Beanswork：美味無Bean界

食友知小弟喺鮮奶咖啡嘅粉絲，所以，遇到啲有質素嘅咖啡店都會推介俾我。最近，就介紹咗一家晌銅鑼灣怡和街近尾嘅小店，話佢唔止做菜有誠意，而且，沖調嘅咖啡水準甚高，故此，約咗親友食晚飯，睇睇早前去咗花東嘅旅行相，就決定選址呢度。

走入店內，地方唔喺好大，加上鋪形有啲三尖八角，但幸而枱櫈排得唔太逼，樓底又高，故唔會局促。再者，利用燈光、小擺設，讓到帶工業風嘅裝修滲出絲絲輕鬆活潑嘅感覺。

店員送上餐牌，由於包晒膠，影出嚟有點反光。兩個主餐牌分別印有輕食、飲品、甜點及沙律、意大利麵、主食，選擇真不少。

另一個手寫嘅喺套餐餐牌，全日供應，所以，早晚同價。共4款菜式，選擇唔算多，定價為$88-$118，全部包餐湯及咖啡或茶。雖然餐飲有升級優惠，但只局限某啲飲品，並唔喺可以轉乜都得，不過，可以被我揀鮮奶咖啡就夠喇。

粟米湯

質感雖然有少少杰身，但粟米味好突出，好濃郁，跟罐頭湯始終有分別，就喺粟米打得幼細啲。

田園沙律

套餐寫明只有餐湯及餐飲，估唔到多咗份田園沙律，簡簡單單黑醋汁拌沙律菜及車厘茄，黑醋似喺煮過，所以杰身啲，又唔會得個酸字。

香辣茄蓉配匈牙利黑毛豬腸意粉 $98

啲意粉煮得好有咬口喎，最正喺掛滿啲香辣茄蓉，酸香得嚟嗰朕辣勁入口叫人好醒神，此外，糝滿巴馬臣芝士碎，添多份芝士香氣，就更討我芝心；而黑毛豬腸無話好特別，喺有層煙燻香，感覺不俗。

忌廉海鮮配飲管粉 $118

睇見佢話飲管粉，覺得有趣，所以想試試喺乜，外觀睇落比意粉粗身成個碼，有啲似意粉嘅米線版，入口同樣煮得有咬口，再細心睇睇，意粉中心真喺開窿，不過幼細到差啲睇唔到。個忌廉汁校得香滑，驚喜位喺加入咗絲絲蟹肉，食落仲發現灑咗啲檸檬汁，同樣刨咗好多芝士碎，味道有層次；而且，啲大蝦爽口彈牙，大蜆唔算大隻，但肉質肥美，食得稱心。

Valrhona Cocoa +$6

親友夜晚飲咖啡會瞓唔到，只好揀朱古力，但估唔到喺杯唔簡單嘅朱古力，首先照拉花整靚個賣相，拉花花紋細緻，三重心形都唔喺迤拉；味道香濃，口感幼滑，始終高成本用上法國品牌Valrhona嘅朱古力，喺質素嘅保證，可謂將朱古力嘅香味發揮得淋漓盡致。

Latte 

嚟Beanswork目的喺品嚐佢哋嘅鮮奶咖啡，所以，餐飲真喺無懸念。跟杯朱古力嘅拉花差唔多，都喺以心形拉花為基礎，可見水準相當穩定，花紋保持細緻。而奶泡撞入濃縮咖啡嘅手勢好，令每口咖啡入口嘅口感平衡，咖啡嘅香味亦好醇和，果然無介紹錯，呢度啲咖啡確喺沖得上乘。

從散點餐牌見，有幾款甜品，其實主要都喺睇餅櫃有咩為準，見是夜只有朱古力撻，仲得番幾個，並問過店員賣幾錢，只喺$30個，非常抵，所以，落單時叫店員幫我哋番起兩個。

香橙朱古力撻 $30

雖然只喺賣$30，但上碟時賣相都有處理過，絕對無「求其」。始終放咗晌餅櫃一段時間，撻殼薄而平均，卻無話好脆口，但餡心嘅朱古力味好濃郁，質感柔軟，更加入橙味，有啲似食積及橙餅嘅感覺。而面面嘅香橙乾唔喺得個睇字做裝飾，入口薄脆而富橙香。至於啲鮮忌廉唔喺伴伴碟咁簡單，一口朱古力撻，一小口忌廉，喺可以平衡番個甜度。

食物的確喺有質素，況且，定價真喺唔貴，又唔收加一。整體招呼好唔錯，食甜品會自動換過啲碟，又好似我點嘅忌廉海鮮配飲管粉，初嚟嗰碟原來有少少配料出錯，佢唔講我真喺睇唔出，結果唔喺回收加番啲料就算，直情成碟做過，喺一份誠意，值得推介嘅小店。

個人評分
味道：9/10
環境：8/10
服務：8/10
抵食：9/10
平均每人消費：HK$140

餐廳資料：
Beanswork
銅鑼灣怡和街23號樂聲大廈1C-1D號舖
2177 3555