雖然走文青咖啡店路線，但無wifi、無不含咖啡因咖啡、無脫脂奶供應……夠晒個性。而翻閱餐牌，食物選擇可不少，餐湯、沙律、小食、自家製漢堡包、三文治、意粉，以及不同嘅咖啡、熱茶、花茶……等等。而單點漢堡包（唔知三文治得唔得）、意粉類，可另加是日餐湯、是日沙律、原味薯條、英式香腸、凍柚子梳打 / 紅茶，$30外加兩款，$40外加三款。
是日沙律
喺普普通通嘅田園沙律，沙律菜搭啲蕃茄粒，無乜醬汁，無咩賣點，但猶幸啲沙律菜都新鮮爽脆。
是日餐湯
南瓜忌廉湯色澤橙黃鮮色，味道幾對辦，南瓜味都突出，不過，質感少少偏稀。伴一小片蒜蓉包，不過不失咁啦。
英式香腸
咁啱得咁「橋」，一客有3條，啱啱夠我哋3個分。喺英式香草豬肉腸，腸衣有少少脆口，咬落肉質挺實淨，唔喺溝粉嘅貨色，而且，幾濃香草味。
意大利風乾火腿配水牛芝士香草包 $88
雖然製作簡單，但屬用靚料嘅高水準嘅包作，生菜、蕃茄墊底，加入一大片油潤鹹香嘅風乾火腿，而水牛芝士亦落得一啲都無手軟，配上香草醬，令本身無乜味嘅水牛芝士味道有層次；包身好軟熟，不過一般意大利香草包都喺帶香草味，但呢個就加入蕃茄味元素，伴菜仲有啲酸青瓜可加埋嚟食，又令味道多變咗。
卡邦尼意粉 $78
佢哋嘅卡邦尼喺無加蛋嘅版本，加唔加其實都無所謂，意粉嘅口感都OK，唔算好咬口，但亦無出現過腍嘅情況。意粉內混入唔少蘑菇片同煙肉碎，其實食味唔錯，不過，醬汁太杰，令到啲意粉有種糊糊哋嘅感覺，睇番唔少人嘅食評都喺咁，足證大廚可能喺個幾自我嘅人，或者，佢哋唔會檢討吓自己做菜嘅穩定性。
香蒜蘑菇蟹肉扁意粉 $88
對比起碟卡邦尼，呢碟蟹肉扁意粉就高兩班水平，扁意粉依然煮得恰到好處，醬汁亦無過杰，帶有濃香嘅香蒜味，此外，添咗啲蟹籽，口感嘅層次自不然強咗，最正喺意粉內有好多蟹肉，而且，幾鮮甜，好食又抵食。
完咗正餐，都傾咗一輪偈先落去甜點時段，蛋糕配咖啡喺另一段美妙時間。是日蛋糕，共有6款，最欣賞喺每個餅有透明膠盒冚住，以保「新鮮度」。唔知喺自家製，定喺攞貨，但至少外觀吸引，以大細、質素而言，定價就唔算便宜，無任何加配優惠，單點每款$38。
朱古力慕絲 $38
之前所有菜式晌賣相方面都無咩亮點，本來就想讚吓佢哋嘅甜品賣相花咗少少心思，畫吓花，寫吓字，但兩碟嘅字都喺店名kubrick，硬銷又無誠意。之前晌餅櫃睇唔到個慕絲蛋糕餅心喺點，原來喺朱古力慕絲層夾海綿蛋糕，佔嘅比例一半一半，所以，朱古力味主要都喺靠面層嘅朱古力軟漿，整體小弟就認為不過不失，完全無驚喜。
北海道牛奶芝士蛋糕 $38
呢個好食好多，唔喺話因為用咗北海道牛奶，而喺味道突出，面層以北海道牛奶做咗層軟漿，幼滑富奶香，而下層嘅芝士蛋糕，柔軟富芝士味，兩者一甜一鹹，平衡無違和感。兩道甜點都唧咗啲忌廉，查實有點多餘。
鮮奶咖啡 $40
我同一位朋友都喺揀鮮奶咖啡，店家強調選用公平貿易有機埃塞俄比亞咖啡豆，呢樣喺一件好事嚟。先評評拉花，感覺喺徒有技巧，我哋兩杯都唔喺好肯定咩圖案，而且，線紋亦唔夠細緻。幸好，咖啡入口香醇之餘，晌唔攪嘅情況下，口感均勻。
意大利泡沫咖啡 $40
平較少見泡沫咖啡都做拉花，所以，送嚟嘅時候都問清楚有無送錯。友人就覺得泡沫未夠豐厚細緻，咖啡味道都還可以，唔算一杯出色嘅意大利泡沫咖啡。
招呼OK嘅，不過，餐廳內喺唔俾用「相機」影相（限公眾範圍，枱上食物無限制），反而手機就任影，店員話因為店內有啲產品有版權，但手機比較普及，咁嘅解釋真喺有啲難以理解，相機原來喺咁「罕見」唔普及嘅器材，哈哈，但位店員都有禮咁講嘅！此外，餐廳嘅冷氣喺調校到頗凍嘅程度，解釋只有一個，凍到你坐唔得幾耐囉！
個人評分
味道：7/10
環境：7/10
服務：6/10
抵食：7/10
平均每人消費：HK$160
味道：7/10
環境：7/10
服務：6/10
抵食：7/10
平均每人消費：HK$160
餐廳資料：
Kubrick
油麻地眾坊3號駿發花園H2地舖
2384 8929
Kubrick
油麻地眾坊3號駿發花園H2地舖
2384 8929
沒有留言:
發佈留言