專登揀星期一晚嚟，因為「藍色星期一」啲人無咁有心情出街食嘢，搏無咁多人，一人多啲放題就易漏單、出菜慢、招呼又可能無咁好。順便掃描佢哋啲單張俾大家參考，浜燒又好，齋食放題又好，咩日子，咩價錢，一目了然。不過少少溫提，打算食海鮮浜燒嘅話，喺需要預早至少一日前訂座及講明食浜燒，否則海鮮貨源無保証。
浜燒又好，放題又好，邊度即點就有我食架。佢哋好似時下唔少放題店咁，外面有自取食物專櫃，就晌入門口附近有凍海鮮、沙律、冷盤小食、少少熱食及甜品。
飲品方面，都喺當然自取啦，不過，有驚喜喎，除多組汽水櫃提供多款外國及本地嘢飲外，仲有幾款熱飲，如柚子茶、桂花茶，而所講嘅驚喜位喺有清酒、梅酒任飲。
蟲草花粟米燉排骨
我哋攞緊嘢飲時，但老婆就先嚟一碗燉湯，真喺估唔到放題都有燉湯飲，啲湯算幾足料，又幾清甜。
一如所有放題，點菜紙分門別類放晌枱面，以小型檔案簿釘住啲點菜紙。不過，晌鋪面放置咗超大版本點菜紙，可以一次過睇晒有咩食，如果喺等位期間，不防睇睇諗定揀乜。
刺身、壽司、火炙壽司、卷物
就算浜燒開晒爐，燒緊海鮮，都有段時間要等，所以，我哋第一時間先點一份刺身拼盤攝時間。由於個放題加插埋浜燒，店長又推介佢哋嘅海鮮粥，所以，壽司、卷物就成為被放棄嘅對象，其實望番有咩選擇，部份款式都幾吸引。
刺身有中拖羅、三文魚、赤貝、油甘魚、希靈魚、北海道帶子、北寄貝、劍魚腩、甜蝦及北海道角螺及象拔蚌，毫無懸念一次過點晒。雖然點4人份，但發覺份量有多無少。裝成一大盆擺得靚靚仔仔，睇落啲刺身色澤新鮮，試完覺得款款唔錯，味道鮮甜，鮮甜嘅就鮮甜，油潤嘅就油潤，煙韌嘅就煙韌，又無話未解好凍仲有冰雪感，放題店俾到咁嘅貨色，算好有水準。
海鮮浜燒
食完啲刺身，啱啱好啲海鮮都有得食，而初時捧盆海鮮出嚟，非常有睇頭，為怕客人唔識燒而嘥晒啲海鮮，所以有專人服侍幫你燒，而且，個店長一人同時睇三五張枱嘅浜燒，同樣應付自如，燒出嚟嘅海鮮恰到好處，點可以唔逐樣海鮮寫呀。浜燒環節都用幾長時間，所以，慢慢點放題嘢食作間場，就成晚可以不停食食食。
鮑魚
雖然唔似上次食高檔浜燒咁食南非活鮑魚，但今次啲鮑魚一啲都唔差，店長原隻燒，之後去殼再燒，燒得帶焦香。只喺灑咗少少鹽吊吊味，啲鮑魚入口煙韌且有彈性，鮑魚味突出，好食。
大蜆
晌燒鮑魚嘅同時，爐旁已燒緊大蜆肉，店長解釋要將大蜆拆肉放入錫紙兜嚟燒，喺因為蜆殼薄，好易爆裂彈到客人。啲蜆肉之後加入埋蒜蓉、辣椒及蔥花，所以，好惹味，但又嗒到蜆肉嘅鮮甜，有咬口得嚟唔會韌到好似擦紙膠咁。
帆立貝
就算唔喺北海道貨色，睇樣都覺得具質素，啲帆立貝同樣加入少少蒜蓉、辣椒及蔥花一齊燒，再灑少少清雞湯，帶子食落彈牙，爽甜。
大虎蝦
虎蝦體形大就知唔喺普通貨色，亦無咩下調味淨燒，所以，食之前沾丁點豉油，蝦鮮味自然盡出，蝦肉又夠晒爽口。
生蠔
燒蠔跟大蜆做法一樣，都喺拆殼放晌錫紙兜內燒，不過，小弟就覺得無咁嘅需要，好似帆立貝咁原隻燒仲好，更有睇頭。燒完嘅蠔無乜點縮水，放咗些少蒜蓉提味，蠔肉飽滿蠔味濃，又有海水嘅鹹鮮味。
食完以上5款海鮮仲以為浜燒環節完，店長隨後提我哋仲有任食浜燒項目，不過，就唔喺淨喺海鮮嘢，仲有啲蔬果菜類。因為期間我哋都點咗唔少放題食物，所以，第二轉「浜燒」點少少海鮮，其他就以蔬菜為主。
而依一轉可以自己玩吓，因為都唔喺咩難度嘢，但店長特別提一提，如果燒蔬菜可以搽啲清雞湯或鮑魚汁，出嚟嘅效果無咁乾又會香啲。
沙律、小食、燒物
沙律、小食類就無揀到，其實款式都唔喺啲大路普通嘢，例如黑松露鮮蝦沙律，都夠晒誠意啦。而燒物，共有6款，最吸引當然喺我同夏總都鍾意嘅羊鞍啦，如果晌任食浜燒度無揀有機蕃薯仔及有機菠蘿，大可晌度剔番，唔使自己燒就有得食。
大蝦沙律
雖然無晌點菜紙剔選任何沙律，但晌入門口嘅自助餐枱，就貪得意拎咗杯大蝦沙律，簡簡單單，啲大蝦又爽口，算唔錯啦！
