滋味無窮 Aroydee Thai：滋易行難

經過這小檔很多次，但未幫襯過，多數都喺幫襯隔幾檔嘅茶記「太子」，當然唔喺因為「本土優先」，美食無疆界嘛，只喺好幾次經過見人多，過門不入，相反去太子可以嘆杯靚奶茶。今晚，老婆話帶我試依間泰式小店，佢早前同好姊妹晌度食晏，覺得正所以提議我嚟試試。

其實佢喺雙連鋪，但兩個鋪位都好細，所以，一邊喺廚房重地，另一邊喺用餐區，問准大廚，佢話唔介意我影佢做菜，實在「泰」有型。

既然喺賣泰菜，有少少泰式嘢散賣，就放咗晌鋪面，自家炸嘅蝦片，以及支裝泰式特飲，幾有趣，都喺$10支，仲有現賣即場嘅泰式燒烤。

走入用餐區，裝修可以講喺街坊般平實，5張家常摺枱，單起眼就睇晒，最好喺無常見泰國餐廳嘅神神佛佛，取而代之較有泰國鄉土風情就喺牆上多幅掛畫。

雖然喺小店，但個餐牌做得唔「馬虎」，所刷精美，部份菜式有圖片參考，分門別類，包括：小食、沙律、湯類、咖喱、海鮮、蔬菜、飯類、湯粉、甜品、飲品，一應俱全，種類齊備。

泰式湯粉共有7款餸料選擇，但就唔似港式興雙拼，粉類只有河粉或金邊粉，而湯底一喺清湯，一喺就冬蔭功湯，但後者需再額外加$10。

魚蛋清湯河粉 $35

餸料嘅份量比預期少呀，兩粒白魚蛋加一大片魚片，不過，塊魚片叫得上厚切，且又幾大塊，亦夠爽口，但相對啲魚蛋麻麻，口感似墨魚丸，但又確喺白魚蛋。河粉較港式嘅窄身，但入口柔滑，清湯底都不俗，有陣陣鮮香咪。

小弟就揀個飯類，炒飯喺佔飯類較多嘅款式，咪以為炒飯易做，炒得好唔好都要講功力。

泰式菠蘿炒飯 $45

個炒飯伴有肉鬆及腰果，飯內亦混有唔少菠蘿粒粒，不過，成碟飯竟然喺得一隻蝦。此外，有少少失望嘅喺飯粒有啲爛，唔夠爽身，唯一好嘅喺充滿黃薑味，同埋炒得均勻。

龍眼冰 $15

眾多泰式飲品中，最鍾意喺龍眼冰，感覺冰涼夠潤，佢哋啲龍眼冰有好多龍眼，糖水底又幾清潤，但就有唔少冰，快啜幾啖都差唔多飲晒。

順帶一提，午餐菜式跟主餐牌同價，只喺優惠在於多杯飲品奉送。

除咗堂食，眼見有唔少街坊嚟買外賣，都有相當多支持度，但今晚所試嘅兩款菜式都喺一般，唔知喺自己咁唔好彩，定喺廚師失準，抑或咁就已經喺餐廳嘅水平？入過廚房就知，做菜一向都喺知易行難嘅事！

個人評分
味道：6/10
環境：6/10
服務：7/10
抵食：7/10
平均每人消費：HK$46

餐廳資料：
滋味無窮 Aroydee Thai
葵涌青山公路葵涌段440號名德大樓地下HB號舖
9109 7519