一起果醬 Let's Jam：占占自喜

果醬！我就鍾意叫果占，因為，有種港式地道嘅感覺，又中又英嘛。以前好鍾意羅拔臣嘅檸檬占，不過，依家好難搵。小弟鍾意食麵包，亦鍾意食果醬，所以，舊年去咗一轉北海道，專登晌富良野到訪「ふらのジャム園」（富良野果醬園），嘩！啲果醬口味多到不得了，兼且好特別，而今晚嚟到「一起果醬」，同樣喺以獨特嘅果醬為賣點。

門面一身滴湖水藍，加上一邊擺出全部自家製手工果醬，另一邊放滿各式各樣小盆栽，未入去已有種田園氣息。踏進餐廳，氣氛不俗，仿如經過田園再走入一家小木屋，田園風嘅木枱、不拘一格嘅木椅，配以柔和嘅燈光，少少牆上嘅小擺設，裝修簡約。

餐廳尾喺水吧，後面就喺廚房，雖然水吧擺咗好多嘢，但感覺有條不紊，整整齊齊。頭頂嘅木箱，下面貼上唔同顏色嘅木板，都滲出點點原始味。

食物，就梗喺唔會得麵包同果醬啦，主餐牌分別有全日早餐、沙律、湯品、小食、前菜、意大利麵、意大利飯、烘焙包點、甜品及各樣飲品。原打算試試佢哋嘅全日早餐，因為有加入「果醬」成份，可惜，到訪當晚無供應。

此外，晚市仲另外供應晚餐，一共6款，散點或套餐形式都得，如選擇套餐則包括田園沙律、是日餐湯、主菜及甜品，定價為$199-$239 +10%，飲品有半價優惠。

溫馨提示，繁忙時段用餐時間為90分鐘。

田園沙律

好簡單嘅一道田園沙律，單單就喺沙律菜加車厘茄，啲沙律菜頗新鮮，較特色嘅喺配熱情果油醋汁，酸爽醒胃，仲有少少果肉，並灑咗丁點芝士碎。

是日餐湯

餐湯有羅宋湯及野菌忌廉湯供選擇，我就較偏愛後者多啲。個湯下咗唔少忌廉，啱晒我，入口香滑富菌香，湯內又保留少少菌粒，不俗。如果，加一片多士配一款手工果醬就更好嘞！

蒜辣青檸醬焗龍蝦配龍蝦汁意粉 $139（散點價） / $199（套餐價）

揀呢道意粉真喺無揀錯，有半隻波士頓龍蝦，貨真價實，鋪滿蕃茄蓉，好鮮活，不過， 蒜辣、青檸嘅味道就唔太突出；

然而，超多蝦膏，蝦肉亦好爽口，蟹鉗處理過，好易拆走個殼，入口啖啖肉，另有意粉中混入唔少蝦肉粒，所以，唔單單得龍蝦嗰幾啖肉。再者，意粉嘅份量頗多，又能夠煮到恰好處，咬落有嚼勁，條條意粉掛滿汁，抵食。

套餐本身包法式焦糖焗蛋，但可加$15轉是日蛋糕，見餅櫃擺放咗3款蛋糕：朱古力脆脆、朱古力蛋糕及檸檬撻，以最後者較吸引，燉蛋雖然都啱食，但檸檬撻更想試。

檸檬撻 +$15

面層加咗烘蛋白，令整件撻嘅賣相更有層次，望落唔會咁寡，而啲烘蛋白入口輕盈軟綿，好有綿花糖嘅口感；中間滿滿檸檬果蓉，既清新，又果香味濃郁，唯一挑剔喺撻殼唔喺脆底，只可以講喺鬆化。

玫瑰蘋果奶昔 $21（跟餐半價）
之前睇啲食評已好想試搵果細3做嘅奶昔，不過，原來唔喺款款果醬都可以用嚟做，故原本選嘅蛋黃菠蘿唔得，就改以玫瑰蘋果。好有玫瑰香，但蘋果味就弱啲，奶感個人亦覺得唔夠強，未有預期般好。

上文提過嘅「ふらのジャム園」（富良野果醬園），都想借個地方介紹吓，店內唔單止有成30多款果醬，而且，不少口味獨特，平常少見，如黑實鶯神樂（Hasukappu）、大黄（Rhubarb）、紅菜頭（Beetroot）、甘筍（Carrot）……等等，最正喺備有麵包及餅乾供各款果醬試味，慢慢試啱先買。

如果太多口味實在試唔晒，又唔知點揀，就簡單啲不妨晌10大人氣榜着手。

細心留意，會發現佢哋啲餐具都好精緻，另外，服務好好，逐道菜上，唔急唔慢，唔會放到一枱都喺嘢食，讓客人食得稱心。因為被朋友臨時甩我底，得一支公都照食，第二日話番佢知有幾好味，等我可以沾沾自喜一番。

個人評分
味道：8/10
環境：7/10
服務：7/10
抵食：7/10
平均每人消費：HK$260

餐廳資料：
一起果醬 Let's Jam
尖沙咀松山道15-17號地下D舖
3956 5646