小弟一向低調，估唔到Cafe Revol同我一樣，中灰嘅門面唔多顯眼，真喺行過都唔知。踏進餐廳，水泥牆身、水泥地，木系枱櫈，一派工業風風格，配合暖和嘅燈光，近門口處又設置一張共用大枱，簡樸嘅設計，又喺文青聚腳好去處。
此外，作為一家咖啡小店，咖啡嘅相關產品自然唔少得，亦有自家品牌嘅咖啡豆出售。仲有就喺一啲咖啡、茶葉嘅小擺設。
小弟就特別鍾意依一張咖啡「比例圖」，有時被人問起意大利泡沫咖啡、鮮奶咖啡、瑪琪朶……點分，呢張圖就俾大家有少少概念。
餐廳採半自助形式，晌出面櫃位落單，再由店員送上食物。翻一翻餐牌，頁首有餐廳嘅自我介紹，我幾喜歡當中嘅一句：「咖啡是一門藝術，而且是每一個人每天都可以接觸到的藝術」。其實，飲食本身就已有喺一種藝術！
再細心睇睇餐牌，咖啡肯定喺主打，因為足有3頁喺咖啡飲品：特色咖啡、香味咖啡、特調咖啡、手工咖啡、花香特調……等等，此外，仲有非咖啡奶花、花茶、梳打、冰雪類飲品；
食物方面，以輕食為主，如各款全日早餐、三文治、特色多士、小食、沙律，仲提供數款意粉作為主菜，所以，嚟食嘢作為正餐都無問題。
晌餐牌無寫甜品嘅類別，但收銀旁嘅凍櫃見擺放鬆餅、蛋糕，喺店內可供選擇嘅甜點。
雖然，落單後有侍應將食物送上，但清水、餐具、餐紙、調味料就要自己動手拎，全自助，不過，嚟得依類小店，服務自助喺絕唔介意。況且，餐廳唔收加一服務費，就更應該自己動吓手腳。
黑松露雜菌意粉 $80
估唔到小店做出嚟嘅意粉不俗，意粉煮得咬口啱啱好，又掛滿醬汁，醬汁充滿松露幽香，加上不少鮮蘑菇片，確喺好食。何解話佢喺鮮蘑菇片？因為罐頭貨會又細片又濕又腍，但佢啲蘑菇片較大片，入口仲帶少少爽身。伴上一大片蒜蓉包，讓人滿意嘅意粉菜式。
經典英式早餐 $118
小弟都算食過唔少英式早餐，但就極少好似佢哋咁晌餐牌寫到明有邊款食材，包括煙三文魚、德國香腸x3、煙肉扒、香煎雙蛋、炒蘑菇、茄汁焗豆、德國酸菜、烤麵包配忌廉芝士及沙菜。
寫喺咁寫，做出嚟又喺點呢？上枱時嘅「早餐」認真大份，堆到成隻碟滿一滿，唔知佢喺咪預咗俾兩個人食，樣樣食材都有兩件，份量足之餘，用料都不賴。較深印象喺其中一款香草豬肉腸，非常好食，腸衣脆口，帶好濃香草味，而煙肉鹹香不膩，炒蘑菇將啲雞脾菇切到大大粒，唔會碎濕濕有爽口感，兩大片黑麥包配忌廉芝士，唔喺配牛油普通料，黑麥包麥感強韌身有咬口，搽滿忌廉芝士份外好食。雖然喺普通嘅西煎雙蛋，但可以+$8配松露醬，但我哋已揀咗一客黑松露雜菌意粉，煎蛋就無加松露醬喇。
生薑鮮奶咖啡 $40
朋友話佢啲咖啡夠特別，所以，一於試杯較特色嘅生薑鮮奶咖啡，睇佢做成點！薑汁配鮮奶咖啡非第一次飲，晌尖沙咀嘅My Little Coffee都飲過一次（黑糖薑餅咖啡拿鐵），所謂薑餅元素就喺加入薑汁，今次杯生薑鮮奶咖啡明顯喺「重薑」之作，未飲都已聞到，入口薑味確喺好突出，帶少少澀，但亦算跟咖啡味嘅醇香平衡到，加上拉花細緻，值得不妨一試。
晨曦 $41
親友揀嘅「晨曦」，喺鮮奶瑪琪朶加入蜜糖嘅作品，親友話瑪琪朶部份沖得好細滑，口感均勻，最頂層嘅奶泡輕盈綿密，滲出蜜糖嘅清甜。
咖啡唔止喺一杯飲品，沖調咖啡亦喺一門藝術，更喺講求毅力嘅事情，見到咖啡師、廚師都好年青，盼望佢哋晌不斷磨練下做得更好，多謝朋友真喺無介紹錯，讓我哋悠悠閒享受咗一餐寫意晚飯。
個人評分
味道：8/10
環境：8/10
服務：8/10
抵食：8/10
平均每人消費：HK$140
環境：8/10
服務：8/10
抵食：8/10
平均每人消費：HK$140
餐廳資料：
Cafe REVOL
佐敦德成街4-16號富裕臺地下5號舖
3702 0170
Cafe REVOL
佐敦德成街4-16號富裕臺地下5號舖
3702 0170
沒有留言:
發佈留言