匯發中西美食坊：一期一匯

臨近年尾（農曆年）總會搞好多團年飯，家人、朋友、舊同學……等等，相熟嘅食友都唔例外，又喺一期一會嘅時間，是次由友人安排晒一切，自然感覺更輕鬆。意外嘅喺選址原來喺一家茶記，但就兼營私房菜。

晌地鋪左邊喺茶記範圍，右邊其實喺廚房、水吧，但就對出鎅開一個區域可以擺上兩圍做私房菜，格局比較街坊，若然喺做私房菜，小弟覺得有需要執執個地方。既然自詡為「中西美食坊」，個套餐嘅菜式都有中有西，不拘一格。半席推廣價賣$1,988，全包就唔使煩茶芥、加一啲雜費。由於份量十足，7-8個人都夠食。

匯發金牌乳豬

依家平時晌燒臘店買隻乳豬都要五、六百起錶，個套餐頭陣喺乳豬全體，都算足本。隻豬算唔錯，皮脆肉厚，唔算好肥。

秘制豬花膠伴薯蓉

所謂豬花膠即喺豬啲軟筋，有啲牛孖根咁，炆得都頗腍，卻保持咬口感，墊底仲有大量薯蓉，打得幼滑。

法國龍蝦肉配龍蝦汁意粉

睇落賣相有睇頭，因為眼見有唔少龍蝦肉，亦都幾爽口，不過，比預期失色，一來意大利粉有試微過腍，二來個龍蝦汁底非常淡。

金銀蒜蒸珍珠貝

金銀蒜蒸嘅惹味喺無庸置疑，但喺，以珍珠貝入饌，多少有將貨就價嘅感覺。貝肉很細粒，跟粉絲一同放入口 真喺唔覺食咗啲貝肉。

蜜餞炒牛柳粒

傳統中式菜餚，作為私房菜菜式就顯得有啲「普通」，幸好牛柳粒沾滿蜜餞，既香且腍，伴有唔少燈籠椒，有份清爽感。

紅燒海皇翅

唔再食真翅，就等友人齊來試試如何？大家就覺得用料十足，夾雜唔少蝦肉、竹笙、瑤柱絲，整體感覺不俗。

有機藜麥炒五蔬

非常健康嘅菜式，既喺素菜，又添加了大量藜麥，不過，味道就肯定喺清淡一啲，感覺寡啲，嚐試晌醬汁上作出調整，感覺會對胃口啲。

鮮露貴妃雞

一圍圍嘅菜好難少咗雞嘅登場，貴妃雞以上湯熨熟，口感份外嫩滑，單單沾點豉油，着實吊起雞肉嘅鮮味。

星廚單腳炒飯

唔喺好理解「單腳」何意，炒飯以煙三文魚、蝦肉、雞蛋、蔥花嚟炒，雖然爽身，但個人稍嫌咁嘅組合較單調，有欠特色。

有機藜麥金露

金露即喺南瓜露，打得滑溜非常，南瓜味亦突出，兼且少甜，唔加藜麥都咁正。

依家好多餐廳都加入私房菜菜單，不過，「私房茶」一詞小弟就認為用得比較濫，失去咗真正「私房」嘅意義。有時候，菜式可能喺用料奢華咗，但特色欠奉。當日用餐時間仲發生咗一段小插曲，可能樓面跟廚房晌溝通上出現啲問題，令茶餐廳嗰邊出菜產生啲混亂，正正就晌我哋身後傳嚟大大聲嘅對罵，讓人感覺唔喺幾好囉！

個人評分
味道：6/10
環境：6/10
服務：6/10
抵食：6/10
平均每人消費：HK$285

餐廳資料：
匯發中西美食坊
深水埗福華街188號地舖
2297 0180