芒芒不忙 $28
行完山就梗喺要補充多啲水份，芒果一向喺「飛弗」，本來喺想要杯凍鮮奶咖啡，可惜話部咖啡機有問題，無得供應，所以，要杯「芒芒不忙」，其實即喺芒果汁，不過，就加入啲咬口嘅水晶珠，而個芒果汁嘅芒果味鮮甜濃郁，但有些微偏甜。
北極光 $28
友人嘅「北極光」賣相極之靚，紫紫紅紅，有少少極光感喎，不過，味道又唔算好特別，辨別唔到咩味，只可以講喺酸酸甜甜，清涼得嚟有啲似梳打飲品，底下同樣有啲水晶珠。
鹹食方面，多咗幾款意粉、全日早餐及班尼迪蛋，定價$58-$78，都唔算貴，當然，如有啲加餐飲嘅優惠就更好啦，哈哈！
全日早餐 $68
從餐牌所見，都已經幾豐富，賣$68都覺得幾抵食。成份「早餐」有齊芒果汁沙律菜、煙肉、牛油多士、車厘茄、豬肉腸、黑松露炒蛋、蜜瓜及茄汁豆，而仲有一客椰奶焦糖布甸喺餐牌嘅相片無，即喺額外奉送，抵得無嘢講。啲沙律菜幾清爽，淋上芒果汁就自然升級咗；煙肉都喺肉多過肥膏嘅貨色，煎得甘香；牛油多士脆到不得了；黑松露炒蛋夠嫩滑，又充滿黑松露嘅幽香；焦糖布甸好好食，香滑富蛋香，微微焦糖香混和椰奶，夠晒正。
蜜桃鴨胸班尼迪蛋 $78
個班尼迪蛋賣相幾清爽，因為伴上唔少沙律菜，同樣淋上清甜嘅芒果汁，不過，啲沙律菜可以唔使刴得太細碎，食起嚟較為碎濕濕。而兩件班尼迪蛋以美式鬆餅做底，加入蜜桃片及煙鴨胸，味道都算夾，而驚喜位喺仲加咗啲菠菜晌鴨胸下面，口感再多層次啲；蛋面嘅荷蘭汁亦做得唔錯，但最失望喺隻蛋煮過籠，變成溏心蛋。
榴槤飄香椰皇子 $56
甜品只喺點個招牌嘅椰皇子共享，因為之前已試過佢啲椰皇子，好嘢不妨再「安哥」，但就選加入榴槤嘅榴槤飄香椰皇子。榴槤果肉唔算多，亦唔算少，但濃香軟綿，面頭又見水晶珠。下層喺以椰皇水做嘅果凍，冰涼清爽，味道清甜；仲有唔好錯過椰皇內嘅果肉食，皆因清甜好食。
試咗兩款鹹點，以份全日早餐最抵食，又好味，相反，份班尼迪蛋就衰咗晌蛋黃方面，明顯可能喺水準唔夠穩定，依點需要改善吓。不過，佢哋嘅甜點始終都有番咁上下。
個人評分
味道：7/10
環境：7/10
服務：7/10
抵食：7/10
平均每人消費：HK$130
味道：7/10
環境：7/10
服務：7/10
抵食：7/10
平均每人消費：HK$130
餐廳資料：
甜入心 Heart's Dessert
沙田橫壆街1-15號好運中心地下L8F號舖
2243 4868
甜入心 Heart's Dessert
沙田橫壆街1-15號好運中心地下L8F號舖
2243 4868
沒有留言:
發佈留言