深啡嘅木餐枱，配搭青綠色梳化椅，幾有種小叢林嘅氣息，而最喜歡喺近窗天花掛滿綠葉，雖然明知喺假嘅，但令餐廳睇起嚟更好睇，如果天花都掛多少少，整體感覺仲好。
依家好多餐廳都提供免費wifi，大多數都需要密碼，既然又開放俾客人用，但絕大部分都唔會擺個密碼出嚟，吓吓要問店員就嘥佢哋時間啦，「泰屋」就好喇，索性印埋問張枱墊紙度，唔使多此一問！
香港嘅泰菜館一向都提供好多款菜式，由頭盤、燒烤、湯類、沙律、蔬菜、咖喱、肉類、海鮮、飯品、粉麵、甜點都一應俱全，唔使點數，目測一次都睇出足足有過百款食物。
飲品方面，除有慣常見到嘅泰式特飲，如椰青、珍多冰、三色冰……之外，仲有一系列特色沙冰，以及啤酒、餐酒。
咖啡榴槤沙冰 $38
咖啡、榴槤兩種皆喜愛嘅食材，拍埋一齊整成沙冰，好奇之餘更期待會擦出咩火花。一啖入口，先喺香濃嘅咖啡味，之後再慢慢滲出榴槤香，平衡到喎，感覺幾過癮，無話好古怪核突，沙冰又打得夠細滑。
迷你小食雙拼 $78
除呢個小食雙拼，其實仲想試埋其中嘅酥炸南瓜條及碳燒茄子，巧合地前者賣晒，後者無貨。
雙拼有4款選擇：蝦餅、魚餅、素春卷、香葉包雞，揀咗蝦餅及春卷。前者炸得金黃，蝦餅酥香，蝦肉極之彈牙；後者外皮酥脆，入口完全無油膩感。最正喺個甜酸醬，酸香醒胃。
泰國金柚鮮蝦沙律 $92
既然標明喺招牌菜式，當然有興趣試吓啦，再者，我同老婆本身都鍾意食柚肉。賣相做得好靚仔，柚肉拆得大大粒，咬落都好爆汁，蝦肉亦去殼煎香過，爽鮮香。
呢個沙律我覺得最大特色喺啲醬汁，鹹鹹甜甜，嗒落有朕朕椰糖香，又混入蔥花、炸椰子片、蝦米仔、紫洋蔥及少少辣椒碎，所以，味道紛陳，推介。
原個椰盅海鮮焗飯 $82
菠蘿炒飯食得多，原個椰盅焗，唔喺未試過，喺少啲啫，所以，點一客試試，難得只喺賣80零蚊，定價相宜。
上枱嘅成品，跟餐牌張相唔對辦，直頭堆得高過張相嘅「樣本」呀，啲飯多到呢好似就瀉就瀉咁，夠晒2-3人享用。雖然唔喺炒飯底，但啲飯有朕椰油香味，裡面仲有啲椰子肉、雜菜粒、提子乾，小弟就覺得好香，但老婆就嫌有啲肥膩。海鮮包括青口、鮮蝦同魷魚，頗鮮味，食得出唔喺雪藏貨。
椰青肉綠豆糯米糍 $35
老婆話仲有少少位，咁就一於嗌多道細細哋嘅甜品過過癮，咪睇見「糯米糍」就想像好似湯圓咁樣，否則期望有落差。糯米粉做嘅餅皮入口軟糯，黐滿開邊綠豆，再放上椰青肉，賣相唔錯，口感雖然有，但味道偏淡，未得小弟歡心。
今晚喺閒日嘅星期一晚，估唔到坐吓坐吓爆晒場，菜式做得好，自然吸引到客人，喺不變定律。再者，取價實惠，也難怪咁嘅日子都有咁多人幫襯。
個人評分
味道：8/10
環境：8/10
服務：8/10
抵食：9/10
平均每人消費：HK$180
味道：8/10
環境：8/10
服務：8/10
抵食：9/10
平均每人消費：HK$180
餐廳資料：
泰屋 Sawadee Thai
旺角彌敦道726號2樓
2807 3366
泰屋 Sawadee Thai
旺角彌敦道726號2樓
2807 3366
沒有留言:
發佈留言