燒紐西蘭羊鞍
老婆少食紅肉，就點咗3客試試，羊鞍燒得焦香，加咗黑椒，又有點點羊羶香，夠晒惹味，而且，口感軟腍又極富肉汁，正喎。
串燒、火鍋、主食
呢幾類食物都好精彩，串燒有4款，不過，純個人喜好，只點牛舌，浜燒都食咗咁正嘅虎蝦啦，就無謂再點類同嘅鹽燒海蝦。而火鍋、主食類本身無打算點，因為喺太易飽肚嘢，但店長極力推介佢哋嘅海鮮粥（依個連點紙菜都無，喺是日特別推介），難得我哋4個人，就點咗鍋嚟試。
鹽燒牛舌
同樣牛舌無預我老婆，佢對牛舌麻麻，我就鍾情佢朕獨有嘅牛舌臊味。啲牛舌燒得甘香，簡單鹽同黑椒調味，唧少少檸汁，加上口感煙韌，好食。
海鮮粥
份量都唔少喎，真喺夠晒我哋4個人食有餘，粥底唔喺我哋廣東粥底嘅綿，喺日式有米粒嘅粥底，但入口約鮮甜，裡面有唔少料，瀨尿蝦仔、鮮蝦、大蜆、冬菇，我哋仲加隻溫泉蛋落去添，整鍋粥都真喺唔錯。
天婦羅、炸物
講到香口嘢，有邊個唔鍾意吖，所以，依兩大類都點得比較多啲。天婦羅共有5款選擇，都喺常見款式，而燒物則有6款，部份幾特別。
松葉蟹棒、蕃薯、南瓜天婦羅
整體而言，天婦羅做得不俗，全部入口都唔覺油，粉漿夠薄又超脆口。當中以蕃薯最好食，夠粉夠香甜。
御品榴槤炸彈、芝士年糕
6款炸物以榴槤炸彈喺我最想試，外層喺炸年糕，香脆煙韌，內裡嘅榴槤蓉無欺場，填滿之外，好重榴槤味，叫人食得過癮；而芝士年糕喺老婆心水，當然我都鍾意食，年糕煙糯，配上軟綿綿香濃嘅芝士，正呀。
鐵板燒
依個類別又喺有好多選擇，不過，寫到呢度，你見我哋確實食咗唔少嘢，都仲要預留肚仔試試甜品，所以，鐵板燒都唔會點得太多。
鐵板牛柳粒
小弟同夏總都喺食肉獸，牛柳粒都喺為我哋而設，啲牛柳粒好軟腍，入口好有肉味，又有蒜香。
鐵板炒雜菌、牛油炒粟米
素菜嘢，都喺老婆要求點嘅，但大家都啱食，志在有多啲纖維落肚，不過，啲炒雜菌同粟米又確喺炒得幾香口。
去到尾聲，喺甜品時段，晌入門口嘅自助餐枱已放有雪耳木瓜糖水、馬卡龍及朱古力噴泉。
再入少少，仲有成櫃小甜點，如芝士蛋糕、芒果布甸、朱古力慕絲……等等8、9款。
另一邊，仲有自助棉花糖機及爆谷機，真喺有得食，又有得玩。
甜品拼盤
先一口氣拎咗8款返嚟一齊共享，款款的的骰骰，每款試少少，就算8款都好易KO到。質素？就唔講得高架啦，但比預期中好，例如啲芝士蛋糕濃香軟滑，牛乳布甸滑溜奶味濃，志在過吓甜品癮絕無問題。
除一大堆自助甜品，仲每位客人奉送一杯Movenpick或Haagen Dazs雪糕一杯，有多種口味選擇。
Haageb Dazs焦糖雪糕
各人都揀咗自己心水，小弟嘅心水喺焦糖口味，雪糕入口軟滑，焦糖味好香濃，裡面仲混有唔少焦糖餅乾粒，有少少類似「金寶」咁，脆口得嚟更添口感，認真好食，品牌嘢始終有一定實力。
最後，店長都放低張意見卡，打開裡面有唔少問題，由食物、環境、服務、點菜紙……等等多項，雖然唔知寫咗喺咪會真喺改善，但都稱得上誠意十足。
去浜燒專門店食一餐，消費確喺幾高，但依家閒日價連埋加一，三舊水都唔使可以落樓，真喺好划算。而放題部份又唔少選擇，水準不賴，上菜、收碟又快手，店員都勤快有禮，喺漏咗一次單，但唔記得喺唔喺我哋無寫枱號，但同店員講聲，好快幫手補番單，所以，服務都好滿意。
個人評分
味道：8/10
環境：8/10
服務：8/10
抵食：9/10
平均每人消費：HK$295
環境：8/10
服務：8/10
抵食：9/10
平均每人消費：HK$295
餐廳資料：
御滿屋日本料理 Superior Manya Japanese Restaurant
旺角彌敦道655號胡社生行1樓
3622 3338
御滿屋日本料理 Superior Manya Japanese Restaurant
旺角彌敦道655號胡社生行1樓
3622 3338
沒有留言:
發佈留言