GOCHISO：溫情洋．日

主打日式x地中海嘅GOCHISO，不經不覺落戶香港近兩年，先後開咗4家店，算成績唔錯。第一次同朋友到沙田店食晏，感覺唔錯，菜式配搭帶點清新、新派，是夜約咗老婆同表姨甥女聚餐，佢哋都算喜歡試新嘢嘅人。知道GOCHISO銅鑼灣都有分店，地點非常就腳，就一嚐特色嘅混合菜。

餐廳位處皇室堡二樓，如沙田店一樣，地方非常闊落，由於門面挨住商場採開放形式，所以，感覺更「開揚」。裝修以木系為主，牆身鋪上紅磚，有股歐陸小屋溫情洋溢嘅感覺。最得意喺天花掛上用酒樽做嘅「燈飾」，非常別緻獨特。整體氣氛悠閒，感覺舒服。

仲有少少印象，知道佢哋喺以日本及地中海嘅融和菜為主打，更以天然、新鮮食材配合健康烹調手法做菜為賣點。跟上次比，菜式都轉咗唔少，而類別包括：沙律、西班牙式小食、湯品、意大利麵、薄餅、飯品、西班牙海鮮飯、燉菜、甜點及多款飲品，選擇非常多，定價亦唔算貴。再者，圖文並茂，製作貫徹日本人嘅心思及認真。

此外，仲有個期間限定嘅菜牌，唔想煩諗食咩嘅朋友，不妨晌度睇睇有無心水。

套餐喺大多數人喜歡嘅取向，因為一般嚟講，套餐通常都比散點嘅抵。餐廳提供3種套餐，分2人、3人，每款餐都有好多菜式選擇，為起人均消費都喺百五左右。點解無4人、6人……嘅，哈哈，加數問題啫，4個人咪點兩份2人餐囉。

Japanese Sakura Green Tea $38

老婆鍾意熱茶多過凍飲，櫻花綠茶感覺好似幾特別，綠茶喺以茶包開沖，不過，倒出嚟嘅茶色比較淡，而入口比一般綠茶仲要淡味，亦唔喺好覺有啲櫻花嘅香氣，老婆都話麻麻哋。

Fresh Mango Mojito $38
表姨甥女話呢杯特飲好清爽，當然啦，梳打水加入薄荷及檸檬，自不然夠晒清新，佢補充多句，如果有多啲芒果粒粒就更好啦。

Peach Yogurt Frozen $58
炎炎夏日，小弟就揀杯叫人更清涼嘅特色凍飲，睇圖時我都有少少疑惑，寫明喺桃，但餐牌杯嘢喺紅色，嚟到嘅實物都喺，原來喺士多啤梨加桃打成，非常大杯，成餐飯飲極都有咁款。入口士多啤梨跟桃味都頗平衡，帶點酸香，又夠清涼。之後，再撈勻啲忌廉，口感就更滑。

凱撒沙律（配自家製法包粒）$33

個沙律有全份、半份揀又幾好喎，先嚟個沙律開開腸胃，基本菜料都喺嗰啲，但做法又唔同，唔喺用煙肉碎，改用煙腩粒，較有睇頭。啲羅馬生菜咬落嗦嗦聲，個醬汁又鹹香，所以，依道凱撒沙律確喺唔錯。

西班牙小食（Tapas）近年大熱，唔喺西班牙餐廳一樣加入戰線，呢度意外地提供嘅西班牙小食非常之多，概略一望已見有十多款，分$38、$48兩個價位。最貼心喺有3品（$98）及5品（$158）嘅拼盤選擇。

蝦牛油果法包多士 $38

老婆對牛油果一向趨之若騖，不過就未到瘋「牛」症嘅階段。件多士鋪滿牛油果蓉，蝦肉又爽，食落仲有嘅蒜香，明顯喺用埋蒜蓉包嚟做，好食。

鮮橙香草雞肉片 $38

以小杯呈獻，賣相幾的骰精緻，杯底墊滿清爽嘅甘筍絲，雞肉片幾嫩滑，鮮橙嘅功能作為裝飾多啲。

意式薄切三文魚忌廉芝士卷 $48

一客有3件，以小匙羹裝住，方便一口一件。三文魚採刺身貨色，入口油潤，而中間嘅忌廉芝士味道香濃，兩者都幾夾。

特濃南瓜粟米忌廉湯 $33

講到「特濃」就自然期望多咗，個忌廉湯口感非常滑溜，味道以小弟嚟講，南瓜味未算特濃，相反，反而覺得粟米味仲突出。不過，湯內加入紅腰豆、鷹嘴豆及蠶豆，都喺加分位。

法式芝士洋蔥湯 $48

除中式燉湯，西湯老婆就最鍾意哋意大利雜菜湯及法式洋蔥湯，因為夠健康。啲洋蔥炒過就特別甜，而個湯底本身都頗香，配上法包及芝士混和一齊，法包又索滿湯，鹹中帶甜，令味道更具層次。

宮崎縣產脆皮腸肉醬大菇長披薩12" $98

依度有部份薄餅喺做成長形，其實都唔喺咩新鮮事，不過，貪得意不妨試吓，而長薄餅只有兩款口味： 宮崎縣產脆皮腸肉醬大菇及黑松露鴨肝牛肝菌。近期食過幾次嘅薄餅，餅底都喺介乎薄批與厚批之間，口感喺比較鬆軟嘅一種。批面鋪滿蕃茄肉醬及水牛芝士，其實淨食個批都覺得好味，加上脆皮腸及大菇，稱得上錦上添花，而啲宮崎腸食起嚟較為油香啲。

生蠔蘆筍香辣蒜茸意粉 $113

煮過嘅生蠔都無乜點縮水，仍然都咁大隻，所以入口特別覺得佢好肉，而且，蠔味比預期濃；啲蘆筍亦爽口無渣，可見用料不賴。而個意粉既咬口，又充滿蒜香，兼且有點點辣勁，過癮好食，當然，少啲橄欖油就仲好。

荷蘭鬆餅（抹茶草莓） $63

甜點選擇都有唔少，以荷蘭鬆餅最具吸引力，以鑄鐵鍋登場喺荷蘭鬆餅嘅標記，其實佢跟美式鬆餅做法差唔多，但點解叫荷蘭鬆餅就不得而知。上枱時，店員特別介紹個鬆餅喺以京都小山圓抹茶做，怪不得既有蛋香之餘，抹茶味甘苦細緻，口感亦好鬆軟；熱辣辣嘅鬆餅，夾埋冰涼嘅雲呢嗱雪糕，以及士多啤梨同藍莓一齊放入口，冰火交織，滋味好食。

水果朱古力配凍心心朱古力 $68

另一道甜品就喺水果朱古力，包括香蕉、士多啤梨、藍莓沾上朱古力醬，算唔上好特別，反而，粒凍心心朱古力幾得意，以為就咁一粒心形朱古力，入口卻喺軟軟沙沙咁，而且，朱古力極之濃郁。

再臨GOCHISO，覺得啲水準都保持得到，價錢亦算親民，如果揀套餐嘅，就划算更多。再者，餐廳位置方便，環境舒服，真喺聚腳搵食嘅好去處。

個人評分
味道：8/10
環境：8/10
服務：7/10
抵食：7/10
平均每人消費：HK$250

餐廳資料：
GOCHISO
銅鑼灣告士打道311號皇室堡2樓203-204號舖
2658 3118