Andy's Garage：墨墨付出

近年聽到啲朋友講去南美洲旅行，甚麼秘魯天空之城「馬丘比丘」，玻利維亞天空之鏡「烏尤尼鹽湖」……一個又一個靚絕景點，不過，細看啲飛行時間，旅行成本，就真喺卻晒步，有生之年唔知有無機會到訪南美。至於南美菜，亦喺接觸得甚少，相對較多嘅喺墨西哥嘅烤卷。今晚嚟到大坑嘅「Andy's Garage」，又可重溫依一種美食。

走入新村街，都幾易認出Andy's Garage，因為門面大大位黃色招牌，畫上載住墨西哥闊邊帽嘅小辣椒。餐廳屬小店格局，地方唔大，呈窄長形，但裝修上有唔少有趣位，如五顏六色嘅木枱、色彩鮮豔嘅牆磚……等等，甚具異國色彩。

Garage一詞解車房，除鋪面招牌位有個「揼把」之外，裡面直頭擺咗的士嘅一邊車殼，非常抵死。

雖然喺小店咋，食物選擇可不少啊，有湯品、沙律、頭盤、自選配搭墨西哥特色菜、漢堡、意大利飯、披薩、意大利麵、……等等，一應俱全。

近廚房出菜位，更有有黑板列出多款是日推介嘅墨西哥特色菜，無心水嘅話不妨晌依度揀一吓。

飲品更意外地仲有雞尾酒供應，唔喺單單啤酒、果汁咁簡單。

我哋都喺講健康，所以，先點一客沙律，沙律嘅選擇共有3款，點咗最簡單凱撒沙律。

伊沙凱撒沙律 $88

估唔到個份量又幾多喎，個沙律有羅馬生菜、煙肉、香草包粒、巴馬芝士、沙律醬，而個醬唔喺就咁唧啲沙律醬，食落喺有調配過，將啲沙律醬跟所有食材撈勻，味道唔錯，啲菜爽脆食落嗦嗦聲，煙肉更切成粗條，落得慷慨。

餐牌有一欄自選配搭墨西哥特色菜，有墨西哥薄餅卷、芝士鍋、墨西哥式鐵板、墨西哥餅、玉米片，並可選擇配雞肉、豬肉、牛肉、烤蝦或羞雜菜，定價都喺$98-$178。

西哥薄餅卷配烤雞肉 $158
雖然，一客墨西哥薄餅卷賣得唔平，但食過你就知佢份量十足，絕無欺場。就算切開兩半，每件墨西哥薄餅卷都好墜手，裡面塞滿餡，一啲虛位都無，烤得熱辣熨手，外皮有陣陣脆口感，再咬落就煙韌有咬口；內裡捲有芝士、焗豆、烤雞肉，多到爆晒餡，鹹香惹味，口感豐富，真喺味道跟口感都咁一流。

此外，伴碟喺有墨西哥玉米片配牛油果醬、酸忌廉、蕃茄粒。一次過將3樣配料搽晌玉米片上，味道紛陳，牛油果醬搓得幼滑，酸忌廉吊出少少鹹味，蕃茄粒增加鮮活感。

Fresh Mango Juice $25

我哋不約而同揀飲芒果汁，雖然話喺鮮芒果汁，應該都加入少少糖水之類，因為純芒果汁應該會太杰身。不過，個芒果味頗清甜，質感亦都不俗。

大坑確喺有好多特色食店，不過，是夜嚟到，感覺呢區靜咗好多。有啲往常名字熟悉嘅店舖，亦都執咗，剩低嘅小店都喺繼續為食客默默付出，所以，有機會嚟食餐墨西哥菜，「墨」失良機啊！

個人評分
味道：9/10
環境：7/10
服務：7/10
抵食：8/10
平均每人消費：HK$165

餐廳資料：
Andy's Garage
大坑新村街14A號地舖
2267 9023