晌門面，最留意到喺「逢星期一，全日89折」嘅優惠牌，所以，我哋無啦啦變相唔使加一。
由於要就一就老友飲食，所以，今晚食咩就由佢同佢老婆搞掂，我就一於等食，慢慢影吓東、影吓西。先講環境，晌門口睇唔出餐廳都頗大，入門口處有開放式「柴房」，頂位「簷篷」真喺放咗唔少柴枝架，下面則有唔少竹製器具，帶出餐廳主題。
再走入啲啲，就已經喺用餐區，全以淺木系作為主調，裝修頗為簡約，無咩花巧，由於樓底有留番咁上下高，空間感強。如果再多放少少植物，感覺更強，更有郊野嘅感覺。
就連餐墊、餐巾，都極盡田園氣息！
主餐牌封面，大大隻字印住「Tastes of Nature」，再次表達餐廳嘅理念。
翻開第一版，有餐廳嘅自我介紹……自然山野風味。
繼續翻，就圖文並茂列出所有菜式，類別包括芝士拼盤、湯品、小食、沙律、主菜、薄餅、意大利飯、意大利粉、伴菜……等等。
此外，仲另有一張「精選本地農場系列」餐牌，食材都喺本地優先，如本地黑毛豬、本地盲鰽及本地水耕沙律菜。
講到健康營養，除採用本地水耕沙律菜之外，晌餐牌中間大頁，更特別介紹自家種植嘅迷你菜，迷你菜好處喺乜？據佢哋介紹，迷你菜泛指蔬菜及香草嘅幼苗，待發芽不足一個月就收割，所以，營養含量比熟成嘅菜大大提高。
自家製麵包籃
先上一小籃麵包，以小竹籃盛載，內有餅乾條及幾款小圓包，小圓包好軟熟，卻好有咬口，富麥香。
飲品方面唔止有特色，更喺健康行頭，除多款招牌特飲、冷壓果沙，好幾款健康特飲都吸引，此外，餐酒、雞尾酒、啤酒、手工啤、花茶、咖啡一樣有供應，可以講一應俱全。
奇亞籽檸檬蜂蜜 $58
簡單嚟講，就喺一杯檸蜜，只喺加咗大量奇亞籽，究竟有乜好？奇亞籽小弟都喺第一次接觸，據店長講，佢喺鼠尾草嘅種籽嚟，有幫助改善消化系統、促進心臟健康、控制糖尿病、增強體能……等功效，甚至修復髮膚和指甲都得，不過，成杯嘢味道就唔特別。
Something Wild $68
小弟就揀咗以店名命名嘅健康特飲，睇睇有幾特別。由西芹、菠菜、蘋果、檸檬及蜜糖打做成嘅沙冰，晌依家咁炎夏日子，超冰爽。味道以西芹最突出，又有少少果香，整體感覺清新，唯挑剔位喺沙冰打得未夠細緻，有唔少冰粒。
蟹肉蘆筍忌廉闊條麵 $158
所有菜式由老友拍版，小弟就只有食食食，先登場有一道「闊」條麵（Pappardelle），而唔喺寬條麵（Fettuccine），比寬條麵更闊，記得年初晌西環嘅Little Creatures見識過一次，仲因為未有中文名，幫佢稱為寬「帶」麵，因為有成兩隻手指闊，甚具咬口。汁底喺忌廉香蒜白酒汁，又有唔少鮮味嘅蟹肉同爽嘅嫩蘆筍混晌麵度，好好食，只喺份量有啲少。
藜麥香草雞胸拌意大利飯 $128
個意大利飯以「竹」筒盛上，賣相別緻，而藜麥，唔使多介紹，喺近年嘅超級食物。不過，藜麥、雞胸、意大利飯並非撈埋一齊，可以講各自分開，大概想由客人自行撈多少藜麥嚟食。啲意大利飯以香檳忌廉汁煮過，濕潤黏糯有咬口，小弟就較鍾意跟藜麥撈埋一齊食，多份口感，而雞胸肉切成絲，顯得更嫩滑。
本地黑毛豬頸肉配泰式甜酸醬 $98
本地食材當然要支持吓，就揀咗一客豬頸肉，一舊水都唔使，抵食喎。啲豬頸肉燒得幾香口，口感爽脆，加咗少少金蒜，沾啲甜酸醬，酸香去膩，更加好食。伴碟有少少沙律菜，淋咗啲煮過嘅黑醋，可見細節位都唔「求其」。
老友驚我食唔飽，仲點多客伴菜，伴菜共有4款選擇，有蕃薯、薯仔、時蔬及野菌，各有不同煮法。
黑松露蜜糖燒黃金薯 $58
黑松露、蜜糖、燒黃金薯，睇落都覺得喺無得輸嘅組合。蕃薯加咗蜜糖唔止燒得金黃，咬落香甜且表面有些微香脆感；咪睇佢好似無乜松露醬，入口確有少少松露幽香，唔太嗆，平衡到嘅蜜糖味。
臨離開，再睇多次佢哋個午市自助沙律吧詳情，平日就一定嚟唔到，星期六、日就可以帶老婆嚟試吓，因為健康嘢佢最啱，再者星期六、日可以由11:30am食到3:00pm，基本消費先喺$108（自助沙律嘅、一客餐沙、一客甜品及啡茶），加多個主菜先喺由$118-$158，同啲老友迤坐就啱晒。
依家飲飲食食追求健康都已經喺大趨勢，況且，「野玩田店」位置好，做菜有水準，定價有平有貴，喺幾值得推介兼翻兜嘅食店，真喺多謝同學仔是晚嘅安排。
個人評分
味道：8/10
環境：8/10
服務：8/10
抵食：7/10
平均每人消費：HK$190
環境：8/10
服務：8/10
抵食：7/10
平均每人消費：HK$190
餐廳資料：
野玩田店 Something Wild - The Farm
尖沙咀河內道18號K11購物藝術館2樓201號舖
3755 4899
野玩田店 Something Wild - The Farm
尖沙咀河內道18號K11購物藝術館2樓201號舖
3755 4899
沒有留言:
發佈留言