睇睇餐牌，除散點餐牌外，仍然有3款唔同價位嘅二人套餐，不過，以上次光顧嘅經驗，啲二人套餐嘅份量喺夠晒3個人食。而今次我哋就當然瞄準個斧頭扒套餐啦。
斧頭扒套餐賣$1599 + 10%，包兩款頭盤：煎帶子及珍寶蝦雞尾杯，主菜喺32安斧頭扒拼龍蝦尾，再以蜜桃金寶作結。不過，就唔包飲品，如果飲得酒嘅朋友，就最好點啲紅酒配襯。
Garlic Bread
落好單，先嚟份麵包籃過吓口癮，一大個農夫包，唔會跟牛油或油醋，皆因個包做好晒香蒜餡，搣開一片，香蒜味湧出，又夠熱辣，外皮香脆，包心綿密，誠意十足。
Pan Seared Scallop
一客只有3粒，如果4個人嚟食依個餐，有無可能會俾4粒呢？哈哈！鮮帶子喺刺身級，大隻就唔在講，煎得底需帶脆，咬落肉質卻喺好柔嫩，而且味道鮮甜，伴有芒果莎莎，可謂相得益彰。旁邊仲有一小杯梅子果凍粒，雖然夾埋啲帶子一齊好似互無相干，但啲果凍粒本身又約好食，酸酸甜甜，好香梅味。
Jumbo Shrimp Cocktail with Cocktail Sauce
以雞尾酒杯盛載凍蝦，配上滿滿嘅沙律菜，賣相清新。啲凍蝦果然好大隻，口感冰涼爽彈，沾一點自家調校嘅雞尾醬，酸香鮮活。
USDA Tomahawk 32oz & Lobster Tail in Bovini Style
主菜斧頭扒卒之震撼登場，成日聽人講斧頭扒有幾大巨，有幾大，今次就親身第一次見，32安嘅份量唔喺浪得虛名，睇我食完揸住支骨影張「合照」，就知有幾堅。
件牛扒極有質素，落刀嗰下已感覺到啲肉嘅柔嫩感，切起嚟真喺好似唔使用力咁。幸而我哋都食得較生，要五乘熟，燒出嚟火喉恰到，外層焦脆，裡面一點血水都無，卻仍然保持嫩紅；入口口感軟腍唔在講，肉味濃，又極富肉汁，水準非常之高。
而龍蝦尾亦燒得爽口，只不過，一截龍蝦尾3個人分，每人只有一小口，實在唔夠過口癮。
另外，仲有一件炸芝士餅，初頭我哋仲以為喺魚柳，但又唔見餐牌有註明。不過，件炸芝士位又幾好食，脆口不膩，啲芝士好綿柔，滿滿嘅芝士香味。
Peach Crumble
咪以為一個巨型套餐只包一款甜品會唔夠食，佢啲甜品好大份，上次嚟已試過佢哋嘅Molten Chocolate Cake，就心裡有數，亦知道水準不賴，今回套餐包Peach Crumble，自然信心十足。
份Peach Crumble喺咪好巨型呢，成個小蛋糕咁，4個人共享都無問題。面頭嘅雲呢嗱雪糕睇到點點雲呢嗱籽，可知無欺場，入口軟滑又富奶香。而啲金寶脆到「咯咯聲」，但個人而言，有啲欠牛油香；底下滿滿嘅蜜桃果肉，頗香甜，夾埋啲雪糕一齊食，一冷一熱，認真滋味無窮。
總結，我哋3個人食，真喺食到好飽，飽嘅程度應該喺到心口，如果4個人嚟，相信食得啱啱好，萬一唔夠先加啲散點。綜觀啲食材，都喺用料不賴，尤其件扒，師傅嘅手勢又好，服務方面亦恰到好處，不時講解一下啲食材，又會詢問吓客人意見，有被尊重嘅感覺。
個人評分
味道：9/10
環境：8/10
服務：8/10
抵食：7/10
平均每人消費：HK$590
味道：9/10
環境：8/10
服務：8/10
抵食：7/10
平均每人消費：HK$590
餐廳資料：
Bovini Steakhouse & Bar
大坑銅鑼灣道128號地舖
2886 9381
Bovini Steakhouse & Bar
大坑銅鑼灣道128號地舖
2886 9381
沒有留言:
發佈留言