言歸正傳，7:00pm嚟到客人唔到，但到8:00pm就差唔多坐滿，今晚都只喺閒日，相信周五、假日更喺絡繹不絕。咪睇佢哋門面細細，入面其實好大，枱與枱之間無一般中菜館嘅弊病排得過密，空間感足，讓人感覺舒服。而裝潢樸實而摩登，光猛整潔，少少古色古香嘅木架櫃用作襯托，帶出少少南洋風。
打開餐牌，有餐廳嘅自我介紹，而餐牌印刷相當精美，圖文並茂，別類分得清晰，有湯品、冷盤、豆腐、肉類、海鮮、菜類、飯粉麵、星洲米線、飲品及甜品，概略計一計有近90款食物，不愁無嘢唔啱食。最貼心喺大部份菜式都設有大、中、小份量供選擇，可按人數選取適合份量，又或多心想試多啲嘢，可以揀晒細份。
後頁仲介紹吓南洋中菜嘅起源，而菜式揉合南洋風味及東南亞香料，例如醬料上加入娘惹咖喱醬、參巴醬、冬蔭功醬、南洋咖啡漿……等等，有不少頗有心思嘅菜式！
醬油花生、栗子 $15
等表姨甥女期間，除睇睇餐牌，就吓咬吓小食，醬油花生煮得腍又有醬油香，原粒栗子唔喺好大粒，但就粉糯清甜。順帶一提，錢茶$7位之外，另收加一服務費。
脆醬美人魚 $52
冷盤小食貪得意揀咗個南洋小食「脆醬美人魚」，啲魚仔炸到好脆口，咬落咯咯聲，醬汁味道帶甜帶辣，辣度極微。一客有好多件，唔覺唔覺成餐飯由頭到尾都好似食唔完咁。
咖啡脆雞 $92
因為專登帶表姨甥女試南洋風味菜，所以，點番上次試過好食嘅「咖啡脆雞」及「青芥末蝦球」俾佢試試。個咖啡脆雞感覺上比上次做得香濃，帶甘苦味，喜歡咖啡嘅朋友應該幾啱口味，要趁快食，雞件外層有脆口感，而且肉嫩滑溜，伴點杏仁片，增添口感！
青芥末蝦球 $135蝦球選用較大呎碼嘅大鮮蝦，大大粒入口基本上爽彈鮮甜，除掛滿青青綠綠嘅青芥末醬之外，仲加咗蟹籽、蘭香子及芒果粒，色彩繽紛鮮艷，而青芥末醬食起嚟都有少少攻鼻，但都喺點到即止，表姨甥女都讚好有特色。同樣，可以嘅話盡快食，因為啲大蝦喺上咗粉漿炸過，有層脆漿層，耐咗就被啲醬汁浸腍就打咗少少折扣。
古早魚香老鼠粉煲 $98主食我就想試試新嘢「古早魚香老鼠粉煲」，見餐牌特別成版介紹，仲記得幾年前晌吉隆坡嘅阿羅街（大牌檔美食街）食過一道炒老鼠粉，有啲似港式乾牛河，但配海鮮料，而今次樂天經典嘅老鼠粉就濕底並以鍋上。
成鍋咁上熱氣騰騰，由於打下嘅生蛋需要攪勻做成蛋花，所以，都唔可以影相影得太耐。除打蛋花，仲另備有一小碟酸柑汁及鹹魚蓉，一齊打入鍋老鼠粉（即銀針粉），撈勻就食得。內裡仲有啲蝦仁、冬菇粒、椰菜花……等等，材料豐富，鹹鹹酸酸，頗醒胃，而且份量唔講得笑，足4、5人享用。
三色桂花班蘭糕 $38
雖然話飽話飽，但女生嘅胃真喺異於常人，再嚟兩客甜品都話無問題，真厲害。先試一款糕點類，分別喺由桂花、班蘭及椰汁做成嘅三色糕，一客6件，只賣$38，好抵食。3款味道，個人覺得桂花味比較突出，入口冰涼，有份清爽怡人嘅感覺。
招牌酸柑香茅凍 $28
另一款喺果凍類，香茅凍真喺好少有，口感爽爽滑滑，滲出幽幽香茅清香，唧埋啲酸柑汁，酸爽甘甜，又有種好潤喉嚨嘅感覺。
總而言之，環境舒適，服務到位，菜式既有風味，又夠特別，否則，都唔帶佢嚟試啦！
個人評分
味道：8/10
環境：8/10
服務：8/10
抵食：8/10
平均每人消費：HK$260
味道：8/10
環境：8/10
服務：8/10
抵食：8/10
平均每人消費：HK$260
餐廳資料：
樂天經典 Paradise Classic
大角咀海庭道18號奧海城二期UG樓UG09號舖
2177 0760
樂天經典 Paradise Classic
大角咀海庭道18號奧海城二期UG樓UG09號舖
2177 0760
沒有留言:
發佈留言