Pacific Coffee Company：乳眾不同

匆匆食完晏，落咗附近間Pacific Coffee飲嘢，皆因約咗朋友有啲嘢傾。中環食晏時段真喺超多人，就算星巴克一樣多，老麥就唔使講啦，反而安蘭街嘅Pacific Coffee就相對少啲人，因為位置有丁點偏同隱蔽。

咖啡店晌商廈大堂，雖然枱櫈都排得密，亦有唔少寫字樓客幫襯，但因為超高樓底，空間感仍然十足，加上涼快嘅冷氣，就算出面氣溫火熱，感覺仍然好舒服。

原本打算嘆杯咖啡，識我嘅朋友都知我鍾意飲鮮奶咖啡，不過，現場見有唔少新品，而朝早早餐亦已經飲過咖啡，故今次少有哋試吓新出啲夏日特飲。

蜜桃梳打 $38

友人揀咗梳打特飲，共有3款口味，包括荔枝、熱情果及蜜桃，佢話鍾情蜜桃，貪其味道清香。晌等候期間，見店員手揸一支藍色樽身嘅梳打水，好奇八啩吓原來喺意大利有氣礦泉水，唔喺就咁用普通梳打水做，誠意十足，入口亦冰涼清爽。雖然見店員都喺唧糖漿做，但友人話唔會好「藥水」嘅感覺，桃味挺清甜，解渴之餘亦滲有清甜果香，最得意喺梳打內混有透明啫喱粒，增加飲品嘅趣味性，不過，梳打面浮浮吓幾片蜜桃脆片，換上幾片鮮蜜桃小弟覺得仲好！

熱情果芒果乳酪其樂冰 $44

另一組乳酪其樂冰特飲系列，有2款口味，包括熱情果芒果及雜莓，小弟較喜愛芒果嘅香甜味，所以，就揀咗前者。拎上手感受到份量十足，因為真喺好墜手，淡黃色嘅其樂冰，味道可以講喺複雜而多樣性，有熱情果嘅酸香，又有芒果嘅清甜，亦有乳酪份酸溜溜，口感綿密細滑，的確清新、清爽，飲落仲啜到啲應該喺柚子果皮嘅粒粒，非常有趣。

全城被高溫籠罩，一杯冰涼特飲，就算未能暑氣全消，絕對可以降降溫，讓人「酪」在其中！

個人評分
味道：7/10
環境：7/10
服務：7/10
抵食：7/10
平均每人消費：HK$40

餐廳資料：

Pacific Coffee Company
中環雲咸街8號地下
2526 6340