翻翻餐牌，印刷精簡，不過，見到唔少菜式油黑咗，店員話開檔初期，有啲菜式做唔徹，所以，精簡番少少，但睇落款式已經唔少。
為咗方便啲客睇，仲索性整咗張一紙A4紙過嘅菜單，咁就真喺易睇好多。
海陸豐菜茶 $48
既然喺賣潮汕嘢，有幾款潮汕小食就點都要點嚟試試，其中一款喺「菜茶」，睇菜牌嘅介紹，原來喺汕尾市一啲傳統節日小食，本身製作嘅工序有點煩複，又要刴菜，又要炒肉。
撈一撈原來都幾多料，除表面嘅花生、爆米花外，仲有啲海味、臘腸、肉粒、多種菜碎及粉絲，朋友打趣咁講，有啲似雜菜煲喎。其實都幾得意，有唔同嘅口感，湯底又挺清甜。
電影院小米 $28
餐牌就寫明喺8粒，但一上枱已睇落唔止，數數原來有10粒，新張期內老細話醒多兩粒過我，哈哈。外形不規則，咬落外皮煙韌，內裡有少少肉餡，唔錯，事後先知外樣喺用蕃薯粉做。
高第街牛肉餅 $28
睇餐牌嘅相片喺以竹簽串住，所以，初時仲以為送錯嚟。一客有8粒，其實用8片形容更貼切，而口感就猶如潮州嘅牛根丸咁，但就切成片狀奉客。
傳統蠔烙 $72
依度就無賣鹵水嘢，但就有蠔烙。佢哋嘅蠔烙用蛋較少，做得薄身，所以，有份香脆感，而啲蠔就落得一啲都唔手軟，又多又大隻，入口肥美，好食。
潮汕凍馬友 $168
大眼雞剝皮魚喺打冷嘅名物，依度就有一款凍馬友，以鹽包住嚟醃，凍食。不過，跟預期無咁理想，唔似食剝皮魚，肉質較腍，而且，偏鹹，餸粥就啱啱好，淨食就會覺得鹹咗啲。
麻辣雞煲 +$1
小店都搞嘅「開業福利」，就喺消費滿$100，加$1就送一客麻辣雞煲，我哋依啲發唔到達嘅就貪吓依類小便宜。滾熱辣嘅雞煲送到上枱超香，唔知喺咪送嘅關係，份量唔算多，但味道一流，極為惹味，而且，出乎意外辣勁點到即止，花椒亦落得適中，麻得嚟唔會太嗆，雞肉夠嫩滑。
方魚炒芥蘭 $62
幾款蔬菜揀個無咁油膩嘅，芥蘭唔苦，仲有啲甜味，加入方魚落去炒，令啲菜更香口。
砂鍋粥 $140
睇佢定價細鍋$118，大鍋$288，但啲配料又有個別價錢，都唔明點計，但店員一解釋就明晒，上述兩個價可以講喺最低消費，例如細鍋粥要兩款配料加埋唔過一百，就照收$118，但好似我哋呢鍋喺瑤柱 + 田雞 + 花甲夾埋$140，就收你$140。
好彩叫細鍋，因為細鍋送到嚟都一大鍋，分到成6-7碗，夠晒我哋4個人分。而且，堅多料，尤其啲花甲，大隻好肉，田雞就似乎少啲，落咗瑤柱就喺想令個粥底更甜。如果你食過潮式嘅方魚肉碎粥，口感就喺相類似，粥底綿綿哋，但又保持番原粒米花，少少驚喜位喺粥內混入馬蹄粒，添加一層口感，抵食！
部份小食確喺有點特色，小炒同雞煲亦做得夠鑊氣，而最突出喺鍋海鮮粥，喺成餐飯嘅亮點。小店雖然細，人多確喺有少計逼，但稱得上夠氣氛，菜式定價唔貴，又無加一，估計應以「街坊飯堂」定位，相信有得做。
個人評分
味道：7/10
環境：7/10
服務：7/10
抵食：8/10
平均每人消費：HK$140
環境：7/10
服務：7/10
抵食：8/10
平均每人消費：HK$140
餐廳資料：
米香園
觀塘宜安街1-7號地下E號舖
2813 2008
米香園
觀塘宜安街1-7號地下E號舖
2813 2008
沒有留言:
發佈留言