餐廳位於加連威老道嘅商業大廈，唔喺咩出名嘅食廈，相對位置較冷門，不過，始終晌旺區，唔難搵。餐廳設有室內同室外，但店員話剛經歷颱風，室外位置暫時唔開放。而室內環境唔大，概略一數都喺得14個位，所以，幾容易滿座，訂位自然喺常識。內裡以灰色襯棗紅，燈光幽暗，佈置幾有法式小館情調。
餐牌設計比較簡單，完全無咩裝飾或排版，只喺白底黑字，紅字喺廚師推介嘅菜式。我哋一心意屬晚市套餐，所以，散點餐牌真喺無咩點留意過。唯可惜室內燈光實在昏暗，所以，個套餐餐牌影到懞查查，勉強可以睇到啲字。
4道菜晚餐，定價$398 + 10%，並唔包餐飲，前菜、沙律、湯品都喺指定款式，雖然可以好好控制食材嘅損耗，但感覺有欠彈性，始終有啲人想實惠啲食套餐，卻可能真喺有啲食材唔啱食，多一個選擇就叫好重保險。
哈密瓜、西班牙風乾火腿（30個月）伴意大利陳年黑醋橄欖油
30個月熟成嘅風乾火腿，果然油潤甘香，只喺得薄薄一片，配兩件哈密瓜，有啲未夠喉咁啫。此外，墊底嘅沙律菜喺完全無調過味，油醋一滴都無加，感覺哋差啲。
煙鴨胸田園沙律配無花果乾柚子蜜醋汁
反而，個沙律就真喺幾好食，沙律菜配上特製嘅柚子蜜醋汁，酸爽醒胃；襯煙鴨胸倒唔覺得有咩特別，相反，加入少少無花果乾卻有種畫龍點晴之效。
黑松露蘑菇湯
以往食唔少西餐，甚至乎法國菜，都會提供餐前麵包籃，就算唔喺餐前，去到餐湯，都會伴上三數片特色麵包，不過，呢度就唔興依家嘢。個湯本身做得有水準，菌香味濃，就算菌粒刻意保持少少幼細碎粒，質感依然柔滑，只喺賣相欠奉。
幾道菜過後，嚟到主菜前，一般而言，好多時都會以雪葩作間場，不過，晌度就無供應。主菜方面，只喺3揀1：燒春雞、比目魚、油鴨脾，選擇並唔多。
扒法國燒春雞伴黑松露忌廉汁
早前晌Chez Moi依食過一次煎焗法國鵪鶉釀巴馬火腿、白菌及忌廉芝士，實在精彩，法國春雞名氣亦有番咁上下，所以，對此扒法國燒春雞有一定期望。春雞喺半隻份量，但就算半隻都唔細，感覺比一般遇到嘅春雞大隻，肉質一般，未喺好嫩滑，幸而外皮夠脆，補番少少分。啲伴菜反而有驚喜，炒雜菌、法邊豆、細甘筍及紫薯蓉，好食。
法式油鴨脾配自家製雜莓汁
對比起隻春雞，件油鴨脾好食好多，油鴨脾非第一次食，知道油封鴨脾喺歷史悠久嘅法國菜，既要風乾，又要煎烤，並以味道油香、口感鬆化為特色，今晚所試到嘅油鴨脾，完全表現出應有質素，外皮香脆，一絲絲嘅鴨肉酥香鬆化，油香而不膩。
法式焦糖燉蛋
今晚嘅是日甜品就喺經典嘅燉蛋，雖然唔喺一道好複雜嘅甜品，但做得好都唔易。燉蛋做得挺身得嚟，口感幼滑，充滿蛋香，面層嘅焦糖既薄且脆，手勢上乘。套餐並未包餐飲，就算飲品嘅餐牌都喺啲餐酒或啤酒，想飲杯咖啡襯甜品都唔得。
由前菜、沙律、餐湯到主菜，感覺店方都唔喺太注重賣相，菜式都喺四平八穩。而味道上，亦未有太大驚喜，都只喺穩打穩紮。至於整晚用餐只喺4道菜，足足用咗近3個小時，單單等上餐湯也呆等半個多小時，上菜速度之慢，真喺好難想像，餐後先聽到侍應講今晚只得一位廚子，而侍應亦只得佢一位，招呼一環實在要改善吓。
個人評分
味道：7/10
環境：7/10
服務：4/10
抵食：6/10
平均每人消費：HK$440
味道：7/10
環境：7/10
服務：4/10
抵食：6/10
平均每人消費：HK$440
餐廳資料：
Le Paradis Restaurant & Cafe
尖沙咀加連威老道41C嘉威大廈4樓A室
2311 0101
Le Paradis Restaurant & Cafe
尖沙咀加連威老道41C嘉威大廈4樓A室
2311 0101
沒有留言:
發佈留言