咖喱葉 Curry Leaf：印度美味新一葉

都好耐無食過印度嘢喇，一時慶起，撞啱老婆有要事唔開飯，摘日不如撞日，就搵咗老友陪吓小弟去食餐印度飯，原來老友都鍾意印度菜。香港有唔少印度餐廳，晌網上搜集吓，就發現有超過160家，可見都幾多人鍾意印度菜，而且，以前到訪過嘅都喺印度裔廚師，印度裔侍應，今晚到訪嘅「咖喱葉」都喺一樣。

依家去啲印度餐廳，大多數都裝潢摩登時尚，只喺擺多少少象徵印度嘅小擺設及掛畫。餐廳分地下及樓上兩層，地下層設有酒吧，故地方顯得唔大，座位亦唔多，感覺有少少逼，但配以舒服好坐嘅梳化椅，牆上嘅大電視又不停播放印度MTV。

而樓上只有用餐區，地方顯得闊落啲。最估唔到，有唔少本地客，而且，似喺熟客，因為一入門口就同店經理打晒招呼，有講有笑咁。

雖然店員全喺外藉，但店經理識廣東話，簡單點菜用廣東話都無問題。餐牌亦中英對照，部份有圖示，大不了手指指點菜，再者，所有菜式都有代號，更唔使太擔心點菜問題。離開時見門口有啲單張，索性上載出嚟俾大家參考仲清楚。

但最估佢唔到，小小一家店，由湯品、前菜、印式燒烤、咖喱、印度香米飯、印式炒飯、印度薄餅及煎餅、配菜、沙律、甜品、飲品，甚至有少少特色中國菜，雖然都喺雞羊菜魚蝦之類，菜式卻喺過百款，做法亦多元化。

除主餐牌內嘅飲品，仲有唔少啤酒、紅白餐酒及烈酒供應。

胡椒餅（Papadam）

甫坐低無耐，除遞上濕毛巾抹手（以便印度人用手食飯），就會送上一小籃胡椒餅，件以三款醬：印度辣醬、薄荷醬及雜菜辣椒醬，胡椒餅超薄超脆，又有黑胡椒香，最睇唔出啲雜菜辣椒醬喺勁辣。

羊肉咖喱角（Mutton Samosa） $40

印式嘅咖喱角跟我哋港式咖喱角喺兩樣嘢，三角錐體嘅咖喱角喺常見嘅印度小食，口感比較酥化。今次揀羊肉，裡頭填滿羊肉及青豆，因為下咗唔少香料，所以，啲羊入口完全唔羶，又幾特別。

唐多里燒烤大拼盤（Tandoori Mixed Grill）$210

印式燒烤唐多里（我較鍾意譯天多尼）喺眾多印式食物嘅心水，因為經多種香料香料、乳酪醃製再燒，寧舍香噴噴，因為心多，所以，揀咗個大拼盤，嘩！一送上枱，熱力四射，而且，原來都好大份，包好多嘢，唐多里烤雞、燒烤羊肉卷、印式碳燒魚塊、印式烤雞塊、燒烤大蝦。

最正喺啲烤雞，有雞胸，有脾位，後者肉質更嫩，而且，非常入味，外層帶點焦香；羊肉卷大大件，食得過癮，魚塊入口嫩滑，燒得甘香；反而啲大蝦就失少少，焦香有蝦味，不過，口感就唔夠爽彈喇。

唐多里烤雞

燒烤羊肉卷

印式碳燒魚塊

燒烤大蝦

瑪莎拉咖喱蝦（Prawn Masala）$140

天多尼之外，瑪莎拉又喺不可或缺嘅心水菜式，瑪沙拉喺混合多種具芳香性嘅香辛料所做，喺印度料理嘅萬能香料，所以，做出嚟嘅咖喱汁會芳香帶微辛，配印度烤餅絕對喺天衣無縫嘅組合。而裡面嘅鮮蝦可不少，好似撈極都有，雖然蝦肉唔算好爽身，但沾滿瑪莎拉咖喱汁，確喺惹味非常。

蒜蓉烤餅（Garlic Naan）$25

點咗瑪莎拉咖喱，唔點一客印度烤餅真喺講唔過去，餐廳提供嘅烤餅款式非常多，最揀番店員推介嘅蒜蓉口味。雖然一客只得3片，但片片都非常大塊，口感煙韌富蒜香，沾埋啲咖喱真喺正到痹。

印式芒果酸奶（Mango Lassi）$45

到印度餐廳，芒果酸奶近乎喺小弟二話不說之選，仲記得好多年晌元朗嘅「石崗咖喱屋」，杯芒果酸奶講明用上印度阿芳素芒果，清甜得無譜。今回杯芒果酸奶水準亦唔失禮，單單只用鮮芒果肉跟乳酪打成，芒果味香濃，滲出乳酪嘅酸香，大大杯，抵飲。

印度瑪沙拉茶 （Indian Masala Tea）$35

瑪沙拉茶亦喺富特色嘅地道飲品，標明以小壺盛載，足有2-3杯份量，雖然樣似，但跟我哋飲嘅港底奶茶好唔同，茶底唔會好濃，但就有一層獨特嘅芳香，正正就喺瑪沙拉香料氣味，入口好有一種舒緩感。

印式雪糕（Kulfi）$35

小弟稱得上啫甜之人，不過，對於印度甜品觀感都喺一般般，除偏甜，口感亦有啲古古怪怪，好似玫瑰奶球口感好似食海綿。小弟就無打算點甜品，但友人就想試試印式雪糕，反正喺雪糕，應唔會太古怪吧！一客有兩個，店員好貼心，將兩個分兩碟上，雪糕加咗唔少開心果仁碎，增添口感，而雪糕本物質感較實淨，甜得嚟喺有種煉奶味，喺有啲偏甜，但口感OK喎！

上文都講過，餐前會有熱手巾抹手，餐後亦有。而且，整晚嘅招呼非常好，好多細節位男侍應都做到，好似雪糕分碟上嘅例子啦，友人點瑪沙拉茶，亦會問佢即時上定餐後上，此外，添水、收碟……等等均做到足。

雖然餐廳位處偏少少嘅茂林街，但離地鐵站近，店內環境舒適，菜式選擇又夠多，最緊要喺做菜有水準嘛，兼且定價唔算高，招呼一步到位，讓人食得稱心滿意。

個人評分
味道：8/10
環境：8/10
服務：9/10
抵食：8/10
平均每人消費：HK$200

餐廳資料：
咖喱葉 Curry Leaf
佐敦荗林街16-18號荗林商業大廈地舖
8100 0911