奇華餅家 Kee Wah Bakery：應節新糉類

雖然距離端午都仲有段時間，偶爾經過啲酒店、酒樓、餅店都已經見到推出應節嘅五月糉，鋪門嘅大橫額，凍櫃嘅陳列，有備各式各樣口味，可謂琳瑯滿目，更不時推陳出新，不得不佩服師傅們嘅創意心思。多謝友人所送嘅香糉俾小弟提早應節，實在有心，想同大家分享其中兩款新品「糉」。

姬松茸藜麥素糉 $64

唔知喺咪知我老婆口味偏素，依一款素糉就絕對啱晒佢，可以安心食，唔使麻麻煩煩想食糉又要揀番晒啲肥豬肉出嚟。睇佢包裝袋後所列嘅成份，除姬松茸、藜麥，仲有綠豆、蘿蔔乾、栗子、蓮子、黑豆、紅豆、紅米、冬菇、木耳……等等，材料非常豐富，亦真喺非常健康，仲好有養生價值。

雖然都喺以糯米所包裹，但由於調味方面明顯比一般嘅糉做得較清淡，所以有淡淡竹葉香加上食材都喺素材料，食完都唔覺有滯膩感，反而有點點清新感，老婆超讚依款糉嘅配搭，相信喺一眾素食者嘅至愛。

西班牙黑毛豬瑤柱糉 $80

另一款口味賣點就喺以西班牙黑毛豬入饌，但同樣加入相當多嘅食材入內，包括瑤柱、綠豆、鹹蛋黃、眉豆、紅豆、冬菇、蝦米……等等，所以，口感一樣咁豐富。

一入口就跟姬松茸藜麥素糉明顯好唔同，味道上喺濃香好幾倍，再望望番包裝袋嘅成份列表，加入鹵水汁，又混咗五香粉，就明白點解。此外，啲黑毛豬口感鬆化富肉香，鹹蛋黃更喺食糉時嘅心頭好，加埋蝦米，整體十分惹味，依一款就甚討小弟歡心。

兩款新品唔止帶嚟新鮮感，仲做得出色，更迎合到喜歡食素或食肉嘅朋友，正正各有特色，「糉」合你心意。

個人評分
味道：9 /10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
奇華餅家 Kee Wah Bakery
沙田港鐵沙田站SHT15號舖
2681 1633