性，鮑味突出，又帶點焦香。

生蠔

外間好多做浜燒嘅，都會加蒜蓉、蔥花去吊味，呢度就少搞依類花巧嘢，務求令食客品嚐到海鮮原味。燒生蠔亦然，只加過丁點醬油。燒完嘅蠔無乜點縮水，蠔肉有肉地，質感嫩滑，蠔味不俗。

晌燒物一欄，小弟見到有一夜干，仲可以有半條叫，不過，老婆見其中有一道銀鱈魚，喺佢嘅至愛「飛弗」，已經好想點，所以，有機會先再會一夜干。

銀鱈魚西京 $168

百幾蚊一客，算幾大塊，而且，燒得焦香，擺盤亦都頗有意境。邊邊一抹就喺金山寺味噌，淨食確喺幾鹹吓。至於啲銀鱈魚，入口嫩滑無比，魚肉細緻，且極之油潤，喺好有質素嘅銀貨色。

野菜稻庭烏冬 $68

作為晚餐嘅最後，食事就揀咗稻庭烏冬，烏冬嘅口感好滑溜，咬落又有少少煙韌感；野菜有啲冬菇、本菇、黃牙白、露筍，都喺富天然味嘅健康食材，而湯底清帶甜，感覺約清新，飲到差唔多一滴都無。

福來丸 $78

嗜甜如我都比較少無甜品作結，而且，難得老婆都話好胃口，就一於揀隻「福來丸」試試。

「乜乜丸」明顯就喺以漁船為名，所以，上枱時都喺成隻「船」送上嚟。船內有3款蕨餅（原味、綠豆粉、抹茶味）、1款柏餅、3款雪糕（山葵味、雲呢嗱味、紅豆味），喺一隻非常多「漁獲」嘅漁船。啲蕨餅幾好食，軟軟糯糯，個人較鍾意灑綠豆粉；柏餅第一次試，有啲似豆沙糯米糍；雪糕方面，山葵味估唔到OK喎，層辣味只喺隱隱若若，點到即止而已，最愛都喺紅豆味雪糕，清甜堅紅豆味濃。

無論啲佐酒小食，抑或啲浜燒、銀鱈魚，都食得稱心。臨尾嘅甜品，更喺一客裡面試到多種唔同嘅口感及味道，性價比高。再者，招呼熨貼到位，不時幫忙添水、換碟，可謂推心置「福」，令我倆整晚都舒服自在！

個人評分
味道：9/10
環境：8/10
服務：8/10
抵食：8/10
平均每人消費：HK$620

餐廳資料：
福丸水產.浜燒.日本料理 Fukumaru Hamayaki · Omakase
荃灣川龍街118號百悅坊11樓全層
2116 3776