The Story Cafe and Bakery：湖水下慢活晚餐

每間餐廳都有自己嘅故事，是晚嚟到青衣城嘅「The Story Cafe and Bakery」唔知背後有咩故事，但既然親友約我有嘢傾，佢自然喺有啲故事。地點由我發辦，當然搵啲就到大家嘅地方，就算唔喺文青，都一樣喜歡咖啡店，呢間「The Story」未試過，就決定嚟依間。

裝修一睇就知走清爽路線，白櫈配淺木系餐枱，淺色紅磚牆，加上樓底高，感覺舒服。

最特別哋將天花油成湖水藍，再加設繩網作漁網，吊上假魚，營造出海洋嘅感覺，頗有趣。細心留意，原來仲有隻小船添！

睇見鋪面有餅櫃、麵包櫃，就知除堂食，亦有零售生意。

雖然餐廳以Cafe命名，但菜式唔會淨喺得咖啡、輕食，一概以套餐形式為主，巨型餐牌印有早餐、午餐、下午茶、高茶、晚餐等唔同時段供應嘅套餐；此外，仲有歡樂時光嘅散點小食，以及多種甜品，對女生嚟講極之吸引。

而飲品方面，選擇多多兼有特色，咖啡、花茶以外，仲有朱古力、牛奶、沙冰、特飲，甚至啤酒、生啤及餐酒竟然都有供應。

順帶一提，面書讚好，或跟蹤其IG + 上載食物照，全單9折，無理由唔攞啫！

晚餐，共有6款選擇，其實唔算多，期望喺貴精不貴多嘅取態，定價都喺$98-$148，已包是日餐湯或沙律，以及基本餐飲。升級優惠就有+$18配是日甜品，+$20配指定特飲，半價配任何芭菲。

是日餐湯

今晚嘅餐湯喺周打魚湯，賣相、味道都唔算有咩特別，但稱得上穩打穩紮，質感滑溜又有唔少魚塊。

餐包

隨湯送上仲有餐包，兩個小圓包，一個黑芝麻，另一個喺燕麥，睇包身裡邊嘅氣孔，就知口感有幾鬆軟喇。

田園沙律

簡簡單單嘅沙律菜、車厘茄，伴點芝麻醬，啲沙律菜夠新鮮，夠爽脆，我都算叫收貨。

黑松露烤啡菇法國邊豆闊條麵 $98

主菜要一客闊條麵同一客肉眼，烤啡菇切成條，唔喺原隻上，無咁有睇頭，但食落爽滑有咬口，香濃多汁，而啲法邊豆亦好爽脆；再者，闊條麵煮得啱啱好，有嚼勁，個汁底充滿黑松露香味，整體做得有水準。

美國一級穀飼牛肉眼配牛油香草汁 $148

美國一級穀飼牛嘅質素應該唔差得去邊，雖然無講有幾多安士，但上到枱塊扒嘅份量絕對唔少嘢，因為成塊面咁大，親友同我都食得生，所以選五乘，切出嚟嘅肉眼真燒得幾誘人，色澤粉嫩，入口軟腍富肉味，沾點香草牛油，就更加油香十足，而且筋位少；伴碟嘅薯菜亦無話求求其其，唯一挑剔喺啲薯角墊底，食嘅時候腍晒，失去香脆感。

抹茶忌廉咖啡 +$20

好期待嘅組合，究竟抹茶、忌廉、咖啡喺點配合呢？送到上枱，絕對喺呃讚嘅賣相，淨喺隻杯都靚爆啦，一撮忌廉浮晌奶泡之上，灑下抹茶粉，高貴極了，佢正正喺唧下大嚿鮮忌廉嘅「維也納咖啡」抹茶添加版，呢種咖啡並非人人都啱，因為飲法真喺先嚐個忌廉，再細味咖啡，並非將兩者攪埋一齊，鮮忌廉較肥，唔喺人人喜歡。飲落雖然我都OK，不過，維也納咖啡本身亦唔喺我杯茶。

青丘（抹茶紅豆牛奶） +$20

賣相好清新，打橫望一層疊一層，層次分明，跟名字好相襯，依次由上而下喺奶泡、抹茶牛奶及紅豆，親友話入口好輕盈，再飲落去抹茶牛奶香滑且有淡淡抹茶，而底下嘅紅豆非常清甜，確喺一杯出色嘅作品。

藍莓軟芝士蛋糕 +$18

是日加配嘅甜品喺藍莓軟芝士蛋糕，晌鋪前嘅餅櫃所見，散買要$35件，依家算喺半價優惠。件蛋糕外觀唔錯，芝士餡心跟藍莓醬做成少少雲石紋，食落芝士餡柔軟，帶淡淡藍莓清甜味，而個消化餅底做得薄而平均，令今餐完美作結。

親友嘅故事不知是喜是悲，但正面嘅人永遠睇自己有半杯水，負面嘅人永遠覺得自己無咗半杯水，其實，俾一杯你又如何，懂珍惜才有意思。

個人評分

味道：8/10
環境：8/10
服務：8/10
抵食：8/10
平均每人消費：HK$155

餐廳資料：
The Story Cafe and Bakery
青衣青敬路33號青衣城1樓117號舖
3105 1825