除咗主用餐區，餐廳尾屈個彎，原來仲有一排面窗吧位，對住街景，感覺更開揚。
講到明抵食，真喺好抵食架，午餐共有11款選擇，定價都喺$49-$69，仲包埋是日餐湯、餐包、$22或以下飲品（其他飲品只需補差價），又可以另+$8加配是日沙律。晌附近搵間茶記，都差唔多啦，更邊有咁好坐添。
抵？仲未算，1:00pm前離座即可享全單8折優惠，依個就難啲，因為我哋12:30pm到。但2:00pm前離座加4人同行及同時消費午餐，即送西班牙辣汁配煙鴨胸薄餅（8吋）一個（只限堂食），所以，咪順便搵埋表哥一家嚟食晏囉，而且，午餐仲唔收加一服務費添。
是日沙律 +$8
既然乜都咁抵，都唔差在加$8要埋個是日沙律（田園沙律）試吓啦，沙律菜配車厘茄及栗米粒伴胡麻醬，雖然唔喺咩貴料嘢，但算簡單清新，又堆得大大碗。
是日餐湯
餐湯喺粟米火腿忌廉湯，忌廉湯做得不過不失，喺茶記質素，但勝在夠熱又多料，試過有啲餐廳真喺連餐湯都做得唔熱架。
懷舊餐包
「懷舊」兩個字喺小弟夾硬加上去，依一款帶微甜嘅餐包真喺晌老餅啲嘅茶記或舊派啲嘅港式西餐廳仲會見到，港式餐包，簡單兩個字：鬆軟。
珍珠帶子南瓜汁燴飯 $49
表姪女好奇燴飯喺點，所以，揀咗個南瓜汁燴飯一試。個飯賣相唔錯，飯粒沾滿南瓜汁呈現一片橙黃，變得份外搶眼，而且，飯內混有唔少帶子粒。不過，佢可能第一次食，亦唔慣濕濕哋嘅飯，其實個飯底做得唔錯，濕潤帶少少咬口，又充滿南瓜香，啲帶子雖然細粒，都爽口喎。
帆立貝海鮮彩椒炒飯 $55
表嫂就穩陣派，唔喜歡搞咩新嘢，所以，炒飯佢話就最啱佢。咪睇個炒飯得一粒大帆立貝晌面，飯內可有不少海鮮料，包括珍珠帶子、魷魚、蜆肉，飯粒炒得爽身。最搞笑喺表嫂話估唔到碟飯有咁多，碟底好深，幾乎食唔晒。
泰式紅咖喱羊架配飯 $59
小弟既鍾意食咖喱，又好羊架，真哋無理由唔揀依道菜式。份紅咖喱羊架又喺另一抵食之作，1份有成3支羊架，啲紅咖喱辛辣惹味，撈飯一流，羊架肉質軟腍帶點羊羶香，好似炸脾咁揸住食，爽呀！仲有，伴少少薯仔，喺連皮新薯，唔喺啲平價嘢。
4安士安格斯牛肉及特濃車打芝士漢堡配鐵板薯條 $59
個菜名就夠晒長，簡單嚟講就喺牛肉漢堡，不過，賣點喺用上安格斯牛肉做，表哥話拿起好墜手，感覺唔只4安士，入口堅有肉味，亦好鬆化，唔似麥記啲咁死實，但佢就嫌肉汁未夠爆，而且，包內只夾有蕃茄及芝士，味道欠層次，可以再做得更好。啲薯條炸得夠脆口，又唔油膩，整體份量十足。
西班牙辣汁配煙鴨胸薄餅（免費）
雖然喺送嘅，但無話迤做，8吋大細嘅薄批，批面放滿料，彩椒粒、黑橄欖、大大片煙鴨胸，又鋪滿芝士，加上辣汁，食落集鹹、香、辣於一身，味道層次豐富，真喺好食喎。
棉花糖朱古力 +$12
表姪女對飲嘢果然夠專一，又喺棉花糖朱古力，味道喺點？真哋無問佢，不過，最緊要喺佢鍾意。
藍蝶豆花茶 +$26
表嫂喺保守人，唔太多試新嘢，不過，既然嚟到，我就推介佢試吓花茶，揀咗藍碟豆，佢一見啲花茶藍晒色好驚訝，我話放心，喺天然色，而且，隻花茶有抗氧化，好啱佢飲，況且加咗蜜糖，微微花香帶點甜。由於成壺上，斟到3、4杯，我同表哥都斟番杯試吓。
榛子咖啡 +$10
小弟揀榛子咖啡，雖然佢餐牌無講明喺鮮奶咖啡（拿鐵），但睇樣就覺得佢哋喺想咁做，不過，沖泡手勢就麻麻，只喺盡量將奶泡溝落啲濃縮咖啡度，無乜一般飲鮮奶咖啡口感可言，還好嘅喺榛子味幾突出，啲咖啡都幾香。
焦糖咖啡 +$10
表哥杯焦糖咖啡跟我杯差唔多，仲沖到成杯意大利泡沫咖啡咁。若非想試試佢啲特色口味咖啡，我覺得無謂加錢飲普通嘅就夠喇。
雖然食物水準又唔喺咩超高，但4個人夾埋晒先喺$312，食到飽一飽，整體味道不俗，環境又幾舒服，店員服務有禮又勤快，認真抵食到暈！
個人評分
味道：7/10
環境：7/10
服務：8/10
抵食：9/10
平均每人消費：HK$80
環境：7/10
服務：8/10
抵食：9/10
平均每人消費：HK$80
餐廳資料：
Eat Me Bar & Restaurant
Eat Me Bar & Restaurant
油麻地彌敦道560號譽發廣場5樓全層
3188 3861
3188 3861
沒有留言:
發佈留言