山區裡的走走趯趯: Fûhn：粉．發圖強

2017年8月8日星期二

Fûhn：粉．發圖強

幾年前晌中環食過一間精品越南粉麵店「越裸（Le Pho）」，啲湯河做得幾精，可惜無耐結業收場，未知喺咪租金貴？最近，無意發現銅鑼灣都出現一家精品越南粉麵店，主力都喺賣越底湯粉、撈檬，加少少小食，名字叫「Fuhn」，讀起嚟好似好繞口，睇完餐牌於知佢意思喺「湯粉」。

因為餐廳位處商廈一樓，行樓梯好過搭電梯。基本上無乜門面，一出電梯就喺餐廳，一到步嘩已經坐滿人，等位嘅都唔少，可以講喺場面墟撼。環境裝修簡潔明淨，香港鋪租貴，就算上咗樓都難免想多做啲生意，所以，理解到枱櫈都會拍得「親密」啲。故此，溫馨提示，唔好同男友或女友密密私語，因為逼不得已被「竊聽」。

依家好多餐廳都提供免費wifi，呢度都唔例外，大大個牌就放咗晌吧位之上。

甫坐低就會送上佢哋嘅「三寶」：魚露、配料及香草，魚露唔使多介紹，食撈檬必備，配料喺啲銀芽、青檸、辣椒俾客人稍作調味。

較特別就喺一大杯香草，全部新鮮貨色，目測估計有6、7種。唔識佢哋唔緊要，店家貼心有個專介紹香草嘅單張，有晒相，亦列明特性同功效，八啩吓無妨，更不妨摘啲放湯，隨時有意想不到嘅清新效果。

枱上嘅餐墊紙就喺餐牌，大類分為湯粉、撈檬、飯、輕食及飲品，餐廳推介及素食選擇都另有標示，而6:00pm前免加一服務費。最有趣喺湯粉一欄，份量可選正常、大、加大，粉底可揀金邊粉或河粉，唔講就設定為金邊粉。

牛油果奶昔 $48

牛油果汁晌肯亞都飲過一次，就算牛油果打為奶昔，亦唔覺意外，但香港地就真喺好少餐廳會做，因為牛油果本身喺質感特別，味道唔重，而且，買到又靚又夠熟嘅唔易，一熟咗又好快爛。

杯牛油果奶昔都幾大杯，色澤清翠，入口口感極之滑溜，但喺奶味偏重，近乎冚過本身唔喺味重嘅牛油果味，估計喺件牛油果未夠熟所致。

鮮蝦米紙卷 $58

一向都頗喜歡食越南嘅米紙卷，尤其夏天，貪佢入口夠爽。晌輕食類中，就有素菜（$48）、鮮蝦（$58）米紙卷，同樣一客4件。

米紙卷十分薄透，口感煙韌清爽，捲住生菜、米粉、青瓜、甘筍同鮮蝦，淨食嘅話，味道較清淡，但伴以花生醬就好有畫龍點晴之效，而且，嗒落有些微辣辣哋，事後先知原來混入咗「是拉差」辣醬，然而，唯一挑剔喺啲米紙卷捲得有點鬆散。

特色牛湯粉 $98

店中嘅湯粉分有牛湯、雞湯及蕃茄湯，牛湯就自不然配番牛肉、牛坑腩等食材，而雞湯就配番雞絲、雞胸等食材，蕃茄湯就主要配時令素菜，專為素食者而設。亳無懸念，想一次過試多啲嘢，就最理想揀「特色牛湯粉」，因為一次過集齊6款牛食材：生牛肉、牛坑腩片、牛筋片、手打牛丸、牛腩邊、牛栢葉，等同平常見到嘅「火車頭」，絕對喺牛魔王嘅必食之選。

真喺唔講得笑，唔只餸料款多，湯底下有好多金邊粉，份量相信夠兩個女生食。先飲啖湯，香得嚟唔會好似日式豬骨湯咁漿口，可以講喺濃而不濁，絕無欺場；講到餸料，樣樣都出色，生牛肉喺安格斯貨色，細緻嫩滑，牛坑腩片軟腍，帶少少油脂有份羶香，牛筋片夠嚼勁，手打牛丸口感有啲似牛根丸，鬆化彈牙，牛腩邊充滿肉香，喺覺得啲牛栢葉切得太細碎；至於啲金邊粉口感幼滑，瀡一聲就滑落喉嚨。